មនុស្សប្រុសពេលស្រលាញ់ប្រពន្ធខ្លាំង តែងធ្វើរឿង ៦ យ៉ាងនេះដើម្បីនាង
- 2019-10-10 07:35:00
- ចំនួនមតិ 0 | ចំនួនចែករំលែក 0
មនុស្សប្រុសពេលស្រលាញ់ប្រពន្ធខ្លាំង តែងធ្វើរឿង ៦ យ៉ាងនេះដើម្បីនាង
ទំហំនៃក្តីស្នេហាមិនមែនស្ថិតនៅលើតែសម្ដី សូម្បីតែកាយវិការនិងសកម្មភាពប្រចាំថ្ងៃ ក៏អាចបញ្ជាក់យ៉ាងច្បាស់ ថាបុរសម្នាក់មានចិត្តស្រលាញ់ប្រពន្ធខ្លាំងកម្រិតណា។ បើស្រលាញ់ខ្លាំងពិតមែន គាត់តែងធ្វើរឿងទាំងនេះដើម្បីនាងហើយ។
១. ជួយការងារផ្ទះប្រពន្ធ
បើប្តីរបស់អ្នកនិយាយថា "ការងារផ្ទះជាតួនាទីរបស់ស្រីៗ” មានន័យថា គាត់មិនត្រឹមតែគ្មានទំនួលខុសត្រូវ ប្រកាន់គំនិតបុរាណ និងអត់ចិត្តប៉ុណ្ណោះទេ ថែមទាំងខ្ជិលមិនចង់ជួយសម្រាលបន្ទុកទៀតផង។ ប៉ុន្តែសម្រាប់មនុស្សប្រុសល្អ ចេះស្រលាញ់ប្រពន្ធវិញ ទោះរវល់នឹងការងារប៉ុណ្ណា ក៏ឆ្លៀតពេលអាចជួយធ្វើការងារផ្ទះ ព្រោះគាត់បានគិតគូរពីនាង និងដឹងច្បាស់ថា ម្នាក់ៗសុទ្ធតែមានកិច្ចការធ្វើរៀងៗខ្លួន ដូច្នេះហើយគាត់មិនចង់ដាក់បន្ទុកទៅលើប្រពន្ធតែម្នាក់ឯងឡើយ។
២. ចូលចិត្តលើកនិយាយពីប្រពន្ធនៅចំពោះមុខអ្នកដទៃ
សូម្បីតែពេលទៅខាងក្រៅជួបជុំជាមួយមិត្តភ័ក្តិ គាត់តែងតែយកប្រពន្ធទៅជាមួយ និងចូលចិត្តរំឭកពីនាងនៅចំពោះមុខគេឯង ដូចជាលើកសរសើរស្នាដៃធ្វើម្ហូប រៀបចំផ្ទះសម្បែង ទុកដាក់លុយកាក់ ពូកែរកស៊ីឬធ្វើការជាដើម។
៣. ខ្វាយខ្វល់ពីប្រពន្ធជានិច្ច
ពេលមានបញ្ហាអ្វីមួយកើតឡើង គាត់គិតបារម្ភខ្វាយខ្វល់ពីប្រពន្ធគ្រប់ពេលវេលា។ ទោះពេលខ្លះគាត់នៅឆ្ងាយពីនាង ក៏គាត់មិនដែលភ្លេចសួរសុខទុក្ខ និងចាំជួយលើកទឹកចិត្តពីចម្ងាយជានិច្ច។
៤. មិនទុកប្រពន្ធចោលនៅផ្ទះម្នាក់ឯង ពេលនាងមានផ្ទៃពោះ
បើប្តីណានៅស្រេកឃ្លានស្រា ផឹកស៊ីជប់លៀងឥតល្ហែ សុខចិត្តទុកប្រពន្ធចោលឲ្យចាំនៅផ្ទះតែឯង បង្ហាញថាគាត់ជាប្រុសគ្មានបេះដូងនោះទេ។ ប្តីណាដែលស្រលាញ់ប្រពន្ធខ្លាំង អាចសង្កេតដឹងច្បាស់ក្នុងអំឡុងពេលមានផ្ទៃពោះនេះហើយ។ បើគាត់ជូននាងទៅពិនិត្យផ្ទៃពោះនៅមន្ទីរពេទ្យទៀងពេល ជួយក្រើនរំឭកឲ្យលេបថ្នាំ ជួយធ្វើការងារផ្ទះសឹងមួយចប់ ដើម្បីឲ្យនាងបានសម្រាក ឬសួរនាំពីអាហារដែលនាងចង់ញ៉ាំជាដើម ទាំងអស់នេះហើយចាត់ទុកជាសំណាងដ៏ធំមួយរបស់មនុស្សស្រី។
៥. ទុកចិត្តប្រពន្ធ
មនុស្សប្រុសស្រលាញ់ប្រពន្ធពិតប្រាកដ មិនចេះលាក់លៀម និងតែងរ៉ាយរ៉ាប់ប្រាប់គ្រប់រឿង ព្រោះគាត់ជឿជាក់ទុកចិត្តនិងគិតថានាងគឺជាមិត្តល្អដែលអាចចែករំលែកបញ្ហាបានគ្រប់ពេល។
៦. ឲ្យតម្លៃចាត់ទុកប្រពន្ធជាមនុស្សសំខាន់ចម្បង
គ្មានហេតុផលណាដែលប្តីល្អ មិនចាត់ទុកប្រពន្ធសំខាន់ជាងគេបង្អស់ឡើយ។ ទោះបីនៅកន្លែងធ្វើការមមាញឹក ឬមានមិត្តភ័ក្តិបបួលខ្លាំងយ៉ាងណា ក៏គាត់នៅតែមានជំហររឹងមាំ ចេះបែងចែកច្បាស់លាស់ មិនចំណាយពេលនៅជាមួយអ្នកដទៃច្រើនជាងប្រពន្ធកូន៕
ចុចអានបន្ត៖ បើគេជាស្រីស្អាត ហើយបានប្តីអ្នកមាន ហេតុអ្វីយើងត្រូវទៅនិយាយរិះគន់ទើសគេធ្វើអី?