និយាយអ្វីក៏ដោយ ក៏យុវភាពគួរស្គាល់ថាស្នេហាជាអ្វីម្ដងដែរ
- 2019-10-18 02:45:00
- ចំនួនមតិ 0 | ចំនួនចែករំលែក 0
និយាយអ្វីក៏ដោយ ក៏យុវភាពគួរស្គាល់ថាស្នេហាជាអ្វីម្ដងដែរ
នៅពេលធំដឹងក្ដីហើយ គេហាក់ដូចជាលែងយកចិត្តទុកដាក់នឹងរឿងស្នេហា។ មនុស្សមួយចំនួន កាលពីក្មេង មិនទាន់បានឆ្លងកាត់ស្នេហាសូម្បីតែមួយដង ដល់ពេលស្រលាញ់គ្នា គិតដល់តែរឿងរៀបការ មិនចាប់អារម្មណ៍រឿងមនោសញ្ចេតនា។ នៅពេលនោះ មិនមែនយើងបានបាត់បង់រយៈកាលដ៏ស្រស់ស្អាតនៃយុវភាពហើយទេឬ?
ចំពោះមនុស្សមួយចំនួន យុវភាពបើមានស្នេហា គឺជារឿងដែលខុសឆ្គងមួយ ព្រោះពួកគេគិតថា យុវភាពគួរចំណាយពេលដើម្បីផ្ដោតលើការរៀនសូត្រក៏ដូចជាអនាគត។ តែចំពោះខ្ញុំវិញ ខ្ញុំគិតថា មនុស្សវ័យក្មេងមានស្នេហា ជារឿងធម្មតា។ ព្រោះអាយុក្មេង យើងត្រូវដើរឆ្លងកាត់ឧបសគ្គ និងភាពខុសឆ្គងទាំងឡាយ ទើបអាចធំដឹងក្ដីបាន។
នៅថ្ងៃអនាគត គេអាចយកកំហុសទាំងប៉ុន្មានដែលខ្លួនបានឆ្លងកាត់ មកផ្គត់ផ្គង់ឲ្យជីវិតគូរបស់ខ្លួនវិញ។ ជីវិតមនុស្សកើតមកមានយុវភាពតែមួយប៉ុណ្ណោះ ហើយវាខ្លីខ្លាំងណាស់ មិនវែងដូចអ្នកបានគិតឡើយ។ បើក្នុងរយៈពេលដ៏ស្រស់ស្អាតបំផុតនៃជីវិតរបស់ខ្លួន ហើយមិនគិតដល់រឿងមនោសញ្ចេតនា តើអ្នកប្រុងពេលណាបានគិតដល់?
នៅពេលឆ្លងផុតវ័យនេះហើយ បានចាប់ផ្ដើមគិតនោះ ទោះបីជាខំប្រឹង ក៏វានឹងបន្សល់អនុស្សាវរីយ៍ដ៏ស្រស់ស្អាតដូចពេលយើងនៅក្មេងទៀតដែរ។ មនុស្សជាច្រើនភ័យខ្លាចថា មានស្នេហា រាល់សមិទ្ធផលផ្សេងៗទៀតនឹងធ្លាក់ចុះ ដូចជារឿងរៀនសូត្រជាដើម។ តែកុំព្រួយ ប្រសិនបើអ្នកចេះរក្សាតុល្យភាពរវាងរឿងទាំង២នេះ អ្នកនឹងធ្វើបានប្រសើរទាំង២យ៉ាង។
អ្នកខ្លះទៀត មិនមែនមិនគិតដល់រឿងស្នេហាឡើយ តែមិនហ៊ានបើកមាត់ ខ្លាចមនុស្សដែលខ្លួន ពេញចិត្តនោះ មិនមានចិត្តដូចគ្នាតបមកវិញ។ តែសួរថាបើអ្នកមិនក្លាហានបើកមាត់ខ្លួនឯង តើនឹងមានគេនិយាយជំនួសអ្នកមែនទេ? ពិតមែនហើយ គេនឹងនិយាយហើយគេក៏នឹងដណ្ដើមមនុស្សដែលអ្នកស្រលាញ់ពីអ្នកដូចគ្នា។
ទោះបីជាយើងអាចត្រូវគេបដិសេធ តែយ៉ាងណាក៏គ្រាន់ជាងទុកក្នុងចិត្តដោយមិនដឹងចម្លើយមួយជីវិតដែរ។ យុវភាពធ្មេចបើកដើរជិតអស់ទៅហើយ សូមកុំបង្អង់ ហើយរកមនោសញ្ចេតនាឲ្យខ្លួនមួយ មុនពេលឈានជើងចូលជីវិតរបស់មនុស្សពេញវ័យពេញលក្ខណៈ ទើបចាស់ទៅនៅមានអ្វីនឹកដល់៕
ចុចអាន៖ ពេលខឹងគ្នា បើមិត្តប្រុសពិតជាបានលះបង់បេះដូងជូនអ្នកមែន គាត់ប្រាកដហ៊ានធ្វើរឿងទាំងនេះ