ទម្លាប់ធ្វើរឿងសាមញ្ញទាំងនេះ អ្នកគ្មានថ្ងៃធុញនឹងការងារទេ

2019-07-16 04:35:00
ចំនួនមតិ 0 | ចំនួនចែករំលែក 0

អ្នកចំណាយពេល៩០% នៃជីវិតទៅលើការងារ ដែលជាពេលច្រើនបំផុត។ ដូច្នេះបើអ្នកប្រើអារម្មណ៍មិនបានល្អអំឡុងបំពេញការងារទេ អ្នកនឹងជួបរឿងមិនសប្បាយចិត្ត។ ម្ល៉ោះហើយ អ្នកត្រូវមានការគិតវិជ្ជមាន ដើម្បីការងារបានប្រសើរផង ជីវិតអ្នកផ្ទាល់ក៏សប្បាយរីករាយថែមទៀត។

១. រៀបចំថ្ងៃរបស់អ្នកឲ្យមានតុល្យភាព

ម៉ោងធ្វើការគឺធ្វើការ តែម៉ោងសម្រាកគឺសម្រាក អ្នកមិនគួរបូកបល់លាយឡំគ្នាទេ។ ថ្ងៃចុងសប្ដាហ៍បើទំនេរ ក៏បបួលមិត្តភ័ក្ដិឬក្រុមគ្រួសារទៅលំហែកម្សាន្តដើម្បីឲ្យជីវិតបានស្គាល់ពិភពខាងក្រៅ និងទទួលបទពិសោធន៍ថ្មីៗ។ កុំងប់ងល់តែការងារពេក ហើយក៏កុំងប់ងុលតែរឿងដើរលេងសប្បាយ តែត្រូវធ្វើឲ្យវាមានតុល្យភាព ទើបអ្នកមិនស្មុគស្មាញ។

២. តម្រង់ទិសដៅការងារជាមួយអនាគត

ធ្វើការដែលយើងអត់ចូលចិត្ត នឹងធ្វើឲ្យយើងធុញទ្រាន់។ ដូច្នេះបើអ្នកចង់ផ្លាស់ប្តូរទៅធ្វើអ្វីដែលអ្នកស្រលាញ់ អ្នកត្រូវតម្រង់គោលដៅឲ្យច្បាស់លាស់ ហើយច្បាមឱកាសរកការងារដែលអ្នកស្រលាញ់នោះមកធ្វើឲ្យបាន។ យកការងារធ្វើជាគោលដៅសម្រាប់ជីវិតផ្ទាល់ខ្លួន នោះអ្នកនឹងទទួលបានអនាគតល្អ ហើយសប្បាយចិត្តនឹងធ្វើវា។

៣. កុំខ្ជះខ្ជាយពេលវេលា

ឆ្លៀតរៀនអ្វីដែលថ្មីៗ ដើម្បីជំរុញជីវិតការងារអ្នកឲ្យកាន់តែប្រសើរ។ កុំធ្វើការច្រើនឆ្នាំ តែអ្វីដែលអ្នកចេះនៅដដែលៗ គួរចេះស្វែងរកជំនាញនិងបំនិនថ្មី ឲ្យសមនឹងរយៈ ពេលយូរឆ្នាំដែលអ្នកធ្វើការ។

៤. បង្កើតទំនាក់ទំនង

ជជែកលេងជាមួយមិត្តរួមការងារដូចជាពេលសម្រាក ឬញ៉ាំអាហារថ្ងៃត្រង់ជាដើម នឹងធ្វើឲ្យអ្នកមានអារម្មណ៍ល្អនៅកន្លែងការងារ។ បង្កើតភាពជិតស្និទ្ធជាមួយមនុស្សជុំវិញមិនថាក្នុងក្រុមការងារ ឬអ្នកផ្សេងៗ សូម្បីតែថ្នាក់លើផងដែរ។

៥. លំហែ

មិនត្រឹមជួយឲ្យក្បាលអ្នកបាត់ស្រេ្តសទេ ប៉ុន្តែវាក៏ល្អសម្រាប់សុខភាពអ្នកផងដែរ និងថែមទាំងធ្វើឲ្យអ្នកចេះគ្រប់គ្រងអារម្មណ៍បានល្អទៀតផង។ អ្នកអាចចំណាយពេលដើរ១០នាទីពេលចេញពីធ្វើការ ដើម្បីបង្កើនថាមពលផ្លូវចិត្តសម្រាប់ខ្លួនឯងឲ្យល្អបំផុត។

៦. ស្ដាប់ពាក្យរិះគន់ហើយពិចារណា

កុំខ្លាចក្នុងការទទួលពាក្យរិះគន់ ព្រោះនឹងជួយស្ថាបនាអ្នកឲ្យលូតលាស់ជាងមុន។ ទោះបីពាក្យរិះគន់នោះត្រឹម២ម៉ាត់ក៏ដោយ ក៏ជួយឲ្យអ្នកដឹងពីចំណុចខ្វះខាតរបស់ខ្លួនបានដែរ។ វាប្រៀបដូចកញ្ចក់ជួយឆ្លុះបញ្ចាំងពីខ្លួនឯងបាន។

៧. ចេះជួយអាសារ

វានឹងបង្ហាញពីការគោរព និងសន្តានចិត្តរបស់អ្នកជាមួយមិត្តរួមការងារ។ លើសពីនេះ ក៏ធ្វើឲ្យអ្នកមានអារម្មណ៍ល្អ ឃើញពិភពលោកនេះក្នុងផ្លូវវិជ្ជមាន។ អ្នកអាចជួយអ្វីដែលអ្នកអាចធ្វើបាន ដែលជាការជួយគ្នាទៅវិញទៅមក។

៨. មុនចូលគេង កុំភ្លេចគិតពីសមិទ្ធផលថ្ងៃនេះ

មធ្យោបាយល្អបំផុតជួយឲ្យអ្នកជោគជ័យក្នុងជីវិត គឺអ្នកគួរមានទម្លាប់គិតពីសមិទ្ធផលដែលបានធ្វើនៅថ្ងៃនេះ និងមនុស្សល្អៗដែលបានជួយជ្រោមជ្រែងអ្នក។ វានឹងជំរុញអ្នកឲ្យមានស្មារតីភ្លឺស្វាង ចងចាំល្អ និងខំប្រឹងផលិតភាពលើការងារបន្ថែមទៀត។ វានឹងកើតឡើងនៅក្នុងចិត្តរបស់អ្នកជារៀងរាល់ថ្ងៃ ដោយវិជ្ជមាននិងសប្បាយរីករាយ មិនសូវគិតអ្វីអាក្រក់ៗច្រើននោះទេ។

ចុចអាន៖ បើជីវិតអ្នកកំពុងតែក្រឡាប់ចាក់ គួរធ្វើរឿង ៥ យ៉ាងនេះ

ប្រភព៖ Careergirldaily ប្រែសម្រួល៖ លឹម សុនា