រឿងខ្លោចចិត្តទាំង៥យ៉ាង ដែលកូនៗមិនដែលដឹងពីម៉ែ
- 2019-08-27 02:55:00
- ចំនួនមតិ 0 | ចំនួនចែករំលែក 0
រឿងខ្លោចចិត្តទាំង៥យ៉ាង ដែលកូនៗមិនដែលដឹងពីម៉ែ
គ្រប់គ្នាដឹងថាម៉ែជាអ្នកមានគុណ ឬជាព្រះរស់ដែលមិនអាចមានអ្នកណាមកលះបង់ដើម្បីកូនៗបានដូចម៉ែ។ ប៉ុន្តែនៅមានរឿងច្រើនណាស់ដែលកូនៗមិនទាន់បានដឹងពីជម្រៅចិត្ត និងភាពខ្លោចផ្សារ ព្រមជាមួយការលំបាកទាំងឡាយដែលម៉ែបានធ្វើ ដោយមិនដែលហាមាត់ប្រាប់កូនឱ្យដឹង។
១. ពេលកូនកើតមក កូនឃើញតែម៉ែកាន់តែចាស់
មិនមែនម៉ែចង់បង្កើតកូនតូចទាំងខ្លួនឯងអាយុកាន់តែចាស់ទេ តែមកពីសម្រស់ម៉ែកាន់តែវិវត្តចាស់ជាងមុន ទាំងដែលម៉ែនៅអាយុក្មេងនៅឡើយ។ កូនដឹងទេ ម៉ែធ្លាប់ជាមនុស្សស្រីដ៏ស្រស់ស្អាត មានមន្តស្នេហ៍ មានបុរសជាច្រើនដែលធ្លាប់តាមស្រលាញ់ម៉ែ។ ម៉ែធ្លាប់ស្រមៃថានឹងរៀបការជាមួយបុរសល្អម្នាក់ បង្កើតកូនដោយគន្លងធម៌ បង្កើតគ្រួសារដ៏មានសុភមង្គលមួយ។
តែជីវិតមិនមែនដូចរឿងនិទានដែលយើងអាចកំណត់តាក់តែងបានគ្រប់ពេលនោះទេ។ បើកូនឃើញម៉ែរបស់កូនអាយុនៅក្មេង តែសម្រស់បែរជាធ្លាក់ដុនដាបយ៉ាប់យ៉ឺន ចូរគិតតើថាមកពីមូលហេតុអ្វី? តើម៉ែបានលះបង់និងជួបកាលៈទេសៈបែបណាខ្លះទើបធ្លាក់ខ្លួនបែបនេះ?
២. ម៉ែចំណាយពេលភាគច្រើននៃជីវិតម៉ែគឺនៅលើកូនៗ
តាំងពីកូននៅក្នុងផ្ទៃ ពេលកូនកើតមកតាំងពីបាតជើងក្រហម កូនដឹងទេ ម៉ែតែងចំណាយពេលវេលាដ៏ច្រើននៃជីវិតរបស់ម៉ែជាមួយកូន។ ម៉ែបីបមថ្នមថើបកូននៅជាប់ដើមទ្រូង មិនថាពេលកូនយំ កូនសើច កូនឈឺ កូនជា ឬមានរឿងអ្វី ម៉ែមិនដែលទុកកូនឱ្យនៅឆ្ងាយពីភ្នែក ពីច្រមុះនិងអារម្មណ៍របស់ម៉ែឡើយ។ ទោះពេលកូនគេងលក់ក៏ម៉ែនៅតែចង់បន្តថើបថ្នម បក់មូសរុយ ចាំដណ្ដប់ភួយឱ្យកូន តែងភ្ញាក់ជាញឹកញាប់ដើម្បីមើលថាកូនគេងបានស្រួលឬអត់។
ពេលកូនរៀនដើរដំបូង ម៉ែក៏នៅដើរតាមមើលកូន ខ្លាចកូនដួល។ ម៉ែមិនត្រឹមតែចំណាយពេលវេលានោះទេ ឯប្រាក់កាសក៏ម៉ែចំណាយលើកូនដោយគ្មានស្ដាយដែរ។ ម៉ែសុខចិត្តទុកលុយទិញអ្វីគ្រប់យ៉ាងឱ្យកូន មិនថារបស់ប្រើប្រាស់ ទឹកដោះគោ សម្លៀកបំពាក់ ថ្នាំសង្កូវ និងរបស់ច្រើនទៀតដើម្បីតែឃើញកូនមានក្ដីសុខ។ ទោះដល់ថ្ងៃចុងក្រោយនៃជីវិត ក៏ម៉ែនៅប្រាថ្នាបាននៅក្បែរកូន ចង់ឃើញមុខកូនមុនបិទភ្នែកផុតដង្ហើមទៅ។
៣. ពេលកូនចូលរៀនដំបូង
ជាវេលាដំបូងដែលម៉ែត្រូវបង្ខំចិត្ត ឱ្យកូនឃ្លាតឆ្ងាយពីម៉ែ។ ទោះដឹងកូនអាចដើរបានស្ទាត់ និយាយបានច្បាស់ ចេះប្រាស្រ័យទាក់ទងជាមួយអ្នកដទៃក៏ដោយ ម៉ែនៅតែខ្វាយខ្វល់ គិតពីកូនឥតឈប់ឈរ។ ពេលកូនទៅសាលា ម៉ែតែងលួចលបមើលពីក្រៅរបង ចង់ដឹងកូនទទួលបានភាពកក់ក្ដៅឬអត់ កូនមានកើតអីឬអត់?
ម៉ែមិនដែលគិតថាឡើយថាសាលាថ្លៃកម្រិតណា ឱ្យតែម៉ែមានលទ្ធភាព ម៉ែនឹងជ្រើសសាលាណាល្អឱ្យកូនចូលទៅក្រេបចំណេះដឹង។ ម៉ែទិញរបស់ល្អៗឱ្យកូន កាតាប សម្លៀកបំពាក់ សៀវភៅគ្រប់បែបយ៉ាងឱ្យតែកូនអាចរៀនចេះ និងសប្បាយចិត្ត។
៤. ពេលកូនចូលវ័យជំទង់
ចូលដល់វ័យនេះ ម៉ែដែលធ្លាប់តែជាទីប្រឹក្សា ជាអ្នកតម្រង់ផ្លូវឱ្យកូនពីតូចមក ត្រូវឃ្លាតឆ្ងាយបន្តិចម្ដងៗ។ កូនចេញទៅក្រៅជួបមិត្តភ័ក្ដិច្រើន ជួបភាពហ៊ឺហា សប្បាយក្អាកក្អាយ ឃើញរបស់ថ្មីៗ ចង់សាកល្បង រហូតពេលខ្លះកូនលែងចាត់ទុកម៉ែជាមនុស្សជិតស្និទ្ធដូចមុន ព្រោះកូនយល់ថាម៉ែចាស់ហើយ មិនយល់អ្វីដែលក្មេងចង់បានឡើយ។
កូនចេះលាក់ជាមួយម៉ែ ចេះធុញសម្ដីម៉ែ ចេះខឹងនឹងម៉ែ ចេះគំហកស្រែកតបដាក់ម៉ែជាញឹកញាប់។ តែកូនដឹងទេ មិនថាកូនអាយុច្រើនប៉ុណ្ណា ម៉ែនៅតែបារម្ភពីកូន នៅតែគិតថាកូននៅតូចក្នុងភ្នែកម៉ែដដែល។
៥. ពេលកូនត្រូវអ្នកដទៃធ្វើឱ្យខូចចិត្ត
កូនធ្លាប់រអ៊ូថាម៉ែពូកែនិយាយច្រើន ពូកែទើសច្រើន បិទសិទ្ធិសេរីភាពកូនមិនឱ្យប្រើការសម្រេចចិត្តខ្លួនឯង តែកូនមិនដឹងទេថាម៉ែធ្វើនេះក៏ព្រោះតែខ្លាចកូនដើរផ្លូវខុស ខ្លាចអ្នកណាម្នាក់ធ្វើបាបកូន។ ទោះកូនខ្លះខឹងនឹងម៉ែព្រោះតែរឿងអស់នេះ ទោះពេលខ្លះម៉ែធ្វើដូចជាដាច់ខាតដាក់កូន ជេរស្ដីកូន តែពេលអ្នកណាម្នាក់ធ្វើឱ្យកូនខូចចិត្ត ម៉ែនេះហើយនៅតែនៅក្បែរកូន ចាំជូតទឹកភ្នែកកូន ហើយក៏នឹងមិនជេរស្ដីកូនដូចមុនឡើយ។
ម៉ែនៅតែចាំលើកទឹកចិត្តកូន លួងលោមកូន ទោះអ្នកគ្រប់គ្នាគេបោះបង់កូន ម៉ែនៅតែទុកកូនដូចគ្រាប់ពេជ្រ មិនទុកកូនចោលឡើយ៕