ចង់ប្រាប់អារម្មណ៍ពិតរបស់ Sis ម្នាក់នេះ ទៅកាន់ Bro ម្នាក់នោះ
- 2019-08-22 03:30:00
- ចំនួនមតិ 0 | ចំនួនចែករំលែក 0
ចង់ប្រាប់អារម្មណ៍ពិតរបស់ Sis ម្នាក់នេះ ទៅកាន់ Bro ម្នាក់នោះ
ប្រហែលពាក្យថា Bro និង Sis សម្រាប់អ្នកផ្សេងក្នុងសម័យនេះជាពាក្យមួយដ៏ផ្អែមល្ហែម និង ពិសេសបំផុត ប៉ុន្តែវាសម្រាប់ខ្ញុំគឺជាពាក្យដ៏ពិបាក និង តឹងតែងបំផុត។
ខ្ញុំបានស្គាល់មនុស្សប្រុសម្នាក់ដោយសារពួកយើងស្គាល់គ្នានៅកន្លែងធ្វើការឯកជនមួយ ហើយគាត់ជាមនុស្សដំបូងបំផុតដែលនិយាយជាមួយខ្ញុំ បន្ទាប់មកពួកយើងតែងតែ Chat ជាមួយគ្នា ហើយខ្ញុំតែងហៅគាត់ Bro ហើយគាត់ ហៅខ្ញុំថា Sis ហើយគាត់ក៏បានណាត់ខ្ញុំទៅញ៉ាំអី ឬ ក៏ទៅដើរលេងនៅខាងក្រៅ។ មុនដំបូងខ្ញុំមិនហ៊ានទៅជាមួយគាត់នោះទេ ហើយតែងតែព្យាយាមរកលេសថារវល់នេះរវល់នោះ រហូតដល់គាត់បបួលខ្ញុំច្រើនដងពេកខ្ញុំក៏សម្រេចចិត្តទៅញ៉ាំអីជាមួយគាត់។
ពីមួយថ្ងៃទៅមួយថ្ងៃខ្ញុំចាប់ផ្ដើមមានអារម្មណ៍ថាគាត់មានចិត្តមកលើខ្ញុំ តែខ្ញុំព្យាយាមធ្វើមិនដឹង ហើយនិយាយប្រាប់គាត់ថាខ្ញុំទុកគាត់ដូចជា បងប្រុសខ្ញុំអីចឹង។ គាត់ក៏មិនដែលនិយាយអីច្រើននោះដែរ តែអ្វីដែលគាត់ធ្វើមកគឺមានន័យបែបនោះមែន។
រហូតដល់ថ្ងៃមួយបន្ទាប់ពីគាត់បបួលខ្ញុំចេញទៅក្រៅ ពួកយើងបានទៅញ៉ាំអី ហើយទៅលេងកន្លែងជាច្រើនទៀត អស់កន្លះថ្ងៃ តែខ្ញុំមិនបានគិតអី គ្រាន់តែដឹងថាសប្បាយចិត្តធម្មតាដូចពេលដែលនៅជាមួយមិត្តដ៏ស្និទ្ធស្នាលម្នាក់ និងបងប្រុសដ៏ល្អម្នាក់ ប៉ុន្តែពេលត្រឡប់មកដល់ផ្ទះវិញ
គាត់ក៏បានសារភាព ហើយ សុំខ្ញុំធ្វើសង្សាររបស់គាត់ តែខ្ញុំបានបដិសេធន៍ ព្រោះខ្ញុំគ្មានអារម្មណ៍បែបនោះឡើយ។ ខ្ញុំដឹងថាពេលដែលមានរឿងបែបនេះកើតឡើងពួកយើងប្រាកដជាពិបាកមើលមុខគ្នាហើយ តែខ្ញុំគ្មានជម្រើសនោះទេ។
តាំងពីថ្ងៃនោះមកពួកយើងក៏រាងឆ្ងាយគ្នា ហើយក៏មិនសូវនិយាយជាមួយគ្នាដូចមុនដែរ តែខ្ញុំពិតជាមិនចូលចិត្តស្ថានភាពបែបនេះទេ ព្រោះវាតឹងតែងណាស់ចំពោះខ្ញុំ។ ខ្ញុំព្យាយាមនិយាយធម្មតាដើម្បីស្ដារទំនាក់ទំនងឡើងវិញរហូតដល់គាត់និយាយធម្មតាជាមួយខ្ញុំវិញ ហើយខ្ញុំក៏សង្ឃឹមថាពួកយើងអាចរាប់អានគ្នាដូចបងប្អូនរហូតដែរ។
អ្វីដែលខ្ញុំមើលឃើញគឺការព្យាយាមរបស់គាត់មកលើខ្ញុំ គឺគាត់នៅតែមិនបោះបង់ការស្រឡាញ់នោះចោលហើយព្យាយាមយកចិត្តខ្ញុំ និង នៅក្បែរខ្ញុំរហូតពេលខ្លះគាត់បានចាប់ដៃខ្ញុំ កាន់ដៃខ្ញុំ ដល់ខ្ញុំមិនដឹងថាត្រូវនិយាយអ្វីបន្តទៀត។ ពេលខ្លះខ្ញុំមានអារម្មណ៍ថាអាណិតគាត់ ហើយក៏ស្រឡាញ់ដែរ ប៉ុន្តែខ្ញុំដឹងច្បាស់ថាវាជាអារម្មណ៍បងប្អូន មិនមែនជាស្នេហាប្រុស និង ស្រីនោះទេ។
ខ្ញុំគ្មានអ្នកណានៅក្នុងចិត្តនោះទេ ប៉ុន្តែខ្ញុំមិនចង់យកអារម្មណ៍ផ្សេងមក លាយឡំនឹងស្នេហាឡើយ ដូច្នេះទើបខ្ញុំនៅតែមិនអាចទទួលយកគាត់បាន ព្រោះខ្ញុំខ្លាច ខ្លាចខ្ញុំធ្វើបាបគាត់ ខ្លាចខ្ញុំមិនអាចស្រឡាញ់គាត់ ខ្លាចខ្ញុំធ្វើឲ្យមនុស្សល្អម្នាក់ត្រូវឈឺចាប់ដោយសារខ្ញុំ។
មិនមែនខ្ញុំមិនឈឺចាប់ មិនពិបាកចិត្តនោះទេ ប្រហែលពេលខ្លះខ្ញុំពិបាកជាងគាត់ទៅទៀតគ្រាន់តែគ្មានអ្នកណាដឹង ព្រោះមានតែអ្នកដែលធ្លាប់នៅក្នុងសភាពបែបនេះទេទើបដឹងថាអារម្មណ៍ពេលនេះវាលំបាកយ៉ាងណា។
ខ្ញុំគ្រាន់តែចង់ប្រាប់ពីអារម្មណ៍ខ្ញុំទៅកាន់គាត់ ហើយ ចង់ប្រាប់ថាទោះមានរឿងអីក៏ខ្ញុំមិនគិតថាចង់បោះបង់ទំនាក់ទំនងជាបងប្អូនរបស់ពួកយើងដែរ ដូច្នេះខ្ញុំក៏ចង់ឲ្យគាត់យល់ពីខ្ញុំហើយកុំដោយសារស្នេហាផ្ដាច់ទំនាក់ទំនងដ៏ល្អរបស់យើង។ គាត់នៅទេជា Bro ដ៏ល្អម្នាក់សម្រាប់ខ្ញុំ ហើយ ខ្ញុំក៏ចង់ក្លាយជា Sis ម្នាក់ដែលគាត់ស្រឡាញ់ជាងគេដែរ៕
ពី៖ Sis ម្នាក់
ចុចអាន៖ ៨ ចំណុចដែលមនុស្សប្រុសចាប់អារម្មណ៍លើរាងកាយនារី