លែងខ្លាចកើតទុក្ខហើយ ឲ្យតែចេះវិធីទាំងនេះ អ្នកនឹងសប្បាយចិត្តរាល់ថ្ងៃ
- 2019-08-01 09:00:00
- ចំនួនមតិ 0 | ចំនួនចែករំលែក 0
លែងខ្លាចកើតទុក្ខហើយ ឲ្យតែចេះវិធីទាំងនេះ អ្នកនឹងសប្បាយចិត្តរាល់ថ្ងៃ
សុភមង្គល ភាពសប្បាយរីករាយ ជាអ្វីដែលមនុស្សម្នាក់ៗត្រូវការ គ្មាននរណាចង់ឱបទុក្ខជាប់ខ្លួនឡើយ។ អ្នកខ្លះចេះធ្វើចិត្តឲ្យសប្បាយ ដោយមិនពិបាក ប៉ុន្តែមានមួយភាគផ្សេងទៀត ចាត់ទុកជីវិត ខ្លួនឯង ដិតដាមនឹងភាពឈឺចាប់ ជាប់ស្អិតជាមួយទុក្ខ គ្មានថ្ងៃប្រលែងបាន។ ដល់ពេលត្រូវផ្លាស់ប្ដូរ គំនិតបែបនេះចេញហើយ ព្រោះមានវិធីច្រើនណាស់ដែលអាចនាំឲ្យផ្លូវចិត្តរបស់អ្នកល្អប្រសើរ ជួបតែសេចក្ដីសុខ រីករាយរាល់ថ្ងៃ។
១. មិនពិបាកចិត្តគិតឥតល្ហែ ពេលមានរឿងអ្វីមិនសមតាមបំណង
ពេលធ្វើអ្វីមួយ គួរត្រៀមចិត្តរួចរាល់ ដើម្បីទទួលយកលទ្ធផលដែលបង្ហាញចេញមក។ គ្រប់យ៉ាងមិនអាចដូចគ្នាទាំងស្រុងនឹងអ្វីដែលបានគ្រោងទុកឡើយ។ ទោះវាផ្ទុយស្រឡះពីការរំពឹងទុក្ខក៏ដោយចុះ មិនបាច់កើតទុក្ខ រាល់ថ្ងៃទេ។ រឿងរ៉ាវដែលកន្លងផុតទៅហើយ ចាត់ទុកជាមេរៀន ហើយព្យាយាមរិះរកវិធីកែតម្រូវវិញទើបល្អ។
២. មិនដាក់ខ្នោះខ្លួនឯងជាមួយភាពបរាជ័យ
ជួបបរាជ័យនៅថ្ងៃនេះ មិនមែនមានន័យថា បរាជ័យរហូតឯណា។ គង់តែមានថ្ងៃណាមួយ ជោគជ័យនឹងរត់មករកអ្នក បើអ្នកចេះជម្នះជាមួយបញ្ហា មិនបណ្តោយឲ្យខ្លួនជាប់ខ្នោះជាមួយភាពបរាជ័យអស់មួយជីវិត។ ព្យាយាមបោះជំហានទៅមុខ បើចង់ដល់ត្រើយ។
៣. មិនខ្ជះខ្ជាយពេល ទៅច្រណែនភាពមានបានរបស់អ្នកដទៃ
មនុស្សម្នាក់ៗ សុទ្ធតែចង់មានបានរៀងៗខ្លួន ប៉ុន្តែមានមួយចំនួន ដេកមិនលក់បក់មិនល្ហើយ ពេលឃើញអ្នកដទៃខ្ពស់ជាង។ មិនចូលរួមត្រេកអរ យកគំរូល្អតាមគេហើយ ថែមទាំងយកទុក្ខដាក់ខ្លួនទៀត។ កុំខ្ជះខ្ជាយពេលវេលា ទៅច្រណែននឹងភាពជោគជ័យរបស់គេអី។ គ្មានឡើយពាក្យថា ឈ្នះឬចាញ់ មានតែភាពរីករាយ នឹងទទួលយកការចែករំលែកបទពិសោធន៍ល្អៗ និងព្យាយាមអភិវឌ្ឍខ្លួនឯងឲ្យបានប្រសើរជាងនេះ។
៤. មិនសម្រេចចិត្តលឿនខ្លាំងពេក
ពេលសម្រេចចិត្តទាន់ហន់ភ្លាមៗ ដោយខ្វះការពិចារណា អ្នកអាចនឹងខកចិត្តនាពេលបន្ទាប់។ រឿងល្អៗមានឱកាសនឹងកើតឡើងច្រើន ប្រសិនបើអ្នក ចេះគិតគូល្អិតល្អន់ បើកចិត្តទូលាយ មុនសម្រេចចិត្តលើកិច្ចការអ្វីមួយ។
៥. កុំធ្វើឲ្យជីវិតស្មុគស្មាញខ្លាំងពេក
ពេលខ្លះអ្នកទាមទារចង់ឲ្យគ្រប់យ៉ាងល្អខ្ពស់លើសលប់ក្នុងជីវិត ទើបបានជាពេលបាត់បង់ អ្នកមិនអាចសម្របខ្លួនឬពិបាកបត់បែនទៅតាមស្ថានការណ៍។ ក្តីសុខអាចយកមកបានមិនយ៉ាប់ដូចជាអ្នកគិតឡើយ។ ឲ្យតែមានអារម្មណ៍ល្អ ធ្វើអ្វីសមតាមសមត្ថភាព មិនបង្ខិតបង្ខំដាក់កំហិតខ្លួនឯងឲ្យល្អឥតខ្ចោះខ្លាំងពេក នោះស្នាមញញឹមនឹងកើតមានរាល់ថ្ងៃ។ អ្នកក៏អាចបង្កើតសុភមង្គលដោយខ្លួនឯង និងចែករំលែកទៅកាន់អ្នកដទៃផងដែរ៕
ចុចអានបន្ត៖ វិធីលត់ដំចិត្ត ឲ្យចេះស្កប់ស្កល់ មិនច្រណែនពេលឃើញអ្នកដទៃល្អជាង