នារីម្នាក់ទៅវត្តសុំសេចក្ដីសុខ បែរជាត្រូវធ្លាក់ចូលគំនរផេះធូប ខ្លោចជាងពាក់កណ្ដាលខ្លួន

2019-09-16 04:30:00
ចំនួនមតិ 0 | ចំនួនចែករំលែក 0

រឿងហេតុកើតឡើងលឿនខ្លាំងពេក ធ្វើឲ្យអ្នករងគ្រោះមិនដឹងដោះស្រាយយ៉ាងម៉េច គួបផ្សំនឹងគ្មានមនុស្សនៅក្បែរទៀតនោះ បានធ្វើឲ្យនារីដែលមកសុំក្ដីសុខ ក្លាយជាមានក្ដីទុក្ខទៅវិញ។

កាលពីពេលថ្មីៗនេះ បណ្ដាញព័ត៌មាន The Paper បានឲ្យដឹង នៅចុងខែសីហាកន្លងទៅនេះ នារីវ័យ៣០ប្លាយមួយរូប ដែលមានត្រកូល Hu បានជួបគ្រោះថ្នាក់ដ៏កាចសាហាវមួយនៅពេលនាងបានជ្រុលជើងធ្លាក់ចូលគំនរផ្ទុកផេះធូបមួយនៅវត្ត Xiang San ដែលមានទីតាំងនៅខេត្ត Hunan ប្រទេសចិន។

យោងតាមប៉ូលិសក្នុងតំបន់បានឲ្យដឹងថា ដើមឡើយនារីអភ័ព្វខាងលើមានបំណងមកវត្តនេះដើម្បីសុំសេចក្ដីសុខ ហើយនៅពេលដែលនាងកំពុងស្វែងរកក្រដាសដើម្បីដុតធូបនោះ មិនដឹងជាយ៉ាងម៉េចក៏ស្រាប់តែជ្រុលជើង ធ្លាក់ចូលទៅក្នុងគំនរផ្ទុកផេះធូបរបស់វត្តដែលមានឆេះមានរងើកនៅឡើយ។

នៅពេលធ្លាក់ចូលក្នុងរណ្ដៅនេះភ្លាមដោយសារតែត្រូវផេះចូលភ្នែកនោះ នាងមិនអាចចេញពីទីនោះបានឡើយ ដោយបានត្រឹមតែស្រែកឲ្យជួយប៉ុណ្ណោះ។ មួយស្របក់ក្រោយមក ទើបមានយុវជនប៉ុន្មានរូប រត់មកជួយនាងចេញពីរណ្ដៅភ្លើងនេះ។ តាមការពិនិត្យ ខ្លួននាងត្រូវរលាកដល់ទៅ៥៩% ហើយកំពុងនៅសង្គ្រោះបន្ទាន់នៅឡើយ។ សំណាងល្អ មកទល់ពេលនេះ នារីត្រកូល Hu បានឆ្លងកាត់ការគំរាមដល់អាយុជីវិតហើយ។

វីដេអូរបស់នារីខាងលើ បានជួយក្រើនរំលឹកដល់មនុស្សជាច្រើន មិនគួរដើរក្បែររណ្ដៅផ្ទុកផេះខ្លាំងពេកនោះទេ ដ្បិតអាចជ្រុលជើងធ្លាក់ចូលដោយមិនដឹងខ្លួន៕

ចុចអាន៖ អ្នកម្ដាយព្រៃផ្សៃលក់កូនភ្លោះខ្លួនឯង ១ម៉ឺនដុល្លារដើម្បីទិញទូរសព្ទថ្មី

ប្រភព៖ Kenh14 ប្រែសម្រួល៖ Caramel