៤ យ៉ាង បង្ហាញថាអ្នកជាមនុស្សស្ងប់ស្ងៀម មិនសាំញ៉ាំច្រើន

2019-08-27 09:45:00
ចំនួនមតិ 0 | ចំនួនចែករំលែក 0

ដោយសារនៅក្នុងសង្គមនាពេលបច្ចុប្បន្ន សម្បូរតែបញ្ហាឥតឈប់ឈរ ទើបធ្វើឲ្យមនុស្សមួយចំនួនចូលចិត្តបរិយាកាសនៅក្នុងផ្ទះ សំងំនៅម្នាក់តែឯងៗយ៉ាងមានក្តីសុខ។ មនុស្សដែលស្រលាញ់ភាពស្ងប់ស្ងាត់ ពិតជាត្រូវការពេលវេលាផ្ទាល់ខ្លួនច្រើនជាងអ្នកដទៃផ្សេងទៀត។

ខាងក្រោមនេះជាសញ្ញាបញ្ជាក់ថា អ្នកក៏ជាមនុស្សម្នាក់ដែលស្ងប់ស្ងៀម មិនចេះនិយាយសាំញ៉ាំច្រើន។

១. ចូលចិត្តនៅម្នាក់ឯង ឬនៅជាមួយមិត្តភ័ក្តិជិតស្និទ្ធបំផុត តែ២-៣នាក់

ប្រសិនបើអ្នកបានគេង មើលរឿង ស្ដាប់តន្ត្រី លេងជាមួយសត្វចិញ្ចឹម ឬធ្វើអ្វីផ្សេងៗតែម្នាក់ឯង អ្នកតែងតែសប្បាយចិត្តនិងមានថាមពលជាងពេលទៅខាងក្រៅដើរផ្សារ ឬទៅជួបជុំមិត្តភ័ក្តិច្រើនទៅទៀត។ ដោយសារតែអ្នកមានអារម្មណ៍កក់ក្តៅ ពេលមានគ្នាតិច ហើយក៏មិនចូលចិត្តនិយាយសាំញ៉ាំច្រើនដែរ។ ក្តីសុខតិចតួច ប៉ុន្តែវាធ្វើឲ្យអ្នកមានសុភមង្គលពេញលេញ។

២. មានអារម្មណ៍ថាល្វើយពេលត្រូវចេញទៅខាងក្រៅម្តងៗ

ថ្ងៃឈប់សម្រាក មនុស្សភាគច្រើនចង់ចេញទៅញ៉ាំអាហារឆ្ងាញ់ៗ ជប់លៀងដើម្បីបន្ថយភាពតានតឹង។ ផ្ទុយស្រឡះពីអ្នកទាំងស្រុង ព្រោះអ្នកតែងមានអារម្មណ៍ថាល្វើយ ឆាប់ធុញ ពេលត្រូវចេញទៅខាងក្រៅមានកម្មវិធីជួបជុំនានា។ អ្នកពុំសូវមានទំនាក់ទំនងក្នុងសង្គម ដែលជាសញ្ញាបញ្ជាក់ថាអ្នកជាមនុស្សស្ងប់ស្ងៀមផងដែរ។

៣. ហ៊ានបង្ហាញធាតុពិតតែពេលនៅជាមួយមនុស្សស្និទ្ធស្នាល

នៅក្នុងចំណោមមនុស្សច្រើននាក់ អ្នកតែងរក្សាភាពស្ងៀមស្ងាត់ មិនចង់និយាយស្តី និងមិនចូលចិត្តបង្ហាញអារម្មណ៍ឲ្យអ្នកដទៃបានដឹងងាយៗឡើយ។ ទោះជាបែបនេះក្តី អ្នកហ៊ានបញ្ចេញកាយវិការ ពាក្យពេចន៍ ការលេងសើចជាដើម តែនៅចំពោះមុខដៃគូយល់ចិត្តតែប៉ុណ្ណោះ។

៤. ប្រើជីវិតរស់នៅផ្អែកលើគំនិតនិងអារម្មណ៍ខ្លួនឯង

នៅពេលជីវិតជួបបញ្ហានិងរឿងរ៉ាវជាច្រើន អ្នកតែងចេះពីវិធីបំភ្លេចចោល និងអាចរស់នៅដោយសប្បាយរីករាយ។ ទោះមានអ្នកផ្សេងនិយាយដើម ឬមានគំនិតយ៉ាងណាក៏អ្នកមិនទៅឈឺក្បាលខ្វល់ខ្វាយជាមួយដែរ។ ដោយសារតែអ្នកជាមនុស្សមានជំហររឹងមាំ និងអាចប្រើជីវិតរស់នៅផ្អែកលើគំនិតនិងអារម្មណ៍ខ្លួនឯង។

កើតមកជាមនុស្សមិនសូវចេះមាត់ក មិនមែនជាឧបសគ្គក្នុងជីវិតឡើយ ហើយក៏មិនអាចវាយតម្លៃថាគេកើតទុក្ខរហូតដែរ ព្រោះមនុស្សប្រភេទនេះអាចសប្បាយរីករាយមួយបែបផ្សេងខុសពីអ្នកដទៃ៕