ឲ្យកូនហូបអាហារ៤មុខនេះដូចធ្វើបាបគេ ព្រោះអាចបាត់បង់ភាពវៃឆ្លាតបាន

2019-08-15 07:20:00
ចំនួនមតិ 0 | ចំនួនចែករំលែក 0

អាហារបួនប្រភេទខាងក្រោម ជះឥទ្ធិពលអាក្រក់ដល់កុមារ អាចកាត់បន្ថយភាពវៃឆ្លាតបាន។ ដូច្នេះអ្នកម្ដាយទាំងឡាយគួរប្រុងប្រយ័ត្នឲ្យបានខ្ពស់ ក្នុងការផ្ដល់ចំណីដល់ពួកគេ។

១. មីតុងយ៉ាំ

កុមារតូចៗចូលចិត្តញ៉ាំមីខ្លាំងណាស់ មិនថាឆុង ឆា នោះទេ។ ប៉ុន្តែនៅក្នុងគ្រឿងផ្សំរបស់មីតុងយ៉ាំ មិនមានសារជាតិបំប៉នច្រើនដល់រាងកាយនោះឡើយ។ គេប្រទះឃើញតែសារធាតុកាបូនអ៊ីដ្រាតប៉ុណ្ណោះ ដោយគ្មានសូម្បីវីតាមីន B គ្លុយកូសនោះទេ។ វាអាចប៉ះពាល់ដល់ប្រព័ន្ធណឺរ៉ូនដែលអភិវឌ្ឍដល់សមត្ថភាពខួរក្បាលរបស់កុមារ។ ដូច្នេះ អ្នកម្ដាយគ្រប់រូបមិនគួរឲ្យកូនបរិភោគមី ឡើយ។

២. ប៊ីចេង

ថ្វីដ្បិតប៊ីចេងអាចបង្កើនរសជាតិក្នុងម្ហូបអាហារ តែសម្រាប់កុមារវាមិនល្អទេ ព្រោះជះឥទ្ធិពលដល់ប្រព័ន្ធបញ្ជូនព័ត៌មានក្នុងប្រព័ន្ធប្រសាទ។ វាថែមទាំងប៉ះពាល់សុខភាពកុមារ ពន្យារភាពលូតលាសផ្នែកប្រាជ្ញា និងបង្កលទ្ធភាពនៃជំងឺមហារីកថែមទៀត។ អ្នកជំនាញជាច្រើនមិនលើកទឹកចិត្តឲ្យកុមារហូបអាហារប្រើប៊ីចេងឡើយ។

៣. អាហារចៀនបំពង

ផ្ដល់ប៉ះពាល់ដល់ការលូតលាសភាពឆ្លាតវៃរបស់កុមារ ធ្វើឲ្យគេចាប់មេរៀនមិនសូវបានពេលសិក្សា។ សារធាតុអាលុយមីញ៉ូមភាគច្រើនរកឃើញនៅក្នុងអាហារចៀនបំពងដូចជា ដំឡូងបំពង មាន់បំពងជាដើម។ ញ៉ាំកាន់តែច្រើន នឹងធ្វើឲ្យមិនសូវមានភាពរហ័សរហូន ស្ទក់ មិនសូវស្វាហាប់ជាដើម។

៤. អាហារមានជាតិប្រៃពេក

ពេលពួកគេហូបអាហារមានជាតិប្រៃពេក ផលប៉ះពាល់ខ្លាំងជាងគេគឺតម្រងនោម។ ហានិភ័យលើសនេះ កម្រិតជាតិប្រៃពេកនៅក្នុងរាងកាយ ជះឥទ្ធិពលដល់សមត្ថភាពយល់ដឹងនិងបណ្ដាលឲ្យខួរក្បាលផ្ចង់មិនបានល្អ ធ្វើឲ្យកុមារឆាប់បាត់បង់បញ្ញាថែមទៀត។

ម្ល៉ោះហើយ អ្នកជំនាញណែនាំថា អ្នកម្ដាយគួរប្រុងប្រយ័ត្នលើប្រភេទអាហារខាងលើ។ ជំនួសមកវិញ គួរផ្ដល់នូវអាហារសម្បូរបន្លែ ត្រី សាច់ ល្ពៅ ប៉េងប៉ោះ ជាដើម៕

ចុចអាន៖ គួរចៀសវាង! អាហារ៣មុខនេះឲ្យកូនតូចញ៉ាំងាយនឹងកើតមហារីកបំផុត

ប្រភព៖ Phunutoday ប្រែសម្រួល៖ លឹម សុនា