៥ វិធី ជួយឲ្យកូនឆ្លាតវៃតាំងពីនៅក្នុងផ្ទៃ
- 2019-08-30 04:55:00
- ចំនួនមតិ 0 | ចំនួនចែករំលែក 0
៥ វិធី ជួយឲ្យកូនឆ្លាតវៃតាំងពីនៅក្នុងផ្ទៃ
អ្នកម្តាយគ្រប់រូបតែងមានបំណងប្រាថ្នា ចង់ឲ្យកូនកើតមកស្អាតហើយឆ្លាត។ វិធីដែលជួយបង្រៀនគភ៌តាំងពីនៅក្នុងផ្ទៃ ត្រូវបានអ្នកម្តាយជាច្រើនបានយកទៅអនុវត្តរួចមកហើយ។ ដើម្បីកុំឲ្យខកខានមេរៀនដ៏ល្អសម្រាប់ភាពវៃឆ្លាតរបស់កូន ក្នុងអំឡុងពេលមានផ្ទៃពោះ គួរធ្វើរឿង ៥យ៉ាងនេះ។
១. ស្តាប់តន្រ្តី
ការសិក្សាស្រាវជ្រាវ របស់វេជ្ជបណ្ឌិតមកពីសកលវិទ្យាល័យ Shanghai បានបង្ហាញថាការស្តាប់តន្រ្តីនៅពេលពរពោះ អាចជួយកាត់បន្ថយ អាការៈថប់អារម្មណ៍ និងស្រ្តេសរបស់អ្នកម្តាយ ព្រមទាំងអាចធ្វើឲ្យគភ៌នៅស្ងៀម។ ជាពិសេស គភ៌ក្នុងផ្ទៃ ក៏អាចលំហែកម្សាន្តជាមួយនឹងបទភ្លេងដែលអ្នកបានស្តាប់ផងដែរ។ គួរជ្រើសរើសចង្វាក់ភ្លេង បែបយឺតៗបណ្តែតអារម្មណ៍ ឭច្បាស់ៗ ឬអាចជាបទចម្រៀងកូនក្មេងដើម្បីទាក់ទាញគភ៌ ឲ្យចូលមកស្តាប់ជាមួយអ្នក។
២. អានសៀវភៅ
ពេលអានសៀវភៅអ្នកម្តាយគួរស្រមៃដល់រូបសត្វ ដើមឈើ មេឃ និងទេសភាពស្អាតៗ។ សំឡេងដែលអ្នកអាន និងរូបភាពដែលបានស្រមើស្រមៃ នឹងអាចបញ្ជូនទៅដល់គភ៌ក្នុងផ្ទៃ ប្រៀបបានដូចជាគេកំពុងមើលរឿងភាគខ្លីដូច្នោះដែរ។
៣. ធ្វើលំហាត់ប្រាណ
ការហាត់ប្រាណ អាចជួយសម្រួលដល់ប្រព័ន្ធរំលាយអាហារ ដំណើរការនៃឈាម សុខភាពបេះដូងនិងសួត។ អ្នកម្តាយដែលបានហាត់ប្រាណត្រឹមត្រូវនិងទៀងទាត់ ពិតជាមានសុខភាពរឹងមាំនិងមានថាមពលពេញលេញ។ អ្នកអាចអនុវត្តលំហាត់ប្រាណសម្រាប់ស្រ្តីមានផ្ទៃពោះ ដូចជាការដើរ ស្រូបយកខ្យល់អាកាសបរិសុទ្ធជាដើម។ ។
៤. ការសម្លឹងមើល
ការសម្លឹងមើលជាវិធីមួយ ដែលត្រូវបានគេទទួលស្គាល់ថាពិតជាមានប្រសិទ្ធភាព។ឧទាហរណ៍ថា អ្នកសម្លឹងមើលរូបភាពមួយ បន្ទាប់មកអ្នកគិតពីការគូរនិងពណ៌របស់រូបភាពមួយនោះ ហើយអ្វីដែលអ្នកបានគិត វានឹងបញ្ជូនរូបភាពទៅដល់គភ៌ក្នុងផ្ទៃ។ ហេតុនេះហើយទើបបានជាគេតម្រូវឲ្យអ្នកមានផ្ទៃពោះ ប្រកាន់ខ្ជាប់នូវអារម្មណ៍ល្អនិងមើលរូបភាពល្អៗ។ ជាពិសេសការជ្រើសរើសរបបអាហារ និងសម្រាកឲ្យបានគ្រប់គ្រាន់ពិតសំខាន់ខ្លាំងណាស់ ដើម្បីធ្វើឲ្យគភ៌មានសុខភាពល្អនិងឆ្លាតវៃ។
ពេលវេលាញ៉ាំអាហារល្អបំផុតសម្រាប់ស្ត្រីមានផ្ទៃពោះ គឺចាប់ពីម៉ោង ៧-៨ (អាហារពេលព្រឹក) ១២-១៣ (អាហារថ្ងៃត្រង់) ១៨-១៩ (អាហារពេលល្ងាច)។ អ្នកត្រូវញ៉ាំឲ្យគ្រប់៣ពេលមិនអាចរលងបានទេ ហើយដាច់ខាតកុំញ៉ាំនៅពេលយប់ ព្រោះវាជាទម្លាប់មិនល្អ។ ជាពិសេស ត្រូវញ៉ាំម្ហូបស្ងោរឬចំហុយឲ្យបានច្រើនជាងម្ហូបបំពងឬចៀន៕
ចុចអានបន្ត៖ អ្នកឧស្សាហ៍ចូលគេងយប់ជ្រៅក្នុងវ័យខ្ទង់២០ឆ្នាំ ជៀសមិនផុតពីផលប៉ះពាល់ទាំងនេះឡើយ