គំនិតសេដ្ឋី៖ ម៉ោង ៥:៥៧ ព្រឹក ជាពេលវេលាមាសពេជ្រ អាចនាំអ្នកទៅកាន់ភាពជោគជ័យ
- 2019-08-13 10:20:00
- ចំនួនមតិ 0 | ចំនួនចែករំលែក 0
គំនិតសេដ្ឋី៖ ម៉ោង ៥:៥៧ ព្រឹក ជាពេលវេលាមាសពេជ្រ អាចនាំអ្នកទៅកាន់ភាពជោគជ័យ
មនុស្សជោគជ័យជាច្រើន នៅលើសកលលោក បានកំណត់នាឡិការោទ៍ នៅម៉ោង ៥:៥៧ ដើម្បីភ្ញាក់ឡើងជារៀងរាល់ព្រឹក។ នេះជាវិធីមួយ ដែលអាចជួយឲ្យពួកគេជោគជ័យ។ ការងើបពេលព្រឹកព្រលឹម អាចធ្វើឲ្យខួរក្បាលស្រឡះស្រស់ស្រាយ រាងកាយមានថាមពលពេញមួយថ្ងៃ។ ប្រសិនបើអ្នកមានអារម្មណ៍ល្អ តាំងពីពេលចាប់ផ្តើមថ្ងៃថ្មី នោះការធ្វើកិច្ចការផ្សេងៗ ក៏រលូនទៅមុខតាមហ្នឹងដែរ។
អ្នកត្រូវធ្វើរឿងជាច្រើននៅពេលព្រឹក
សម្រាប់អ្នកចូលធ្វើការ នៅចន្លោះម៉ោងចាប់ពី ៨-៩ ព្រឹក ពួកគេតែងតែចំណាយពេលយ៉ាងហោចណាស់អស់ ២ម៉ោង ដើម្បីធ្វើរឿងផ្ទាល់ខ្លួនមួយចំនួន។ បើនិយាយពីនិចលភាពនៃការដេក ជាធម្មតា អ្នកត្រូវប្រើពេល ២ម៉ោង ទម្រាំអាចស្វាងឡើង បាត់ងងុយ។ ហេតុនេះហើយ ទោះបីជាអ្នកខំទៅងូតទឹក ឬផឹកកាហ្វេ ប៉ុន្តែនៅតែមានអារម្មណ៍ថាល្វើយ មិនស្រឡះក្នុងខ្លួន។ ដើម្បីឲ្យថ្ងៃថ្មីពោរពេញដោយប្រសិទ្ធភាព ត្រូវដាក់នាឡិការោទ៍នៅម៉ោង ៥:៥៧ ព្រឹក។
អាចលើកជាឧទាហរណ៍ល្អ គួរយកគំរូតាម ដូចជាមហាសេដ្ឋី មានលុយច្រើនជាងបង្អស់នៅហុងកុង លោក Li Ka-shing បាននិយាយក្នុងកម្មវិធីសម្ភាសន៍របស់ទូរទស្សន៍មួយ ថា "អស់រយៈពេលជាច្រើនទសវត្សមកហើយ ទោះបីបានចូលគេងលឿនឬយឺតក្តី លោកតែងតែភ្ញាក់ ទៀងពេលគឺនៅម៉ោង ៥:៥៧ ព្រឹក និងបានយល់ច្បាស់ពីតម្លៃរបស់វា។
ចំណែកឯ CEO នៅក្រុមហ៊ុនជ្រើសរើសបុគ្គលិកមួយ ក៏បានបង្ហើបពីអាថ៌កំបាំង ក្នុងនាមជាអ្នកដឹកនាំជោគជ័យមួយរូប។ លោកបានបញ្ជាក់ថា ដើម្បីគ្រប់គ្រងនិងប្រើពេលវេលាប្រកបដោយប្រសិទ្ធភាព គាត់តែងតែភ្ញាក់ឡើង នៅម៉ោង៥:៥៧ ព្រឹក និងបានធ្វើការផ្ញើអ៊ីម៉ែលទៅកាន់កូនចៅក្រោមបង្គាប់ចំនួន២០នាក់ ឲ្យចប់រួចរាល់ជាមុនសិន។ ១៥នាទីក្រោយមក បុគ្គលិកក៏បានតបមកវិញយ៉ាងរហ័សទាន់ចិត្ត។ ភាពម៉ឺងម៉ាត់និងការចេះឲ្យតម្លៃពេលវេលា ធ្វើឲ្យបុគ្គលិកគោរពយកគំរូតាម ហើយវាក៏ជាផ្នែកមួយដែលជួយឲ្យការងារទទួលបានជោគជ័យផងដែរ។
តាមការសិក្សាស្រាវជ្រាវរបស់អ្នកវិទ្យាសាស្រ្តបានបង្ហាញទៀតថា មនុស្សដែលមានទម្លាប់ភ្ញាក់យឺត ភាគច្រើនធ្វើការងារមិនបានចប់សព្វគ្រប់ល្អ ហើយក៏ចាប់ផ្តើមពន្យាររហូតដល់យប់ ប៉ុន្តែមនុស្សដែលភ្ញាក់រហ័ស តែងតែចំណាយពេលធ្វើរឿងចាំបាច់ឲ្យអស់ ដោយមិនទុកចោលនាំរញ៉េរញ៉ៃ។
ពេលព្រឹក ជាពេលវេលាមាសពេជ្រ ដែលអ្នកអាចហ្វឹកហាត់ អភិវឌ្ឍខ្លួនឯង
វាជាពេលវេលា ស្ងៀមស្ងាត់ ពុំសូវមានសំឡេងរំខាន ល្អឥតខ្ចោះ សម្រាប់ឲ្យអ្នកហ្វឹកហាត់ អភិវឌ្ឍខ្លួនឯង។
លោក Paul Polman ដែលជានាយកប្រតិបត្តិរបស់ក្រុមហ៊ុន Unilever ជីវិតរបស់គាត់ពិតជារវល់ខ្លាំងណាស់ ប៉ុន្តែលោកនៅតែ ក្រោកនៅម៉ោង ៦ព្រឹក ដើម្បីរត់នៅបរិវេណការិយាល័យធ្វើការ។ វាក៏ជាពេលមួយ ដែលនាយកក្រុមហ៊ុនរូបនេះ ប្រើសម្រាប់គិតពីកិច្ចការណាដែលបានធ្វើរួច និងរឿងផ្សេងទៀតដែលត្រូវធ្វើបន្ទាប់ ដូចជាដៃគូសហការជាដើម។
លោក Bob Iger ដែលនាយកប្រតិបត្តិរបស់ Disney បានប្រាប់ទៅកាន់ New York Times ថា "ខ្ញុំភ្ញាក់ឡើងនៅម៉ោង៤ ជារៀងរាល់ព្រឹក បន្ទាប់មកខ្ញុំ អានកាសែត ហាត់ប្រាណ ស្តាប់ចម្រៀង ឆែកមើលអ៊ីមែល មើលទូរទស្សន៍រួមទាំងឆ្លៀតពេលធ្វើកិច្ចការជាច្រើនទៀត។"
សរុបមកការក្រោកពីព្រលឹម ពិតជាល្អទាំងសុខភាពផ្លូវកាយនិងផ្លូវចិត្ត ដូច្នេះហើយ អ្នកគួរផ្លាស់ប្តូរទម្លាប់ពីការគេងស្ពឹកទ្រមក់ ទៅជាការងើបរហ័សរហួនដើម្បីធ្វើរឿងមានប្រយោជន៍ផ្សេងៗ។ ដំបូងអាចពិបាកបន្តិចមែន ប៉ុន្តែដើម្បីបានទៅដល់ចំណុចនោះ អ្នកត្រូវចាប់ផ្តើមចូលគេងនិងក្រោក មុន១៥នាទី ខុសពីសព្វដង យូរៗទៅអ្នកនឹងស៊ាំ ហើយអាចក្រោកលឿនជាងមុនជាក់ជាមិនខាន។ អ្នកប្រាកដជាមានឱកាសជោគជ័យច្រើន ដរាបណាអ្នកចូលចិត្តតាមដាន អនុវត្តតាមបុគ្គលជោគជ័យល្អៗ៕
ចុចអានបន្ត៖ ៩ ជំហាននាំអ្នកឲ្យស្គាល់ "ក្តីសុខ" ច្រើនជាងទុក្ខ