ទិញខោអាវអ្នកលក់មិនឲ្យលព្រោះធាត់ពេក ពេលសារភាពស្នេហ៍ត្រូវគេបដិសេធទៀត ប្ដេជ្ញាសម្រកគីឡូទាល់តែបាន

2019-08-19 03:55:00
ចំនួនមតិ 0 | ចំនួនចែករំលែក 0

ដួចគេនិយាយមិនខុសឡើយ នៅលើលោកនេះគ្មានអ្នកណាអាក្រក់ឡើយ គឺគ្រាន់តែយើងមិនទាន់ចេះមើលថែខ្លួនឲ្យដិតដល់ប៉ុណ្ណោះ ដូចករណីរបស់ក្មេងស្រីខាងក្រោមជាដើម។

សួរថាកើតមក មានអ្នកណាចង់ឲ្យខ្លួនអាក្រក់នោះ។ មនុស្សគ្រប់រូបសុទ្ធតែប៉ងឲ្យតែយើងមានសម្រស់ស្រស់ស្អាត ឬយ៉ាងហោចណាស់ក៏ត្រឹមចុះចំណោមនឹងគេដែរ។ ដូចករណីរបស់ក្មេងស្រីមួយរូបមកពីវៀតណាមដែរ ដោយសារតែគីឡូមិនត្រូវនឹងរសនិយមរបស់សង្គមបច្ចុប្បន្ន នាងត្រូវបរាជ័យជាច្រើនរឿងក្នុងជីវិតរបស់នាង។

ជាក់ស្ដែង ក្មេងស្រីឈ្មោះ Yang Huong Ly មកពីខេត្ត Hai Phong ប្រទេសវៀតណាម បានជួបរឿងមិនសប្បាយចិត្តដោយសារតែធាត់ជាងមិត្តរួមជំនាន់របស់ខ្លួន។

តាមនោះដែរ ទោះបីជាកាលពីក្មេង នាងមិនបានធាត់ក៏ដោយ តែស្រាប់តែឈានចូលវ័យជំទង់ នាងស្រាប់តែឡើងគីឡូខ្លាំង។ ទោះបីជាមានរាងទ្រលុកទ្រលន់ក៏ពិតមែន តែនាងក៏មានមនោសញ្ចេតនាដែរ ហើយបានដាក់ចិត្តលើមិត្តរួមថ្នាក់ម្នាក់។ តែដោយសារតែរូបរាងរបស់ខ្លួន មិនត្រឹមតែត្រូវគេបដិសេធនោះទេ គេថែមទាំងយករឿងដែលនាងស្រលាញ់គេមកលេងសើចទៀតផង ដែលធ្វើឲ្យនាងមានរបួសផ្លូវចិត្តជាទម្ងន់។

មិនទាន់ចប់ត្រឹមនោះ នៅពេលដើរផ្សារទិញខោអាវម្ដងៗ អ្នកលក់មិនឲ្យនាងលខោអាវមុនទិញឡើយ ព្រោះពួកគេថា នាងនឹងធ្វើឲ្យខូចរាងខោអាវរបស់គេ។ ដោយសារតែជួបរឿងបែបនេះញឹកពេក ក្មេងស្រីវ័យ១៧ឆ្នាំនេះ បានផ្លាស់ប្ដូរខ្លួនឯង ហើយប្ដេជ្ញាសម្រកទម្ងន់ឲ្យបាន។

ក្រោយរយៈពេលព្យាយាមកន្លះឆ្នាំ ចុងក្រោយនាងក៏ទទួលបានផ្លែផ្កា គឺនាងនៅពេលនេះមានរាងស្ដើង និងទម្រង់មុខពងក្រពើគួរឲ្យស្រលាញ់។ ទោះមិនទាន់ចាប់ចិត្តលើអ្នកណាទៀតក៏ដោយ តែពេលនេះ នៅពេលដើរផ្សារ គឺនាងអាចលខោអាវបានដោយសេរី ដោយមិនខ្លាចធ្វើឲ្យរាងខោអាវគេខូចទៀតឡើយ៕