រាប់អានតទៀតមិនកើតទេ រកវិធីផ្តាច់ខ្លួនចេញឲ្យហើយពីមិត្តពូកែច្រណែន
- 2019-08-05 10:45:00
- ចំនួនមតិ 0 | ចំនួនចែករំលែក 0
រាប់អានតទៀតមិនកើតទេ រកវិធីផ្តាច់ខ្លួនចេញឲ្យហើយពីមិត្តពូកែច្រណែន
គ្មានទេសត្រូវ ប៉ុន្តែបើមានមិត្តភ័ក្តិពូកែច្រណែន អ្នកអាចនឹងជួបរឿងនឹកស្មានមិនដល់ជាច្រើន។ មានតែការរៀនសង្កេត និងផ្តាច់ខ្លួនចេញឲ្យហើយទេ ទើបមិនគ្រោះថ្នាក់។
វាមិនមែនជារឿងងាយស្រួលទេ ដែលធ្វើជាមិត្តខំរាប់អានគ្នា អស់រយៈពេលច្រើនឆ្នាំហើយ ចុងក្រោយបែរជាខកចិត្ត ដោយសារតែចិត្តច្រណែន។ មិត្តល្អសមតែ ចេះបង្កើនទំនុកចិត្ត ផ្តល់យោបល់ និងលើកទឹកចិត្តដល់អ្នក ប៉ុន្តែគ្រប់យ៉ាងគឺផ្ទុយស្រឡះ។
មិត្តប្រភេទនេះ ពិតជាអាចបង្កហានិភ័យលឿនជាងថ្នាំពុលទៅទៀត។ តើអ្នកដឹងទេថាពួកគេមានលក្ខណៈសម្គាល់បែបណាខ្លះទៅ?
១. និយាយបន្ទាបនូវភាពជោគជ័យឬបំណងប្រាថ្នាដែលអ្នកទទួលបាន
ទោះបីជាអ្នកបានធ្វើរឿងអ្វីមួយលេចធ្លោជោគជ័យ ឬសម្រេចក្តីស្រមៃរបស់ខ្លួនក៏ដោយ គេនៅតែគិតថា ប៉ុណ្ណឹងមានអីអស្ចារ្យ។ មិនចូលរួមសរសើរ តែបែរជាចាំនិយាយបន្ទាប រកចំណុចបង្អាប់ទៅវិញ។
២. គេព្យាយាមប្រកួតប្រជែងជាមួយអ្នក
ប្រសិនបើឃើញអ្នកទិញឡានថ្មី គេច្បាស់ជាទិញស៊េរីណាដែលខ្ពស់ជាងនេះ ហើយព្យាយាមប្រៀបធៀបប្រាក់ខែឬចំណូលដែលរកបាន ក្នុងគោលបំណងចង់បង្អួតប្រាប់។ អ្នកដែលចាត់ទុកមិត្តភាពសំខាន់ គេមិនខ្វល់តែពីការប្រកួតប្រជែងគ្នាទេ។
៣. មិនគាំទ្រនិងមិនចង់ឲ្យអ្នកផ្សេងទៀតចាប់អារម្មណ៍លើអ្នក
នៅពេលអ្នកកើតទុក្ខ ចង់ពឹងពាក់ ឬចង់អញ្ជើញឲ្យចូលរួម ផ្តល់យោបល់អ្វីមួយ ពុំដែលមានវត្តមានឬមិនអាចយកជាការបានឡើយ។ លើសពីនេះតៅទៀត មានតែខិតខំ ដកចំណាប់អារម្មណ៍ ដែលអ្នកដទៃមានចំពោះអ្នក ចេញឲ្យអស់ព្រោះខ្លាចខ្លួនឯងអន់ជាង ថែមទាំងប្រឹងនិយាយលើកពីចំណុចល្អរបស់ខ្លួនទៀតផង។
៤. ទន្ទឹងរង់ចាំមើល ពេលណាមួយដែលអ្នកដើរដួល
ទោះមិនហ៊ានបញ្ចេញមកខាងក្រៅ ប៉ុន្តែគេនៅចាំមើលជានិច្ច រង់ចាំថ្ងៃណាមួយដែលអ្នកដួល ពេលនោះហើយដែលគេអាចលួចញញឹមត្រេកអរក្នុងចិត្ត។ ជួនកាលគេធ្វើឲ្យអ្នកមើលសឹងមិនដឹង ប្រសិនបើមិនបានសង្កេត។
មិត្តប្រភេទនេះ តើគួរធ្វើបែបណាជាមួយគេទៅ?
ជម្រើសមានពីរ៖
ត្រូវចេះទទួលស្គាល់ថា មនុស្សបែបនេះគ្មានថ្ងៃផ្លាស់ប្តូរបានទេ ច្រណែននៅតែច្រណែន ដូច្នេះហើយ បើអ្នកមិនចង់ស្មុគស្មាញជាមួយ អាចសម្រេចចិត្តម្តងទៀតបាន។ គួរឈប់ប្រាប់ពីរឿងរ៉ាវ បញ្ហា ឬភាពជោគជ័យរបស់អ្នកឲ្យគេដឹងដូចមុន។
ដកខ្លួន ឬធ្វើឲ្យមានគម្លាតឆ្ងាយជាងមុន ដូចជាកាត់បន្ថយការទាក់ទងគ្នាតាមទូរស័ព្ទ ឬជួបមុខផ្ទាល់ជាដើម។ មនុស្សអវិជ្ជមានយល់ល្អមិនបាច់ឲ្យពាក់ព័ន្ធក្នុងជីវិតកាន់តែល្អ។ សន្តិភាពផ្លូវចិត្ត គឺសំខាន់ជាងការខំរក្សាទំនាក់ទំនងជាមួយមិត្តក្លែងក្លាយ ឲ្យតែបានល្អមើល។ សុខចិត្តមានមិត្តតិចតែមានគុណភាព៕
ចុចអានបន្ត៖ រូបភាពកម្រ ១០ សន្លឹក បង្ហាញពីទិដ្ឋភាពប្លែកៗរបស់ទារកពេលកើតចេញមក