ស្រឡាញ់ឪពុកម្ដាយ សូមកុំបន្ទោសលោកនូវរឿង ៥យ៉ាងនេះ
- 2019-08-27 04:50:00
- ចំនួនមតិ 0 | ចំនួនចែករំលែក 0
ស្រឡាញ់ឪពុកម្ដាយ សូមកុំបន្ទោសលោកនូវរឿង ៥យ៉ាងនេះ
១. កុំបន្ទោសថាឪពុកម្ដាយគ្មានសមត្ថភាព
គ្មាននរណាពូកែបានគ្រប់រឿងនោះទេ ហើយក៏គ្មាននរណាធ្វើគ្រប់យ៉ាងបានល្អឥតខ្ចោះនោះដែរ។ ឪពុកម្ដាយគឺជាអ្នកផ្ដល់ជីវិត លះបង់ចិញ្ចឹមមើលថែយើងរហូតធំប៉ុណ្ណេះ គឺមិនមែនជារឿងងាយស្រួលនោះទេ ដូច្នេះកុំបន្ទោសឪពុកម្ដាយថា “ប្រៀបជាមួយឪពុកម្ដាយគេមិនបាន”។ សម្ដីនេះនិយាយចេញមក គឺហាក់ដូចអ្នកមិនឲ្យតម្លៃការលះបង់របស់ឪពុកម្ដាយចំពោះអ្នកទាល់តែសោះ។
២. កុំបន្ទោសឪពុកម្ដាយថាសាំញ៉ាំ
ឪពុកម្ដាយកើតមុនយើង ឆ្លងកាត់ជីវិតច្រើនជាងយើង ម្ល៉ោះហើយបើលោកនិយាយច្រំដែលដូចជាឲ្យហូបបាយ ឲ្យស្លៀកខោអាវក្រាស់ៗ មកផ្ទះឲ្យលឿន រៀបចំបន្ទប់ … គឺដោយសារតែលោកស្រឡាញ់យើងពិតប្រាកដ។ បើយើងមិនមែនកូនចៅរបស់គាត់ ក៏គាត់មិននិយាយបែបនេះដាក់ដែរ។
៣. កុំបន្ទោសឪពុកម្ដាយដែលរអ៊ូ ស្ដីឲ្យ
ដែលឪពុកម្ដាយថាស្ដីឲ្យ ក៏ព្រោះតែយើងធ្វើមិនល្អ ដែលស្ដីឲ្យនោះគឺមិនមែនដើម្បីខ្លួនគាត់ទេ ប៉ុន្តែដើម្បីខ្លួនយើង។ គ្មានឪពុកម្ដាយឯណាមិនស្រឡាញ់កូន គ្មានឪពុកម្ដាយណាដែលមិនចង់ឲ្យកូនរីកចម្រើនជាងខ្លួនឯង ហើយក៏គ្មានឪពុកម្ដាយឯណាមិនចង់ឲ្យកូនខ្លួនឯងក្លាយជាមនុស្សអស្ចារ្យនោះដែរ។
៤. កុំបន្ទោសឪពុកម្ដាយថាយឺតយ៉ាវ
ពេលឪពុកម្ដាយចាស់ទៅ កុំស្ដីបន្ទោសថាលោកធ្វើអ្វីយឺតយ៉ាវ។ បើយើងមិនទាន់ធ្លាប់ធ្វើជាឪពុកម្ដាយទេ យើងគ្មានថ្ងៃដឹងឡើយថា អ្នកជាឪពុកម្ដាយត្រូវប្រើការស្រឡាញ់ថ្នាក់ថ្នមប៉ុណ្ណាដើម្បីបង្រៀនយើងឲ្យចេះដើរ បង្រៀនឲ្យយើងចេះញ៉ាំ ចេះងូតទឹក និងធ្វើអ្វីៗជាច្រើនទៀត។ នៅពេលលោកនៅពេញកម្លាំង លោកបានលះបង់កម្លាំងយ៉ាងច្រើនដើម្បីពួកយើង នៅពេលនេះលោកចាស់ទ្រុឌទ្រោមលែងមានកម្លាំង វាក៏ជានាទីរបស់យើងដែលត្រូវថ្នាក់ថ្នមគាត់វិញ។ កុំភ្លេចថាទៅថ្ងៃមុខ យើងក៏គង់ចាស់ដូចគ្នា។
៥. កុំបន្ទោសឪពុកម្ដាយដែលឈឺថ្កាត់
មិនថាឪពុកម្ដាយរវល់យ៉ាងណា យប់ជ្រៅយ៉ាងណា ភ្លៀងធ្លាក់ខ្លាំងយ៉ាងណា តែពេលយើងឈឺថ្កាត់ ពួកគាត់នឹងបោះចោលការងារទាំងអស់ ដើម្បីនាំយើងទៅពេទ្យភ្លាមៗ។ ពួកគាត់នឹងស្វែងរកវិធីព្យាបាលយើងយ៉ាងរហ័ស។ នៅពេលពួកលោកឈឺថ្កាត់ តើយើងអាចធ្វើដូចដែលគាត់ធ្វើឲ្យយើងបានច្រើនឬតិចប៉ុណ្ណា? ឬដោយសារឪពុកម្ដាយឈឺច្រើនយូរខែយូរឆ្នាំ ទើបធ្វើឲ្យយើងមិនអាចមើលថែបាន?
នៅខណៈដែលយើងកាន់តែធំ ឪពុកម្ដាយក៏ចាប់ផ្ដើមចាស់ ឈឺ រហូតលាចាកលោក លាកូនលាចៅទៅដោយគ្មានថ្ងៃវិលត្រលប់។ បើគ្មានឪពុកម្ដាយ ក៏គង់គ្មានយើង បើសូម្បីឪពុកម្ដាយក៏អ្នកនៅអភ័យទោសឲ្យមិនបាន តើអ្នកទៅអភ័យទោសឲ្យអ្នកណាវិញលើលោកនេះ? ដូច្នេះសូមចាប់ផ្ដើមកតញ្ញូចំពោះឪពុកម្ដាយ ចាប់ពីពេលនេះ ថ្ងៃនេះ ហើយឈប់បន្ទោសឪពុកម្ដាយតទៅទៀត ៕
ចុចអាន៖ រឿងខ្លោចចិត្តទាំង៥យ៉ាង ដែលកូនៗមិនដែលដឹងពីម៉ែ