និស្សិតខ្មែរមួយរូបចែករំលែកបទពិសោធន៍ ក្រោយទទួលបានការងារក្នុងរដ្ឋាភិបាលអាមេរិក
- 2019-10-17 06:00:00
- ចំនួនមតិ 0 | ចំនួនចែករំលែក 0
និស្សិតខ្មែរមួយរូបចែករំលែកបទពិសោធន៍ ក្រោយទទួលបានការងារក្នុងរដ្ឋាភិបាលអាមេរិក
កញ្ញា ថៃ សារីយ៉ា ជាជនជាតិខ្មែររស់នៅក្នុងរដ្ឋ Los Angeles កាលីហ្វ័រញ៉ា សហរដ្ឋអាមេរិក អស់រយៈពេល ១០ ឆ្នាំ។ នាងគឺជាអតីតនិស្សិតឆ្នាំទី៣ នៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិ្ចច (RULES) ជំនាញផ្នែកធនាគារ និងហិរញ្ញវត្ថុ ហើយបានបន្តការសិក្សានៅកាលីហ្វ័រញ៉ារហូតបញ្ចប់ថ្នាក់បរិញាបត្រផ្នែកគ្រប់គ្រងអាជីវកម្មក្នុងឆ្នាំ២០១៦។
ថ្ងៃនេះដែរ សារីយ៉ា បានចូលរួមចែករំលែកបទពិសោធន៍ខ្លះៗ មកកាន់វេបសាយ "កញ្ញា" ទាក់ទងទៅនឹងការទទួលបានការងារជាអ្នកកត់ត្រាចុះបញ្ជីសន្លឹកឆ្នោត នៅក្នុងរដ្ឋាភិបាលនៃសហរដ្ឋអាមេរិក។
តួនាទី និងទំនួលខុសត្រូវមានដូចជា៖
ទទួលខុសត្រូវលើការងាររដ្ឋបាលទូទៅ និងការបោះឆ្នោតពិសេស
កិច្ចការទាំងឡាយដែលពាក់ព័ន្ធក្នុងនាយកដ្ឋានត្រួតពិនិត្រនិងរាប់សន្លឹកឆ្នោតក្នុងតំបន់
រៀបចំឯកសារផ្សេងៗទៅតាមនីតិវិធី
ត្រួតពិនិត្យឯកសារទាំងអស់ឡើងវិញ ឲ្យបានពេញលេញជាក់លាក់ អនុលោមស្របទៅតាមផ្លូវច្បាប់និងតម្រូវការ
រៀបចំដឹកនាំការធ្វើបទបង្ហាញធំៗ
ចូលរួមក្នុងព្រឹត្តការណ៍ផ្សេងៗ
រៀបចំបង្កើតតារាងព័ត៌មាន
ត្រួតពិនិត្យបុគ្គលិកក្រោមបង្គាប់ ក្នុងអំឡុងពេលដំណើរការបោះឆ្នោត
រកដំណោះស្រាយ នៅពេលប្រតិបត្តិការជួបបញ្ហា
រៀបចំនិងសម្របសម្រួល ក្នុងដំណើរការបោះឆ្នោតជាតិនៃសហរដ្ឋអាមេរិក និងទំនួលខុសត្រូវលើកិច្ចការផ្សេងៗទៀត។
កូនខ្មែរ ចូលសញ្ជាតិអាមេរិករូបនេះ បានបន្តទៀតថា "ក្នុងនាមជាកូនខ្មែរ ខ្ញុំពិតជាសប្បាយត្រេកអរខ្លាំងណាស់ ដែលអាចមានសិទ្ធិទទួលបានតួនាទីបម្រើការក្នុងរដ្ឋាភិបាលអាមេរិក ព្រោះមានមនុស្សជាច្រើនធ្លាប់និយាយបង្អាប់ថាខ្ញុំខ្វះបទពិសោធន៍ និងមិនស័ក្តិសមនឹងទទួលបានការងារមួយនេះ ផ្ទយទៅវិញពាក្យទាំងនោះមិនអាចបំបាក់ទឹកចិត្តខ្ញុំបានឡើយ ប៉ុន្តែវាធ្វើឲ្យខ្ញុំខិតខំប្រឹងប្រែងកាន់តែខ្លាំងឡើងរហូតទទួលបានជោគជ័យ"។
"សម្តីអ្នកដទៃមិនអាចមកបញ្ចប់ក្តីសុបិនរបស់អ្នកបានឡើយ ត្រូវអត់ធ្មត់ព្យាយាមឈោងចាប់វាឲ្យបាន ជាក់ស្តែងដូចជារូបនាងខ្ញុំផ្ទាល់ ក្រោយបញ្ចប់ការសិក្សា ក៏ធ្លាប់ឆ្លងកាត់ភាពបរាជ័យលើការសម្ភាសការងាររាប់សិបក្រុមហ៊ុនមកហើយដែរ ប៉ុន្តែខ្ញុំគ្មានថ្ងៃចុះចាញ់ដាច់ខាត"។ សារីយ៉ា បន្ត។
សម្រាប់គម្រោងទៅថ្ងៃអនាគតវិញ កូនខ្មែរដ៏មានសមត្ថភាពរូបនេះ មានបំណងចង់ពាំនាំបទពិសោធន៍ និងចំណេះដឹងទាំងប៉ុន្មានដែរនាងមាន ត្រលប់មកប្រទេសខ្មែរវិញ ដើម្បីការអភិវឌ្ឍនិងផ្តល់ផលប្រយោជន៍សម្រាប់ជាតិ ព្រោះកម្ពុជាគឺជាទឹកដីកំណើតតែមួយគត់ស្ថិតនៅក្នុងចិត្តរបស់នាង៕
រូបភាព៖ផ្ដល់ឲ្យ
ចុចអានបន្ត៖