៨ ចំណុចបង្ហាញច្បាស់ថាអ្នកជាមនុស្សស្រីរឹងមាំ និងពិសេសខ្លាំងក្នុងកែវភ្នែកបុរស

2019-09-02 07:00:00
ចំនួនមតិ 0 | ចំនួនចែករំលែក 0

មនុស្សស្រីនៅ Single តែងតែត្រូវបានសង្គមឡកឡឺយ។ ដោយសារតែបែបនេះហើយទើបមនុស្សស្រីភាគច្រើនសម្រេចចិត្តទ្រាំជាមួយនឹងទំនាក់ទំនងស្មុគស្មាញ ដែលធ្វើឱ្យពួកគេអត់សប្បាយចិត្ត ព្រោះពួកគេខ្លាចនៅម្នាក់ឯង និងរងការរិះគន់ពីអ្នកដទៃ។ តែនៅមានមនុស្សស្រីមួយចំនួនជ្រើសរើសរស់នៅម្នាក់ឯង ដោយសារតែគេបានសម្រេចចិត្តចំណាយពេលលើខ្លួនឯង ជាជាងមានស្នេហា ទោះបីពេលខ្លះពួកគេត្រូវលំបាកក៏ដោយ។ នារីរឹងមាំដឹងច្បាស់ពីអ្វីដែលនាងចង់បាន ហើយមិនដែលចុះញ៉មនរណាម្នាក់ឡើយ។ ៨ ចំណុចនេះហើយដែលធ្វើឱ្យនាងក្លាយជាមនុស្សពិសេសក្នុងកែវភ្នែកបុរសៗ៖

១. ជាមនុស្សម្នាក់សំខាន់បំផុត មិនដែលធ្វើជាជម្រើសនរណាឡើយ

នារីសម័យថ្មីដឹងពីរបៀបផ្តល់តម្លៃ និងក្តីស្រលាញ់ឱ្យខ្លួនឯង ច្រើនជាងចំណាយពេលរបស់នាងឱ្យមនុស្សប្រុសដែលមិនសមនឹងទទួលវា។ នាងដឹងថានាងត្រូវតែជាមនុស្សសំខាន់បំផុតសម្រាប់មនុស្សប្រុសរបស់នាង ហើយមិនធ្វើជាជម្រើសគេឡើយ។ នាងមិនសមនឹងបុរសដែលយកចិត្តនាងតែពេលគេចង់បានអ្វីមួយពីនាងទេ ឬមិនធ្វើឱ្យនាងមានអារម្មណ៍ថាទទួលបានការស្រលាញ់ ការការពារ និងក្តីរំភើបឡើយ។

២. ផ្ដោតសំខាន់លើការអភិវឌ្ឍន៍ខ្លួនឯង

មនុស្សស្រីប្រហែលជាសម្រេចចិត្តនៅម្នាក់ឯងនៅពេលណាមួយ ជាពិសេសពេលដែលនាងផ្ដោតលើការធ្វើឱ្យខ្លួនឯងរីកចម្រើន។ ជាដំបូង នាងវាយតម្លៃការរីកចម្រើនខ្លួនឯង និងជោគជ័យរបស់នាងនៅកន្លែងការងារ ជាផ្នែកដែលសំខាន់បំផុត។ ដូចនេះ ចំណាយពេលខ្លះដើម្បីទទួលបានតំណែងមួយដែលបានមកពីសមត្ថភាពផ្ទាល់ខ្លួន ជាមូលហេតុមួយដែលមនុស្សស្រីរឹងមាំពេលខ្លះត្រូវតែបោះបង់ចោលស្នេហា។

៣. បដិសេធបុរសណាដែលមិនឱ្យនាងធ្វើជាខ្លួនឯង

នាងមិនត្រូវការមនុស្សប្រុសមកប្រាប់ឱ្យត្រូវស្លៀកពាក់បែបណាទេ ឬព្យាយាមឱ្យនាងសម្របខ្លួនតាមអ្វីដែលគេចង់បាននោះឡើយ។ មនុស្សស្រីសម័យនេះមិនខ្លាចនឹងការពេញចិត្តជាមួយនឹងជីវិតខ្លួនឯង ច្រើនជាងមនុស្សដែលមិនចូលចិត្តភាពពិតរបស់នាង និងគុណវិបត្តិរបស់នាងឡើយ។

៤. មិនចំណាយពេលក្នុងបរិយាកាសមិនល្អ

មនុស្សស្រីឯករាជ្យចូលចិត្តញ៉ាំអាហារពេលល្ងាច និងមើលកុនម្នាក់ឯង ល្អជាងទៅជាមួយមនុស្សប្រុសដែលចំណាយពេលជាមួយនាងគ្រាន់តែដើម្បីបំពេញកាតព្វកិច្ច ជំនួសការពេញចិត្ត។

៥. មិនខ្លាចធ្វើខុស

នាងដឹងថាការធ្វើខុស ជាផ្នែកមួយនៃជីវិត ហើយរាល់កំហុសបង្រៀនយើង និងធ្វើឱ្យយើងរីកចម្រើន។ តែគ្មានមនុស្សស្រីណាចង់នៅជាមួយមនុស្សប្រុសដែលចង់បានការស្រលាញ់ និងការយកចិត្តទុកដាក់ ឬបុរសដែលបោកប្រាស់នាង ជាមួយនឹងការសន្យា និងអ្នកដែលមិនចេះដឹងខុសត្រូវនោះទេ។

៦. មិនធ្វើខ្លួនឱ្យអ្នកផ្សេងគិតថានាងជាទំនិញ ឬរបស់ប្រើប្រាស់ឡើយ

មនុស្សស្រីឯករាជ្យមិនអាចទទួលយកមនុស្សប្រុសដែលមើលឃើញតែរូបរាងខាងក្រៅរបស់នាង ហើយទុកនាងដូចជារបស់លេង ជំនួសឲ្យមនុស្សដែលគេស្រលាញ់ និងចង់បានទេ។ នាងត្រូវការមនុស្សប្រុសដែលមិនមែនចង់បានតែខ្លួនប្រាណនាង តែត្រូវការបេះដូងរបស់នាង។

៧. មិនខ្លាចយំ តែខ្លាចឈឺចាប់ដោយសាររើសមនុស្សប្រុសខុស

ទឹកភ្នែកមិនធ្វើឱ្យមនុស្សស្រីបាត់បង់ភាពរឹងមាំ តែមនុស្សស្រីរឹងមាំមិនដែលទទួលយកមនុស្សប្រុសដែលមិនខ្វល់នឹងការធ្វើឱ្យនាងឈឺចាប់ទេ។ មនុស្សប្រុសដែលមិនមើលថែនាងដោយក្តីស្រលាញ់ ការគោរព និងក្តីមេត្តា ដូចដែលនាងបានធ្វើ ហើយជាមនុស្សដែលមានតែការដោះសារ និងមិនរក្សាសន្យា ពេលដែលមានបញ្ហាកើតឡើងគេនឹងចាកចេញ។

៨. ចូលចិត្តភាពនៅលីវ

នាងដឹងថានាងអាចពឹងពាក់ខ្លួនឯងបាន។ នៅលីវ សម្រាប់មនុស្សស្រីមិនមានន័យថាធ្វើឱ្យមានអារម្មណ៍ឯកា ឬពិបាកចិត្តទេ តែមានពេលគ្រប់គ្រាន់សម្រាប់ខ្លួនឯង សម្រាប់មិត្តភក្តិ ដើរលេង និងអភិវឌ្ឍន៍ខ្លួនឯងទៅវិញទេ។ នាងស្រលាញ់ភាពឯករាជ្យរបស់នាង ហើយនឹងមិនបោះបង់វាសម្រាប់មនុស្សប្រុសធម្មតាម្នាក់ឡើយ៕

ប្រភព៖ Brightside ប្រែសម្រួល៖ សរ សុគន្ធី