ជួលបន្ទប់តម្លៃថោកគួរឲ្យខ្លាចដូចផ្ទះខ្មោច និស្សិតស្រីច្នៃឡើងស្អាតជាងសណ្ឋគារ

2019-07-16 03:00:00
ចំនួនមតិ 0 | ចំនួនចែករំលែក 0

ជាមួយទឹកដៃដ៏ម៉ត់ចត់គួបផ្សំនឹងគំនិតច្នៃប្រឌិតដ៏ខ្ពស់ និស្សិតស្រីវ័យក្មេងម្នាក់ បានប្រែក្លាយបន្ទប់ជួលដ៏គួរឲ្យខ្លាចរបស់ខ្លួន ក្លាយជាបន្ទប់ដ៏គួរឲ្យស្នាក់នៅភ្លាមៗ។

សម្រាប់និស្សិតដែលឡើងមករៀននៅទីក្រុង ជម្រើសស្នាក់នៅមិនមានច្រើនឡើយ។ ប្រសិនបើមានបងប្អូននៅក្រុង គឺអាចសុំស្នាក់នៅអាស្រ័យបាន។ យ៉ាងណាក៏មិនស្រណុកចិត្តដែរ ព្រោះជាផ្ទះគេ មិនមែនផ្ទះយើង។ រីឯជម្រើសមួយទៀតនោះគឺ ជួលបន្ទប់ជួលនៅក្រៅ។

សម្រាប់ជម្រើសទី២ និស្សិតទាំងស្រី ទាំងប្រុស តែងរកបន្ទប់ដែលមានតម្លៃទាប ត្បិតជីវិតនិស្សិតមិនមានប្រាក់កាសច្រើនឡើយ។ ទន្ទឹមនឹងបន្ទប់តម្លៃទាប គឺមិនមានសភាពស្អាត ឬផាសុកភាពឡើយ ពោលគឺតែងនៅឆ្ងាយ ឬបន្ទប់មានវ័យចំណាស់ជាដើម។

ជាក់ស្ដែង និស្សិតស្រីម្នាក់មកពីខេត្ត Heilong Jiang បានឡើងពីស្រុកកំណើតមកទីក្រុងដើម្បីបន្តការសិក្សារបស់ខ្លួន ដោយជួលបន្ទប់តម្លៃប្រមាណ៧០ដុល្លារ ជាមួយតែទំហំតែ១០ម ការ៉េប៉ុណ្ណោះ។ នាងបានឲ្យដឹងថា ពេលដើរចូលភ្លាម នាងមិនហ៊ាននៅយូរឡើយ ព្រោះបន្ទប់ងងឹត ធ្វើឲ្យនាងខ្លាចខ្មោច តែបើរកបន្ទប់ផ្សេងគឺថ្លៃ ដូចនេះនាងក៏សម្រេចថាយកបន្ទប់នេះ។

ដោយសារតែទេពកោសល្យផ្នែកគំនូរស្រាប់នោះ និស្សិតស្រីរូបនេះ បានប្រែបន្ទប់ដ៏គួរឲ្យខ្លាចនេះ ឲ្យក្លាយជាបន្ទប់ថ្មីសន្លាងមួយផ្សេងទៀត ក្នុងរយៈពេលតែ១សប្ដាហ៍។ សូម្បីតែម្ចាសប់បន្ទប់ ក៏ភ្ញាក់ផ្អើលដែរ ពេលឃើញដូចនេះ។ នារីនេះបន្ថែមថា ថ្លៃកែច្នៃបន្ទប់នេះសរុបអស់ត្រឹមប្រមាណ៣០០ដុល្លារប៉ុណ្ណោះ ហើយនាងគិតថាចំនួននេះមិនច្រើនឡើង បើនាងរៀន ហើយស្នាក់នៅទីនេះ៤ឆ្នាំនោះ៕