ពេលនៅជិតមិនចេះរក្សា ដល់ខ្ញុំអស់ចិត្ត ទើបអ្នកមកព្យាយាមចង់នៅក្បែរ

2019-09-05 08:50:00
ចំនួនមតិ 0 | ចំនួនចែករំលែក 0

វាជានិស្ស័យដែលឲ្យយើងបានស្គាល់គ្នា ហើយវាក៏ជានិស្ស័យដែលយើងបានស្រលាញ់គ្នា។ ប៉ុន្តែអ្នកដឹងទេ ខ្ញុំមិនអាចថែរក្សាស្នេហាមួយនេះបាននោះទេ ភាពមិនច្បាស់លាស់របស់អ្នកវាបានបំផ្លាញរាល់ការចងចាំល្អៗ រាល់ការស្រលាញ់ដែលខ្ញុំមានចំពោះអ្នកបន្តិចម្តងៗ ទាំងពេលខ្លះខ្ញុំមិនអាចរកឃើញចំណុចណាផ្សេងទៀតដែលអាចរក្សាទំនាក់ទំនងមួយនេះឡើយ។

ខ្ញុំដឹងថា ពេលនេះអ្នកស្អប់ខ្ញុំ តែខ្ញុំពិតជាមិនអាចបន្តរស់នៅជាមួយអារម្មណ៍បែបនេះទៀតទេ វាជាអារម្មណ៍ដែលទៅមុខមិនរួច ថយក្រោយមិនបាន និយាយមិនចេញ សួរមិនកើត។ ពេលមួយដែលខ្ញុំបានសម្រេចចិត្តថាចាកចេញ អ្នកប្រហែលមិនយល់ទេ អ្នកអាចបន្ទោសថាខ្ញុំជាមនុស្សចិត្តដាច់ សាវ៉ា ។ ខ្ញុំក្លាយទៅជាបែបនេះក៏ព្រោះតែអ្នកមិនដែលខ្វល់ពីវត្តមានរបស់ខ្ញុំនោះទេ អ្នកមិនបានឲ្យតម្លៃពេលវេលារបស់ខ្ញុំនោះឡើយ ក៏ព្រោះតែខ្ញុំស្រលាញ់អ្នកខ្លាំងជាងអ្នកស្រលាញ់ខ្ញុំ។ ឥឡូវខ្ញុំឈប់បង្ខំអ្នកឲ្យនៅក្បែរខ្ញុំទៀតហើយ អ្នកមានសេរីភាពហើយ។

វាយឺតពេលហើយ ដែលអ្នកព្យាយាមឃាត់ខ្ញុំ រឿងយើងទាំងពីរចប់ហើយ ខ្ញុំបានសម្រេចចិត្តហើយ ខ្ញុំមិនអាចប្ដូរវាបានទេ ទោះអ្នកប្រាប់ថាអ្នកស្រលាញ់ខ្ញុំខ្លាំងយ៉ាងណាក៏ដោយ ។ពេលកន្លងដែលខ្ញុំនៅជិតអ្នក អ្នកក៏មិនដែលប្រាប់ខ្ញុំឡើយ សូម្បីតែលេខទូរស័ព្ទក៏មិនSaveដែរ។ អ្នកតែងតែយកពាក្យថា ប្អូនស្រីមកដាក់ពីមុខទំនាក់ទំនងមួយនេះ។

ពេលនេះ ខ្ញុំក៏បានទទួលមនុស្សថ្មីដែលគេតែងតែព្យាយាមចង់យកឋានៈជាសង្សារពីខ្ញុំ គេស្រលាញ់ខ្ញុំ គេព្យាយាមណែនាំខ្ញុំទៅគ្រួសារគេ គេគោរពខ្ញុំ ខុសពីអ្នកច្រើនណាស់។ មកដល់ត្រឹមនេះ អ្នកប្រាប់ខ្ញុំថា អ្នកស្រលាញ់ខ្ញុំ អ្នកចង់នៅជិតខ្ញុំ តើខ្ញុំអាចត្រឡប់ទៅរកអ្នកវិញដែរទេ?

ខ្ញុំចង់ត្រឡប់ទៅរកអ្នកវិញណាស់ ប៉ុន្តែខ្ញុំមិនអាចមិនខ្វល់ពីអារម្មណ៍របស់មនុស្សដែលគ្មានកំហុសនោះទេ ។ ខ្ញុំព្យាយាមយល់ចិត្តអ្នក តែអ្នកមិនដែលព្យាយាមយល់ចិត្តខ្ញុំនោះទេ ខ្ញុំដឹងថាអ្នកមិនចូលចិត្តshow off ទំនាក់ទំនង ខ្ញុំក៏មិនដែលបង្ខំឲ្យអ្នកដើរប្រាប់គេរាល់គ្នានោះដែរ ខ្ញុំក៏ឲ្យពេលវេលាទៅអ្នក ប៉ុន្តែអ្វីដែលខ្ញុំទទួលបានគឺភាពមិនច្បាស់លាស់។ រយៈពេលមួយឆ្នាំកន្លះមកនេះ វាក៏បង្ហាញគ្រប់គ្រាន់ហើយថាអ្នកមិនដែលគិតថាបាត់ខ្ញុំនោះទេ។ បើពីដើមមកអ្នកយល់ដល់អារម្មណ៍ខ្ញុំ ដល់ថ្នាក់នេះនោះប្រហែលជាខ្ញុំមិនមានពេលអន់ចិត្តអីចឹងទេ ហើយយើងក៏មិននៅឆ្ងាយពីគ្នាដូចរាល់ថ្ងៃដែរ ។

តទៅ បើអ្នកស្រលាញ់នរណាម្នាក់ សូមកុំឲ្យគេមានអារម្មណ៍ថា គេមិនមានឋានៈអ្វីនឹងអ្នកឲ្យសោះ ព្រោះគេមិនដឹងថាអ្នកកំពុងគិតអីនោះទេ ហើយបើគេសម្រេចចិត្តចាកចេញហើយនោះ ពាក្យសុំទោស វាគ្មានន័យអ្វីទៀតទេ។ អីចឹងសូមថែរក្សាមនុស្សដែលនៅក្បែរអ្នកផង កុំចាំទាល់តែគេចាកចេញទើបនឹកស្ដាយក្រោយអី៕

ចុចអាន៖ មិនមែនងាយស្រួលឡើយ រៀនបំភ្លេចអ្វីមួយ ពិសេសមនុស្សដែលធ្លាប់ស្រលាញ់

អត្ថបទ៖ Spring