បើមិនអាចស្រលាញ់ទេ ចាំបាច់ធ្វើឲ្យខ្ញុំយល់ច្រលំធ្វើអី?

2019-07-15 10:05:00
ចំនួនមតិ 0 | ចំនួនចែករំលែក 0

ខ្ញុំ គឺជានិស្សិតស្រីម្នាក់ ដែលតែងតែខិតខំរៀនណាស់ ហើយខ្ញុំក៏មិនដែលគិតថាចង់មានស្នេហា ពេលដែលខ្ញុំកំពុងតែរៀនឆ្នាំទី ១ នៅមហាវិទ្យាល័យដែរ។ អ្វីដែលខ្ញុំចង់បានពេលនេះ គឺចង់រៀនឲ្យពូកែ ហើយទទួលបានអាហាររូបករណ៍ទៅរៀនបន្ត នៅអាមេរិក។ ប៉ុន្តែការតាំងចិត្តរបស់ខ្ញុំ ត្រូវបានរលាយ នៅពេលដែលបុរសម្នាក់នោះ បានចូលមកក្នុងជីវិតរបស់ខ្ញុំ។

ថ្ងៃមួយ នៅបណ្ណាល័យ ពេលខ្ញុំកំពុងអានសៀវភៅ គេសម្លឹងមើលមុខខ្ញុំរហូត ហើយតាមមើលខ្ញុំ រហូតដល់ខ្ញុំចេញពីបណ្ណាល័យនោះ។ ខ្ញុំមានអារម្មណ៍ថាភ័យខ្លាចដែរ ព្រោះខ្ញុំមិនដែលស្គាល់គេសោះ។ ហើយថ្ងៃបន្ទាប់មកទៀត គេក៏បានសួរនាំខ្ញុំខ្លះៗ។ ពេលនោះហើយទើបខ្ញុំដឹងថា គេគឺជាសិស្សច្បងរបស់ខ្ញុំ។ គាត់ថា ចង់ស្វែងយល់ពីសិស្សប្អូនខ្លះៗ ដើម្បីបំពេញនិក្ខេបបទសម្រាប់ការស្រាវជ្រាវរបស់គាត់។

តាំងពីពេលនោះមក ពួកយើងក៏តែងតែជួបគ្នា ដើម្បីធ្វើការងារសាលា។ ខ្ញុំជារឿយៗ គឺត្រូវការជំនួយពីគាត់ ព្រោះថាគាត់មានចិត្តល្អ ហើយពូកែទៀត។ យ៉ាងណាក៏ដោយ ខ្ញុំមិនដែលគិតថាស្រលាញ់គាត់នោះទេ។

ប៉ុន្តែចិត្តរបស់ខ្ញុំ ស្រាប់តែបានប្រែប្រួល នៅពេលដែលគាត់ចេះតែធ្វើល្អដាក់ខ្ញុំ ហើយគាត់យកចិត្តទុកដាក់ជាមួយខ្ញុំខុសពីជាមួយសិស្សប្អូនស្រី ដទៃទៀត។ រាល់ថ្ងៃ គាត់តែងជូនខ្ញុំទៅផ្ទះ ទិញការ៉ែមឲ្យខ្ញុំញុំា ហើយជូនខ្ញុំទៅកន្លែងប្លែកៗ ធ្វើឲ្យខ្ញុំមានអារម្មណ៍រំភើបចិត្តជាខ្លាំង។

គាត់បញ្ចេញអាការៈធ្វើដូចជាសង្សាររបស់ខ្ញុំអីចឹង។ គាត់ហួងហែង ពេលមានប្រុសណាម្នាក់មកស្និទ្ធស្នាលជាមួយខ្ញុំ។ គាត់តែងតែប្រាប់រឿងសម្ងាត់របស់គាត់ដល់ខ្ញុំមុនគេ។ ពេលដែលខ្ញុំប្រាប់គាត់ថា «បង! គឺជាមនុស្សពិសេសម្នាក់ ដែលធ្វើឲ្យខ្ញុំសប្បាយចិត្តណាស់ ពេលបាននៅជាមួយបង។» ពេលនោះ គាត់ក៏ឱប ហើយថើបក្បាលខ្ញុំ រួចញញឹម និងនិយាយថា ៖ «អូនក៏ជាមនុស្សស្រីម្នាក់ ដែលមានលក្ខណៈពិសេសជាងស្រីដទៃ ដែលបងបានស្គាល់ដែរ។ អូនរឹងមាំ ហើយគួរឲ្យស្រលាញ់ជាងគេ។»

ទង្វើរបស់គាត់យូរៗទៅ ធ្វើឲ្យខ្ញុំគិតថា គាត់ប្រាកដជាស្រលាញ់ខ្ញុំខ្លាំងណាស់។ ដូច្នេះ ថ្ងៃមួយ ខ្ញុំក៏ណាត់ជួបគាត់ ដោយតែងខ្លួនយ៉ាងស្អាត។ ខ្ញុំណាត់គាត់ទៅញុំាអី ហើយនិយាយប្រាប់ពីអារម្មណ៍ពិតរបស់ខ្ញុំ ចំពោះគាត់។ ខ្ញុំប្រាប់គាត់ថា ខ្ញុំស្រលាញ់គាត់ខ្លាំងណាស់ ហើយសួរគាត់ថា តើពួកយើងអាចបង្ហាញប្រាប់គេបាន ឬ នៅថាយើងជាសង្សារនឹងគ្នា?

ប៉ុន្តែអ្វីៗ គឺខុសពីការគិតទាំងស្រុង! គាត់តបដោយមុខស្ងួតមកខ្ញុំថា តាំងពីដើមមកគាត់មិនដែលគិតចង់បានខ្ញុំជាសង្សារនោះទេ ព្រោះគាត់មិនអាចស្រលាញ់ស្រីណាម្នាក់បាន នៅពេលនេះឡើយ។ គាត់គ្រាន់តែចង់រៀនឲ្យពូកែ ហើយមានការងារធ្វើឲ្យបានល្អ នៅថ្ងៃមុខតែប៉ុណ្ណោះ។ គាត់ប្រាប់ខ្ញុំឲ្យកាត់ចិត្ត ហើយដើរចេញពីខ្ញុំរហូត។

តាំងពីពេលនោះមក ខ្ញុំដូចជាមនុស្សគ្មានវិញ្ញាណ ហើយគាត់ក៏លែងយកចិត្តទុកដាក់ជាមួយខ្ញុំ ដូចពីមុនទៀតដែរ។ ពេលគាត់ឃើញខ្ញុំ គាត់ក៏ចេះតែគេចវេស ធ្វើឲ្យខ្ញុំកាន់តែរអៀសខ្លួន ហើយមានអារម្មណ៍ថា ហេតុអ្វីបានជាមនុស្សប្រុសម្នាក់នោះ គ្រាន់តែចូលមកជីវិតខ្ញុំ ដើម្បីបោកបញ្ឆោតសេ្នហាខ្ញុំប៉ុណ្ណោះ។ ហើយហេតុអ្វីគេចាំបាច់ខឹង ពេលខ្ញុំចាប់ផ្តើមស្រលាញ់គេ? ហើយបើគេមិនអាចស្រលាញ់ខ្ញុំបានទេ មកស្និទ្ធស្នាលជាមួយខ្ញុំធ្វើអ្វី? ធ្វើឲ្យខ្ញុំយល់ច្រលំ ចំពោះស្នេហានេះធ្វើអី?

ចុចអាន៖ សុខចិត្តឈឺចាប់ដោយការពិត ជាជាងលួងលោមចិត្តដោយការបោកប្រាស់

អត្ថបទ៖ ផល សុខភារី