ចរិត ៥ យ៉ាងលើបណ្តាញសង្គម នាំឲ្យអ្នកពិបាករកការងារធ្វើ

2019-08-26 06:00:00
ចំនួនមតិ 0 | ចំនួនចែករំលែក 0

ពេលរៀនចប់ មានចំណេះដឹងពិតប្រាកដ អ្នកនឹងមានប្រាក់ខែសមរម្យ ប៉ុន្តែអ្វីដែលសំខាន់នោះគឺនៅពេលដាក់ពាក្យទៅធ្វើការនៅកន្លែងណាមួយ។ មិនខ្វះទេអ្នកដែលមានបរិញ្ញាបត្រកាន់ក្នុងដៃព្រោងព្រាត ទោះជាបែបនេះក្តី នៅតែមានកន្លែងធ្វើការខ្លះ គិតគូពិចារណា មើលទៅលើការប្រើប្រាស់ជីវិតនៅលើបណ្តាញសង្គម មុននឹងសម្រេចចិត្តជ្រើសរើសអ្នក។ ហេតុនេះហើយ បើមិនចង់បង្កផលប៉ះពាល់ដល់ការងារនាពេលអនាគត គួរជៀសវាងទង្វើ ៥ យ៉ាងនេះក្នុងបណ្តាញសង្គម។

រូបតំណាង

**១. បង្ហោះឬចុច Share លើរឿងណាដែលមិនសមគួរ**

ពិតណាស់ អ្នកមានសិទ្ធិក្នុងការគ្រប់គ្រងបណ្តាញសង្គមរបស់ខ្លួន ប៉ុន្តែកុំភ្លេចថា វាមិនមែនជាទីកន្លែងឯកជនឡើយ។ រឿងខ្លះត្រូវបានបែកធ្លាយយ៉ាងលឿនដូចព្យុះជាសាធារណៈ ដូច្នេះហ៊ានតែបង្ហោះឬចុចShare ផ្តេសផ្តាស អ្នកច្បាស់ជាខកចិត្តជាក់ជាមិនខាន។ ពេលខ្លះវាអាចនឹងសាយភាយទៅដល់គ្រប់ទិសទី រហូតធ្វើឲ្យអ្នកមិនអាចរកការងារធ្វើក៏ថាបាន។

រូបតំណាង

២. បញ្ចេញមតិយោបល់អវិជ្ជមាន ពីជាតិ សាសនា ឬភេទ

ការបញ្ចេញមតិយោបល់ផ្ទាល់ខ្លួនមិនមែនចេះតែអាក្រក់រហូតទេ ប្រសិនបើអ្នកនិយាយអ្វីដែលល្អនិងមានប្រយោជន៍។ យ៉ាងណាមិញ បើអ្នកជាមនុស្សអវិជ្ជមាន មានគំនិតផ្ទុយពីគេរហូត មិនថាជារឿងជាតិ សាសនា ឬបញ្ហាផ្សេងៗ នោះវាធ្វើឲ្យបាត់បង់ប្រយោជន៍ទៅវិញទេ។ ជ្រុលតែលេង ត្រូវឲ្យឆ្លាត កុំឲ្យខាតនាំទុក្ខដាក់ខ្លួន។

៣. ប្រើប្រាស់អ៊ីមែលមិនផ្លូវការ

អ្នកខ្លះមិនបានចាប់អារម្មណ៍ទាល់តែសោះ ចំពោះឈ្មោះអ៊ីមែលដែលបានយកទៅប្រើប្រាស់សម្រាប់ដាក់ពាក្យធ្វើការ។ អ្នកសម្ភាសន៍ច្បាស់វាយតម្លៃ ប្រសិនបើអ្នកដាក់ឈ្មោះបែបកំប្លែង មិនសមរម្យ និងមិនផ្លូវការ ហើយក៏គ្មានចិត្តចង់ឲ្យជាប់ដែរ ព្រោះគេអស់ការជឿជាក់លើអ្នកបាត់ទៅហើយ។

រូបតំណាង

៤. ប្រើពាក្យប្រមាថមើលងាយ

ត្រង់នេះស្រដៀងគ្នាទៅនឹងចំណុច២ទៀតដែលបានរៀបរាប់ខាងលើ គ្រាន់តែវាធ្ងន់ធ្ងរជាងបន្តិច ដោយសាររឿងខ្លះ ធ្វើឲ្យអ្នកមានប្រតិកម្ម ខឹង មិនពេញចិត្ត ទប់មិនជាប់ ចង់បញ្ចេញកំហឹង ប្រើពាក្យប្រមាថមើលងាយ បកអាក្រាតភ្លាមៗ។ ទង្វើបែបនេះ អាចបង្ហាញទាំងស្រុងពីចំណុចខ្សោយ ការមិនចេះគ្រប់គ្រងអារម្មណ៍ខ្លួនឯង បណ្តាលឲ្យកន្លែងការងារ មិនហ៊ានទទួលយកអ្នក ព្រោះខ្លាចថ្ងៃណាមួយអ្នកនឹងធ្វើឲ្យបែកធ្លាយរឿងសម្ងាត់ខ្ទេចខ្ទី បង្ករឿងមិនឈប់។

រូបតំណាង

៥. និយាយឬចែកចាយរឿងអាសអាភាស

សព្វថ្ងៃនេះ ធ្វើអ្វីផ្តេសផ្តាសលើបណ្តាញសង្គមមិនបានទេ ទោះបីជាអ្នកគិតថា វាគ្រាន់តែជាការលេងសើចកម្សាន្តអារម្មណ៍ក៏ដោយ។ ចៃដន្យក្នុងពេលណាមួយ គេចូលមើល Profile របស់អ្នក ហើយឃើញអ្នកជាមនុស្សចូលចិត្តនិយាយ ឬចុច Share នូវរឿងឥតប្រយោជន៍បែបនេះ ប្រាកដណាស់គេនឹងមិនទទួលយកអ្នកដាច់ខាត។