ឧស្សាហ៍ភ្ញាក់កណ្តាលអធ្រាត្រ ដាច់ខាតកុំធ្វើរឿងទាំងនេះ ជាពិសេសេពេលចូលបង្គន់

2019-09-10 09:05:00
ចំនួនមតិ 0 | ចំនួនចែករំលែក 0

មានហេតុផលច្រើនយ៉ាង ដែលធ្វើឲ្យអ្នកភ្ញាក់ដឹងខ្លួនទាំងកណ្តាលអធ្រាត្រ។ អាចបណ្តាលមកពី អ្នកចង់ទៅបង្គន់ ស្រេកទឹក ថ្លង់សំឡេងស្រមុក ឬដោយសារសុបិនអាក្រក់ជាដើម។ សម្រាប់អ្នកពូកែគេងមិនពិបាកទេ ប៉ុន្តែសម្រាប់មនុស្សមួយចំនួនវិញសំងំរាប់ម៉ោងនៅតែមិនអាចគេងលក់ទៅវិញ ហើយការភ្ញាក់ក្នុងអំឡុងពេលកណ្តាលអធ្រាត្របែបនេះ ពិតជារឿងដែលបអាក្រក់បំផុត។ វាមិនត្រឹមតែប៉ះពាល់ដល់សុខភាពផ្លូវចិត្តប៉ុណ្ណោះទេ ថែមទាំងគ្រោះថ្នាក់ដល់សុខភាពរាងកាយទាំងស្រុងតែម្តង។

បើអ្នកជួបប្រទះបញ្ហា ដូចអ្វីដែលបានរៀបរាប់ខាងលើញឹកញាប់ គួរដឹងពីវិធីទប់ស្កាត់និងជៀសវាងធ្វើរឿងមួយចំនួនដែលអាចបង្កគ្រោះថ្នាក់ដល់ខ្លួនឯងកាន់តែខ្លាំង។

ហាមងើបអង្គុយ

បើអ្នកយល់សប្តិអាក្រក់ ហើយងើបអង្គុយដោយមិនដឹងខ្លួន ត្រូវតែដាក់ខ្នងយឺតៗដេកទៅវិញឲ្យត្រង់ ដើម្បីរក្សាលំនឹងនៃរាងកាយ។ នៅសុខៗស្រាប់តែងើបអង្គុយភ្លាមៗ ចង្វាក់បេះដូងនឹងលោតញាប់ខុសពីធម្មតា ជាហេតុបណ្តាលឲ្យដំណើរឈាមហូរទៅកាន់ផ្នែកខួរក្បាលយ៉ាងច្រើន និងធ្វើឲ្យអ្នកពិបាកគេងទៅវិញ។

ហាមងើបទៅបត់ជើងតូចរាល់យប់

បើអ្នកផឹកទឹកច្រើនពេកមុនពេលចូលគេង អ្នកនឹងឈឺបត់ជើងតូច នៅពាក់កណ្តាលអធ្រាត្រ។ អ្នកខ្លះសូម្បីតែមិនបានផឹកទឹកច្រើន ក៏ត្រូវតែចូលបង្គន់រាល់យប់ដែរ ដូចជាអ្នកមានជំងឺទឹកនោមផ្អែម ស្រ្តីពោះធំ និងអ្នកជំងឺក្រពេញប្រូស្តាតជាដើម។ យ៉ាងណាមិញ បើអ្នកមិនឈឺបត់ជើងតូចខ្លាំង មិនចាំបាច់ត្រូវងើបជាប្រចាំពេកទេ ព្រោះនៅពេលដែលអ្នកងើបចេញពីគ្រែ បើកភ្លើង ឬលាងដៃ...ប្រៀបបានដូចជាអ្នកកំពុងតែទៅដាស់ខួរក្បាលឲ្យស្វាងលែងងងុយគេង។

ហាមលេងទូរសព្ទ

អេក្រង់ទូរសព្ទឬកុំព្យូទ័រ ពិតជាអាចប៉ះពាល់ដល់ដំណេករបស់អ្នក ព្រោះពន្លឺភ្លើងពណ៌ខៀវនៅក្នុងគ្រឿងអេឡិចត្រូនិកទាំងនោះ នឹងធ្វើឲ្យខួរក្បាលរបស់អ្នកយល់ច្រឡំថាជាពេលថ្ងៃ។ ហ៊ានតែយកដៃចុចសម្លឹងមើល វាពិបាកបំផុតក្នុងការដេកឲ្យលក់ទៅវិញ។

ហាមមើលម៉ោង

ភ្ញាក់ដឹងខ្លួនហើយងាកទៅមើលម៉ោងទៀត អ្នកនឹងមានអារម្មណ៍កាន់តែមិនស្ងប់។ ឧទាហរណ៍ថា ងើបឡើងស្រាប់តែមើលនាឡិកា ម៉ោងជិត៤ភ្លឺបាត់ទៅហើយ ពេលនោះអ្នកក៏ចាប់ផ្តើមរាប់ថយក្រោយ និងគិតថាសល់ពេលមិនយូរប៉ុន្មានទេដើម្បីគេងបន្ត។ ចិត្តរបស់អ្នកមិនរសាប់រសល់ទេ បើអ្នកមិនមើលម៉ោង។

ហាមរើបម្រាស់រាងកាយខ្លាំងៗពេក

ពេលគេងរាងកាយត្រូវការភាពស្ងប់ស្ងៀម ហើយកោសិកាផ្សេងៗទៀត ក៏សម្រាកដែរ។ សាច់ដុំរបស់អ្នកក៏មានតួនាទីដូចគ្នា ដើម្បីជួយឲ្យអ្នកគេងលក់ស្រួល។ ហេតុនេះហើយ ប្រសិនបើអ្នករើចុះរើឡើង សាច់ដុំរាងកាយនិងងើបឡើងធ្វើការសារជាថ្មី។ វាក៏ជាមូលហេតុ ដែលធ្វើឲ្យអ្នកពិបាកសម្រាកគេងឲ្យបានគ្រប់គ្រាន់។

តើគួរធ្វើបែបណាដើម្បីជួយឲ្យអ្នកឆាប់គេងលក់វិញ?

ដាក់ខ្នងឲ្យត្រង់ផ្តេកទៅពូកថ្នមៗដើម្បីសម្រួលដល់សាច់ដុំ។
បន្ទាប់មកដកដង្ហើមឲ្យបានវែងៗ ដើម្បីជួយឲ្យឆាប់គេងលក់។
បើអ្នកស្តេ្រសលើបញ្ហាអ្វីមួយ ព្យាយាមបន្ធូរចេញនិងដកឃ្លា ឈប់គិតវាបន្តិចសិន ពុំដូច្នោះទេអ្នកមិនអាចគេងលក់បានឡើយ។
នៅពេលថ្ងៃ គួរហាត់ប្រាណឬយ៉ូហ្កា ដើម្បីបញ្ចេញជាតិពុលអាក្រក់ពីខ្លួន និងអាចសម្រួលដល់ដំណេក ជាពិសេសត្រូវឆាប់ចូលគេងកុំនៅដល់យប់ជ្រៅពេក។
ការគេងឲ្យបានគ្រប់ ៨ម៉ោងក្នុងមួយយប់ ពិតជាសំខាន់ខ្លាំងណាស់ ដូច្នេះអ្នកមិនគួរធ្វេសប្រហែសឲ្យសោះ៕

ចុចអានបន្ត៖ ស្រកគីឡូដោយមិនបំផ្លាញសុខភាព ត្រូវប្រើវិធី៥ យ៉ាងនេះ

ប្រភព៖ bestie ប្រែសម្រួល៖ ដេត ឈុនអ៉ី