មិនមែនងាយស្រួលឡើយ រៀនបំភ្លេចអ្វីមួយ ពិសេសមនុស្សដែលធ្លាប់ស្រលាញ់

2019-09-04 03:35:00
ចំនួនមតិ 0 | ចំនួនចែករំលែក 0

បំភ្លេចអ្វីមួយ មិនដែលជារឿងងាយស្រួលឡើយ។ ធ្លាប់មានមនុស្សម្នាក់ដែលស្និទ្ធិស្នាល ហើយខ្ញុំបានចាត់គេដូចជាជីវិត ដូចជាដង្ហើមរបស់ខ្លួន។ អ្នកធ្លាប់ជាផ្នែកមួយនៃខ្ញុំដែលមិនអាចខ្វះបាន។ ទាំងសប្បាយ ទាំងពិបាកសុទ្ធតែចែករំលែកនឹងអ្នក អ្នកធ្លាប់ជាស្មាតែមួយគត់ដែលខ្ញុំផ្អែកលើ។

លែងស្រលាញ់គ្នាហើយ អ្នកណាក៏ស្រែកក្ដែងៗថា ត្រូវរៀនពីវិធីកាត់ចោលឲ្យអស់។ ប៉ុន្តែមិនមែនចង់ភ្លេចគឺភ្លេចបានឯណា។ នេះគឺជាបេះដូងរបស់មនុស្សណា មិនមែនម៉ាស៊ីនឡើយ។ មិនមែននៅពេលដែលមិនចង់រក្សាទុក ហើយគ្រាន់តែចុចពាក្យ លុប គឺហើយនោះទេ។

ធ្លាប់មានមនុស្សប្រាប់ខ្ញុំថា ចង់បំភ្លេចអ្នកណាម្នាក់ ត្រូវចំណាយពេលគុណនឹង២នូវរយៈពេលដែលធ្លាប់នៅជាមួយគ្នា។ ពេលខ្លះមានគេរំលឹកពីវត្តមានរបស់គេ ខ្ញុំក៏និយាយទាំងក្លាហានព្រមទាំងសើចថា ខ្ញុំភ្លេចអស់ហើយ ទាំងដែលក្នុងបេះដូងដូចមានកាំបិតកំពុងជ្រៀកជាចំរៀកៗ។

បំភ្លេចអ្វីមួយគឺពិបាកខ្លាំងណាស់ទៅហើយ ទម្រាំមនុស្សដែលយើងធ្លាប់គិតថាសំខាន់ជាងអ្វីទៅទៀតនោះ គឺស្ទើរតែមិនអាចធ្វើបាន។ ទោះបីជាតែងតែប្រាប់ខ្លួនឯងថា “មិនអីទេ” រាប់ពាន់ដងហើយក៏ដោយ តែតាមការពិត ខ្ញុំមិនមែនមិនអីទេ។ មិនដឹងថាក្រោយពេលបែកគ្នា អ្នកមានដែលធ្លាប់គិតពីខ្ញុំឬអត់ សូម្បីតែម្ដងក៏បាន។ តែខ្ញុំរាល់ថ្ងៃតែងត្រូវប្រកួតស្លាប់រស់ជាមួយអនុស្សាវរីយ៍ដ៏ច្បាស់ក្រឡែត ប្រៀបដូចទើបកើតឡើងកាលពីម្សិលមិញ។ ពាក្យដាស់តឿន ក៏ដូចជាដំបូន្មានរបស់អ្នកសម្រាប់ខ្ញុំ ខ្ញុំនៅឮប្រៀបដូចអ្នកកំពុងខ្សឹបប្រាប់ ទាំងមិនដឹងថាពេលនេះអ្នកកំពុងនៅឯណា។

និយាយរួមទៅ ឈានដល់ដំណាក់កាលបែកគ្នា ក៏ជាជម្រើសរបស់យើងទាំង២ តែហេតុអ្វីនៅឈឺខ្លាំងយ៉ាងនេះ ទាំងខ្លួនឯងនិយាយពាក្យថាបែកសោះ ពិតជាគួរឲ្យអស់សំណើចមែន។

គេថា ដើម្បីងាយបំភ្លេចគេ គ្រាន់តែយកស្រាធ្វើជាមិត្តគឺបានហើយ។ តែចម្លែកខ្លាំងណាស់ ខ្ញុំកាន់តែផឹកកាន់តែឃើញថាខ្លួនឯងស្វាង ហើយពិបាកលើសធម្មតារាប់រយដង ហើយមើលខ្លួនឯងនៅពេលនោះគឺគួរឲ្យអាណិតខ្លាំងណាស់។ ចុងបញ្ចប់ ខ្ញុំប្រើសឹងគ្រប់វិធីហើយ នៅតែមិនអាចបំភ្លេចរូបគេបាន អ៊ីចឹងកុំបោកខ្ញុំទៀតថា ក្រោយបែកគ្នាគឺងាយភ្លេចគេបាន៕

ចុចអាន៖ វេទនាបំផុតនោះគឺ នៅក្បែរគ្នា តែអស់អារម្មណ៍នឹងគ្នាបាត់ហើយ

ប្រភព៖ Guu ប្រែសម្រួល៖ Caramel