រូបភាពកម្រ ១០ សន្លឹក បង្ហាញពីទិដ្ឋភាពប្លែកៗរបស់ទារកពេលកើតចេញមក

2019-08-05 06:30:00
ចំនួនមតិ 0 | ចំនួនចែករំលែក 0

នេះជាពេលវេលា ដែលធ្វើឲ្យបរិយាកាសក្នុងគ្រួសារត្រូវផ្លាស់ប្ដូរ ស្របពេលដែលវាក៏ជាឱកាសសម្រាប់អ្នកដើម្បីក្លាយជាអ្នកម៉ាក់មួយរូប រួមទាំងការទទួលស្វាគមន៍សមាជិកថ្មីផងដែរ។ ទារកដែលកើតចេញមកសុទ្ធតែមាន ចំណុចពិសេសផ្សេងៗគ្នា។ យ៉ាងណាមិញ បណ្តុំរូបភាពខាងក្រោមនេះ សុទ្ធសឹងតែជាទិដ្ឋភាពកម្រនិងប្លែកៗ ក្នុងអំឡុងពេលដែលទារកមានវត្តមានលើភពផែនដីដ៏ធំធេង។

១. ទារកកើតមក មានថង់ទឹកភ្លោះរុំជិត

វាគឺជាបាតុភូតកម្រមួយ ដែលទារកកើតចេញមកមានរុំដោយថង់ទឹកភ្លោះជិតឈឹង។ រូបភាពដ៏អស្ចារ្យរបស់ទារកឈ្មោះថា Noah ត្រូវបានថតដោយ អ្នកជំនាញថតរូបជនជាតិប្រេស៊ីលម្នាក់ឈ្មោះ Janaina Oliveira ។ គ្រាន់តែបង្ហោះក្នុងបណ្តាញសង្គមភ្លាម រូបថតមួយសន្លឹកនេះ ទទួលបានការចាប់អារម្មណ៍យ៉ាងខ្លាំង និងមានចំនួនអ្នកចុច like ដល់ទៅជាង ២ពាន់នាក់ មួយរំពេច។ ជាងថតនិងឪពុកម្តាយរបស់ទារក Noah ច្បាស់ជាមិនអាចបំភ្លេចថ្ងៃពិសេសនេះបានទេ។

២. អ្នកម៉ាក់សម្រេចចិត្តបង្កើតកូននៅផ្ទះ ថែមទាំងមានកូនស្រី៥នាក់ទៀតនៅក្បែរខ្លួន

នេះគឺជាពេលវេលាពិសេសខ្លាំងណាស់ សម្រាប់អ្នកម៉ាក់ Casey Teller ដែលបានបង្កើតកូនទី៦ នៅក្នុងផ្ទះតែម្តង។ រូបថតដែលថតដោយ លោក Rebecca បានធ្វើឲ្យពិភពលោកភ្ញាក់ផ្អើល ព្រោះតែនៅជុំវិញខ្លួនស្រ្តីឆ្លងទន្លេ គ្មានឆ្មបឬវេជ្ជបណ្ឌិតឡើយ តែបែរជាមានកូនស្រី៥នាក់ នៅចាំទទួលស្វាគមន៍សមាជិកថ្មីទៅវិញ។

៣. អ្នកម៉ាក់ពិតជារំភើបគ្មានអ្វីប្រៀបផ្ទឹមបាន

រំភើបអស់និយាយហើយ មើលតែទឹកមុខក៏ដឹងដែរ។ អ្នកម៉ាក់ពិតអរខ្លាំងណាស់ ដែលទទួលបានកូនទី៣ ជាកូនប្រុសមិនមែនស្រីដូចមុន។ នេះជាសុភមង្គលមួយ ដែលមិនអាចកាត់ថ្លៃបាន។

៤. អ្នកម៉ាក់ដូចជាភ្លេចពីការឈឺចាប់អស់រលីងបន្ទាប់ពីវះកាត់

មួយសន្លឹកដែលបានថតដោយ ជាងថត Sarah Hill បានបង្ហាញថា អ្នកម៉ាក់ដូចជាភ្លេចពីការឈឺចាប់អស់រលីងហើយ បន្ទាប់ពីឃើញមុខកូន ទោះបីទើបតែវះកាត់ហើយក៏ដោយ។

៥. រូបភាពពណ៌នាពីភាពស្រស់ស្អាតនៃការឆ្លងទន្លេ

អ្នកម្តាយមានស្នាមញញឹមពោរពេញដោយក្តីរីករាយ នៅក្នុងរង្វង់ដៃស្វាមី និងទទួលបានកូនស្រីគួរឲ្យស្រលាញ់មួយរូប។ អំណាចពីធម្មជាតិដែលមនុស្សស្រីមាន គឺការបង្កើតកូន ដូច្នេះហើយ រូបថតដ៏ស្រស់ស្អាតមួយសន្លឹកនេះ មានអ្នកចែកចាយបន្តដល់ទៅជិត ៣៥ម៉ឺនដង បន្ទាប់ពីបង្ហោះរួច។

៦. ទារកទើបនឹងកើតមានទម្ងន់ ដល់ទៅ ៦,៩ គីឡូក្រាម

មុនពេលកើត វេជ្ជបណ្ឌិតបានបញ្ជាក់ដែរថា ទារកក្នុងផ្ទៃ ពិតជាធំខ្លាំងណាស់ ប៉ុន្តែ Joy Buckley ដែលត្រូវជាម្តាយ ពុំនឹកស្មានថា កូនរបស់នាង មានទម្ងន់ដល់ទៅ ៦,៩ គីឡូក្រាមឡើយ ថែមទាំងអាចបំបែកឯកត្តកម្ម ទារកធ្ងន់ជាងគេបង្អស់ ដែលបានកើតក្នុងមន្ទីរពេទ្យ Arnot Ogden នៃទីក្រុងញូវយ៉ក។

៧. គួរឲ្យភ្ញាក់ផ្អើល អ្នកម៉ាក់បានឆ្លងទន្លេនៅមុខច្រកចូលបន្ទប់សម្រាលតែម្តង

ត្រឹមតែប៉ុន្មានជំហានទៀតប៉ុណ្ណោះចូលដល់បន្ទប់វះកាត់ ប៉ុន្តែ Jes Hogan មិនអាចទ្រាំចាំទៀតបាន នាងក៏ឆ្លងទន្លេកូនទី៦ ដែលជាកូនប្រុសដំបូង នៅចំពីមុខច្រកទ្វារចូលតែម្តង។

៨. ប៉ាៗបានបន្លំខ្លួនបំបៅកូនជំនួសឲ្យអ្នកម៉ាក់

ដោយសារតែប្រពន្ធ ត្រូវវះកាត់ហើយស្ថិតក្នុងដំណាក់កាលសង្គ្រោះបន្ទាន់នៅឡើយ ទើបបានជាលោកប៉ា សុខចិត្តបន្លំខ្លួនធ្វើជាអ្នកម៉ាក់មួយគ្រាសិន ដើម្បីបំបៅដោះកូន។ ពេទ្យឆ្មបបានដាក់ក្បាលដោះនៅជាប់ដើមទ្រូងរបស់ប៉ាៗ និងបង្ហូរទឹកដោះចេញពីសឺរ៉ាំង ហើយផ្អឹបទារកជាប់នឹងស្បែកដើម្បីឲ្យទារកបៅ។

៩. ប៉ាៗកំពុងតែផ្តល់ភាពកក់ក្តៅដល់កូន

រូបភាពមួយនេះបង្កប់ដោយក្តីស្រលាញ់និងភាពកក់ក្តៅ។ ឃើញលោកប៉ាកំពុងឱបកូនតែមួយមែន ប៉ុន្តែគាត់ទទួលបានកូនភ្លោះ ២នាក់ឯណោះ។ ពេទ្យឆ្មបក៏បានត្រៀមទឹកដោះរួចរាល់ដើម្បីឲ្យលោកប៉ាបំបៅកូនទាំងពីរផងដែរ។

១០. បន្ទាប់ពីចំណាយពេលអស់រយៈពេល៤ថ្ងៃ ទីបំផុតទារកបានឃើញពិភពលោកហើយ

មើលទៅកាយវិការរបស់ទារកពិតជាសប្បាយណាស់ ក្រោយបានសេរីភាពចេញពីក្នុងផ្ទៃ បន្ទាប់ពីដំណើរការឆ្លងទន្លេ មានរហូតដល់ទៅ៤ថ្ងៃ។ ថ្វីត្បិតតែប្រើពេលយូរបន្តិចមែន ប៉ុន្តែអ្នកម៉ាក់មានអារម្មណ៍រំភើបខ្លាំងក្រៃលែង ដែលបានឃើញកូនប្រុសកើតចេញមក ដោយសុវត្ថិភាព មានសុខភាពល្អ រួមទាំងកាយវិការដ៏អស្ចារ្យទៀតផង៕

ចុចអានបន្ត៖ ចុងសប្ដាហ៍សម្រាប់គ្រួសារពិតជាសំខាន់ មើលរូប Sweet របស់តារាគូនេះហើយ ចាំនាំគ្នាដើរ

ប្រភព៖ afamily ប្រែសម្រួល៖ ដេត ឈុនអ៉ី