វិធីក្លាយជាម្តាយឪពុកល្អ ចង់ឲ្យកូនប្រឹក្សាពេលមានបញ្ហាមិនលាក់បាំង
- 2019-07-24 03:00:00
- ចំនួនមតិ 0 | ចំនួនចែករំលែក 0
វិធីក្លាយជាម្តាយឪពុកល្អ ចង់ឲ្យកូនប្រឹក្សាពេលមានបញ្ហាមិនលាក់បាំង
មានមូលហេតុជាច្រើនបណ្ដាលឲ្យមនុស្សវ័យជំទង់មិនបានទទួលដំបូន្មានល្អៗពីឪពុកម្ដាយរបស់ខ្លួន។ តើមូលហេតុអ្វីទើបពួកគេមិនបានទទួលដំបូន្មានឬការប្រឹក្សាពីឪពុកម្ដាយ?
ពេទ្យជំនាញផ្នែកកុមារនៅមន្ទីរពេទ្យបាងកក ប្រទេសថៃបានណែនាំថា សង្គមបច្ចុប្បន្នផ្លាស់ផ្ដូរច្រើន ខុសឆ្ងាយពីសង្គមរបស់ឪពុកម្ដាយពីមុន។ កូនៗទាំងកុមារនិងវ័យជំទង់របស់លោកអ្នកមានឱកាសប្រឈមនឹងបញ្ហាច្រើនយ៉ាង។ បើសិនលោកអ្នកជាឪពុកម្ដាយមិនបានផ្ដល់ការពិគ្រោះយោបល់កូនឲ្យបានល្អនិងត្រឹមត្រូវនោះទេ តើអ្នកគិតថាពួកគាត់នឹងទៅរកអ្នកណា?
-ឪពុកម្ដាយមិនមានពេលវេលាគ្រប់គ្រាន់ ទើបបានតែបារម្ភកូនពីចម្ងាយ ហើយនៅពេលកូននៅធម្មតាទើបគិតថាប្រហែលមិនមានបញ្ហាអ្វីកើតឡើង មិនបានជួបជជែកជាមួយកូនរឿងបញ្ហាជីវិត
-ឪពុកម្ដាយចង់ណែនាំកូន តែកូនមិនចង់ស្ដាប់
-ជារឿងរសើប(Sensitive) ដូចជាការរួមភេទ បញ្ហាគ្រឿងញៀន ឯឪពុកម្ដាយក៏មិនមានវិធីនិយាយជាមួយកូន មិនដឹងថានិយាយបែបណាល្អ ខ្លាចរឿងកាន់តែធំទើបសុខចិត្តមិននិយាយល្អជាង
ជាទូទៅវ័យជំទង់ទុកចិត្តមិត្តភក្តិជាង ហើយច្រើនសុំជំនួយប្រឹក្សាយោបល់ពីមិត្តរបស់ពួកគេ ដែលមិត្តភក្តិទាំងនោះអាចនឹងមានបទពិសោធន៍ជីវិតតិចតួចមិនខុសពីកូនៗរបស់លោកអ្នកទេ។ ក្រៅពីនេះវ័យជំទង់ប្រើប្រាស់ Google ដើម្បីស្វែងរកដំណោះស្រាយដែលជារឿងពេញនិយមសម្រាប់ក្រុមមនុស្សដែលកើតមកជាមួយនឹងប្រព័ន្ធឌីជីថល។
ដូច្នេះហើយទើបឪពុកម្ដាយគួរត្រៀមខ្លួនជាទីបង្អែករបស់កូន នៅពេលកូនដឹងថាមានឪពុកម្ដាយចាំស្ដាប់រឿងរ៉ាវពិបាកចិត្តរបស់កូន កូនក៏ចង់និយាយប្រឹក្សាយោបល់ជាមួយឪពុកម្ដាយខ្លួនច្រើនជាងដែរ។
នេះជាតិចនិកអាចជួយលោកអ្នកជាអាណាព្យាបាលយកទៅប្រើ ដើម្បីធ្វើជាអ្នកប្រឹក្សាដ៏ល្អរបស់កូនៗបាន៖
-កុំប្រើវិធីនិយាយជាមួយកូនវ័យជំទង់ដូចជាកូនតូច មិនគួរប្រាប់ ឬ បញ្ជាឲ្យកូនធ្វើតាមដោយមិនស្ដាប់ការយល់ឃើញរបស់កូនទេ
-ពេលកូនចង់និយាយអ្វីប្រាប់ ឪពុកម្ដាយគួរតាំងចិត្តស្ដាប់ ដើម្បីស្វែងយល់ពីបញ្ហាទាំងនោះ ការយល់ឃើញនិងតម្រូវការរបស់កូនបាន។ ពេលខ្លះកូនៗអាចគ្រាន់តែចង់រំសាយទុក្ខលំបាក ហើយពេលខ្លះគាត់អាចចង់បានដំណោះស្រាយឬការប្រឹក្សាពីលោកអ្នក។ លោកអ្នកគួរស្ដាប់កូនៗឲ្យចប់ទើបដឹងថាកូនៗលោកអ្នកចង់បានជំនួយបែបណាពីឪពុកម្ដាយខ្លួន។
-កុំប្រញាប់សរុបរឿងរ៉ាវដែលកូនចង់ប្រឹក្សា បើសិនលោកអ្នកមិនទាន់យល់ប្រភពបញ្ហាទាំងមូល។ បើសិនលោកអ្នកមិនទាន់យល់ច្បាស់ គួរសួរកូនៗបន្ថែម កុំប្រញាប់សន្និដ្ឋានគ្រប់យ៉ាងដោយខ្លួនឯងហើយឲ្យការប្រឹក្សាដែលមិនគ្រប់ជ្រុងជ្រោយ។
-ព្យាយាមស្វែងយល់ពីសង្គមរបស់កូន ស្វែងយល់ពីភាពវ័យជំទង់របស់កូនផង។ ពេលខ្លះលោកអ្នកអាចដឹងថាមានទង្វើខ្លះដែលឪពុកម្ដាយមិនចូលចិត្ត តែក៏ជាអ្វីដែលលោកអ្នកធ្លាប់ជួបធ្លាប់ធ្វើដូចគ្នាពេលវ័យជំទង់ផងក៏ថាបាន។ បើសិនឪពុកម្ដាយមិនបានជីកឬសជីកគល់ជាមួយកូនគ្រប់រឿងគ្រប់យ៉ាង នោះលោកអ្នកនឹងនៅមានពេលវេលាសម្រាប់រឿងឬបញ្ហាដែលសំខាន់ពិតប្រាកដមិនខាន។
-ស្វែងរកឱកាសបង្រៀនកូនៗពីបំនិនជីវិត(Life Skill)សំខាន់ៗដូចជាការចេះបដិសេធ រឿងផ្លូវភេទ ជាដើម។ លោកអ្នកអាចសាកល្បងសួរកូនៗថា បើសិនមានហេតុការណ៍បែបនេះកើតឡើង កូនគិតយ៉ាងណាហើយនឹងដោះស្រាយយ៉ាងម៉េច? វិធីសាស្រ្តនិងតិចនិកនិយាយជាមួយកូនពិតជាសំខាន់ខ្លាំងណាស់ សូមកុំប្រើការសួរដេញដោលចាប់កំហុសដែលអាចធ្វើឲ្យកូនមានអារម្មណ៍តានតឹងនៅពេលនិយាយជាមួយឪពុកម្ដាយខ្លួនម្ដងៗ។
បើសិនឪពុកម្ដាយគ្រប់រូបមានទំនាក់ទំនងល្អជាមួយកូនវ័យជំទង់ កូនៗក៏មិនទៅរកអ្នកណាឆ្ងាយពីឪពុកម្ដាយខ្លួនដែរ។ ដូចនេះលោកអ្នកគួរមានពេលវេលាសម្រាប់កូននិងក្រុមគ្រួសារឲ្យបានច្រើន នោះជីវិតវ័យជំទង់របស់ពួកគាត់និងពោរពេញដោយក្ដីស្រឡាញ់ពីឪពុកម្ដាយ៕
ចុចអាន៖ ម្តាយឆ្លាតគួរប្រើវិធីទាំងនេះ បើចង់ឲ្យកូនចេះនិយាយសុំទោសដោយសុជីវធម៌