ស្រីៗមិនចង់បរាជ័យ ពេលចេញរកស៊ីតូចឬធំក្តី គួរដឹងគន្លឹះសំខាន់ៗ ៥
- 2019-07-26 07:05:00
- ចំនួនមតិ 0 | ចំនួនចែករំលែក 0
ស្រីៗមិនចង់បរាជ័យ ពេលចេញរកស៊ីតូចឬធំក្តី គួរដឹងគន្លឹះសំខាន់ៗ ៥
មុខរបរជំនួញតូចធំ អាចដំណើរការដោយរលូនទៅបាន អាស្រ័យមានយុទ្ធសាស្ត្រ ការរៀបចំ រួមទាំងសកម្មភាព ដើម្បីឆ្ពោះទៅកាន់ភាពជោគជ័យ។ សូម្បីតែជំនួញជោគជ័យល្បីឈ្មោះហើយក៏ដោយ គឺត្រូវទាមទារឲ្យមានគំនិតថ្មីៗ ដើម្បីភាពនឹងននិងភាពរីកចម្រើនទៅមុខបន្ត។
ខាងក្រោមនេះ ជាគន្លឹះសំខាន់ៗ បើអ្នកចង់ជោគជ័យលើមុខជំនួញផ្សេងៗ៖
១. អាចបំពេញតម្រូវការអតិថិជន
ការរកស៊ី សំខាន់បំផុតគឺអាចបំពេញនូវតម្រូវការរបស់អតិថិជន។ មុនចង់គិតលក់ឬផ្តល់សេវាកម្មអ្វីមួយ ត្រូវចោទសំណួរខ្លីថា ហេតុអ្វីចាំបាច់ត្រូវលក់របស់ទាំងនោះ? តើនរណាខ្លះដែលនឹងជាវយកទៅប្រើប្រាស់? បើឆ្លើយសំណួរទាំងនេះបានហើយ មានន័យថា អ្នកត្រៀមខ្លួនរួចរាល់ដើម្បីបម្រើដល់អតិថិជន មិនមែនចេញរកស៊ីឲ្យតែបានៗទេ។
២. តេស្តមើលពីផលិតផល
ផលិតផលដែលអ្នកត្រៀមនឹងលក់ចេញ តើវាអាចប្រកួតប្រជែងជាមួយនឹងទីផ្សារបានដែរទេ? គួរសង្កេតមើលផលិតផលផ្សេងទៀតដែលស្រដៀងគ្នានឹងផលិតផលរបស់អ្នក ថាតើវាមានដំណើរការលើទីផ្សារយ៉ាងណាដែរ?
ដំបូងអ្នកអាចតេស្តសាកល្បង ដាក់លក់នៅលើទីផ្សារជាមុនសិន។ បើមើលឃើញថាវាមានដំណើរការល្អហើយ ចាំវិនិយោគបន្តព្រោះគ្មាននរណាចង់ចំណាយទាំងពេល ទាំងកម្លាំង និងលុយកាក់ហើយខាតឡុងចុងទៀតនោះទេ។
៣. បង្កើតទំនាក់ទំនងល្អជាមួយអតិថិជន
ការរកស៊ី តម្រូវឲ្យមានទំនាក់ទំនងល្អជាមួយអតិថិជន មិនអាចខ្វះបានទេ។ សូម្បីតែអ្នកលក់អនឡាញក៏ដោយ សេវាកម្មនិងការយកចិត្តទុកដាក់ចំពោះអ្នកទិញ គឺជារឿងចាំបាច់ខ្លាំងណាស់។ ក្នុងនាមជាអ្នកលក់ល្អមានគុណធម៌មួយរូប ត្រូវប្រើពាក្យពិតសម្តីសមរម្យ និងសួរនាំពីគុណភាពបន្ទាប់ពីអតិថិជនប្រើហើយ។ កាលណាមានទំនាក់ទំនងល្អហើយទំនិញក៏មានប្រសិទ្ធភាព អ្នកទិញគ្មានថ្ងៃប្រែប្រួលចិត្តឡើយ។
៤. កែលម្អបញ្ហាដែលធ្លាប់កើតមាន
នៅពេលអ្នករកស៊ី អស់រយៈពេលរាប់សប្តាហ៍ រាប់ខែ ឬរហូតដល់រាប់ឆ្នាំ អ្នកច្បាស់ជារកឃើញថាមានបញ្ហាអ្វីខ្លះបានកើតឡើង និងត្រូវការកែលម្អ។
ទោះបីជាបញ្ហាទាំងនោះមិនអាចប៉ះពាល់ទាំងស្រុងដល់ការរកស៊ីរបស់អ្នកក៏ដោយ ប៉ុន្តែមុខជំនួញជោគជ័យ តែងរកដំណោះស្រាយកែលម្អ ឲ្យបានទាន់ពេលវេលា និងល្អប្រសើរ ដើម្បីផ្គាប់ចិត្តអតិថិជន។
៥. ចេះដឹកនាំបុគ្គលិក
ធាតុសំខាន់មួយទៀត ដែលនាំឲ្យមុខរបរជំនួញផ្សេងៗជោគជ័យ មិនមែនត្រឹមតែមានលុយអាចជួលបុគ្គលិកមកប្រើព្រោងព្រាតនោះទេ ប៉ុន្តែត្រូវចេះជួយបង្រៀនណែនាំពួកគេឲ្យបានល្អផង។ ភាគច្រើនថៅកែគិតថា បើបង្រៀនពួកគេឲ្យចេះគ្រប់សព្វពេក ខ្លាចថ្ងៃណាមួយ នឹងក្លាយជាដៃគូប្រកួតប្រជែងរបស់ខ្លួនឯង។ យ៉ាងណាមិញ កុំភ្លេចថា បុគ្គលិកគឺជាផ្នែកសំខាន់មួយ ដែលអាចនាំឲ្យជំនួញរបស់អ្នកជោគជ័យ៕
ចុចអានបន្ត៖ មនុស្សស្រីមាន ៤ចំណុចនេះ គ្មានប្រុសណាហ៊ានក្អក មើលងាយឡើយ