ចង់ក្លាយជាតារាម៉ូដែលល្បីលេចធ្លោ តែអត់បទពិសោធន៍សោះ ក៏លែងជាបញ្ហា

2019-10-18 07:00:00
ចំនួនមតិ 0 | ចំនួនចែករំលែក 0

ការងារជាអ្នកបង្ហាញម៉ូត ឬភាសាអង់គ្លេសហៅថា ម៉ូដែល (Model) គឺជាអាជីពមួយដែលទទួលបានការចាប់អារម្មណ៍ ព្រោះមានតម្រូវការទីផ្សារខ្ពស់ និងឱកាសបង្កើនសមត្ថភាពជាច្រើនផ្សេងទៀត។ កាលពីមុន បើនិយាយដល់អាជីពមួយនេះ គ្រប់ៗគ្នាច្បាស់ជាស្រមៃដល់មនុស្សដែលអ្នកដែលមានរូបរាងស្អាតបាត ខ្ពស់ៗ និងបទពិសោធន៍ច្បាស់លាស់។ ចំណុចនេះបានក្លាយជាឧបសគ្គ ចំពោះអ្នកខ្លះគ្មានបទពិសោធន៍ មិនសូវក្លាហាន កម្ពស់ទាប ប៉ុន្តែខ្លួនពិតជាស្រឡាញ់ការងារនេះខ្លាំង មិនដឹងធ្វើយ៉ាងម៉េច ឬសុំយោបល់ពីខាងណា។

ដើម្បីដោះស្រាយការបញ្ហានេះ និងជួយបំពេញក្ដីស្រមៃយុវជន ដែលចង់ក្លាយជាតារាម៉ូដែល ក្រុមហ៊ុនមួយបានផ្ដល់ឱកាសពិសេសសម្រាប់មនុស្សជំនាន់ថ្មី អាចសម្រេចគោលដៅជីវិតដោយជោគជ័យ។

លោក ផាត់ទ្រី ឌារិក ប៉ាន ស្ថាបនិកក្រុមហ៊ុន Perfect 10 បានប្រាប់វេបសាយ កញ្ញា ថា ដោយមើលឃើញពីភាពប៉ិនប្រសព្វរបស់យុវជនសម័យថ្មីភាគច្រើន ដែលស្រឡាញ់ការងារដើរម៉ូត លោកក៏មានបំណង បង្កើតក្រុមហ៊ុននេះ ដែលមានក្រុមការងារប្រកបដោយឆន្ទៈខ្ពស់ បណ្ដុះយុវជនឲ្យមានសមត្ថភាព និងប្ដេជ្ញាចិត្តក្នុងការជួយអភិវឌ្ឍទេពកោសល្យ ក្នុងវិស័យកម្សាន្ត នៅក្នុងប្រទេសកម្ពុជា និងនៅបរទេស។ ក្រៅពីនេះ ក្រុមហ៊ុន Perfect 10 ក៏ចង់លើកទឹកចិត្តក្រុមអ្នកដើរម៉ូតឲ្យស្រឡាញ់ការសិក្សា ដាច់ខាតកុំបោះបង់កណ្ដាលទី ទោះស្រឡាញ់អាជីពមួយនេះយ៉ាងណាក៏ដោយ គឺត្រូវចេះបែងចែកពេលវេលាឲ្យល្អ។

លោក ផាត់ទ្រី ឌារិក ប៉ាន (រូបថតពី Page: Khmer Alumni Association)

លោក ផាត់ទ្រី ដែលជាសហគ្រិនប្រព័ន្ធផ្សព្វផ្សាយមួយរូប ដែលទទួលបានជោគជ័យពីក្រុង Seattle នៃរដ្ឋធានី Washington សហរដ្ឋអាមេរិក បានបន្តថា គោលដៅរបស់លោក គឺជួយតម្រង់ទិសអ្នកគ្មានបទពិសោធន៍ ប៉ុន្តែមានពួកគេមានភាពប៉ិនប្រសប់ អត្តចរិតល្អ ឲ្យមានសមត្ថភាព និងក្លាយជាបុគ្គលលេចធ្លោក្នុងអាជីពជាតារាម៉ូដែលក្នុងស្រុក លើឆាកអន្តរជាតិ និងអាចមានចំណូលខ្ពស់ផងដែរ។

ក្រៅពីជួយអ្នកចង់ចាប់អាជីពជាអ្នកបង្ហាញម៉ូត លោកបន្តថា បច្ចុប្បន្ន ក្រុមហ៊ុននេះទើបបើកដំណើរការប្រហែល១ឆ្នាំ ប៉ុន្តែមានចំណុចល្អ និងផ្លែផ្កាល្អឲ្យគួរឲ្យកត់សម្គាល់ និងបានចាប់ដៃគូធ្វើការជាមួយស្ថាប័នធំៗ ចំនួន៩ នៅក្នុងវិស័យសម្បូរបែប និងមានការទទួលស្គាល់ពីសាធារណជននៅកម្ពុជា ដូចជា ក្រុមហ៊ុន Sabay ជាដើម។