អារម្មណ៍ដែលយល់ច្រឡំម្នាក់ឯង
- 2019-07-08 09:10:00
- ចំនួនមតិ 0 | ចំនួនចែករំលែក 0
អារម្មណ៍ដែលយល់ច្រឡំម្នាក់ឯង
លង់ស្រលាញ់គេម្នាក់ឯងខុសមួយទៅហើយ កាន់តែខុសខ្លាំងទៀតនោះនៅឆ្លៀតគិតថាគេមានចិត្តលួចស្រលាញ់យើងវិញដែរ ទាំងការពិតគេគ្មានដឹងអីសោះ។
ឃើញគេធ្វើល្អ យកចិត្តតែបន្តិចមនុស្សស្រី ច្រើនតែគេចមិនផុតពីធ្លាក់ក្នុងអន្លង់ស្នេហ៍គេ ។ ដេកដើរគិតម្នាក់ឯងថា គេប្រហែលមានចិត្តលើយើងវិញទេដឹង បើមិនអ៊ីចឹងមិនមែនគេមកធ្វើល្អដាក់យើងដល់ម្លឹងនោះទេ។ ពីមួយថ្ងៃទៅមួយថ្ងៃកាន់តែលង់លើគេដកចិត្តមិនរួច ចង់ឃើញមុខគេ នឹកគេកាន់តែខ្លាំង។ ថ្ងៃដែលមិនបានជួបគេ ពិភពលោកប្រែជាស្ងាត់ ខ្មៅស្រអាប់យ៉ាងចម្លែក។ ស្រលាញ់គេម្នាក់ឯងពិបាកណាស់ ព្រោះមិនដឹងចិត្តគេយ៉ាងណា។ យើងចេះតែផ្ដល់សង្ឃឹមឲ្យខ្លួនឯងថា គេលួចស្រលាញ់យើងដែរ ហើយចាំថ្ងៃគេសារភាព ចាំថ្ងៃយើងក្លាយជាសង្សារនឹងគ្នា ហើយលួចសើចម្នាក់ឯងពេលនឹកឃើញដល់រឿងនេះ។ យូរទៅៗ ដូចមានញាណមកប្រាប់ថា ល្មមភ្ញាក់ពីសុបិនហើយព្រោះគ្រប់យ៉ាងគេអត់បានស្រលាញ់យើងទេ ។ គេគ្រាន់មានអារម្មណ៍ល្អជាមួយយើង ហើយគេក៏ធ្វើល្អដាក់មនុស្សគ្រប់់គ្នាតែអ៊ីចឹងដែរហ្នឹង។
ពេលដល់ចំណុចនេះ ឈឺចាប់ខ្លាំងបន្តិចព្រោះការទទួលស្គាល់ការពិតថាមនុស្សយើង Crush គេអត់ដែលគិតអីចំពោះយើងពិសេសដូចយើងទេ។ គេចាត់ទុកយើងដូចមិត្តភក្កិធម្មតាប៉ុណ្ណោះ។ ពេលខ្លះយើងស្អប់ខ្លួនឯង ខឹងគេ ហេតុអ្វីធ្វើឲ្យយើងយល់ច្រឡំ? បើមិនស្រលាញ់ហេតុអ្វីមកធ្វើល្អ ឲ្យយើងគិតម្នាក់ឯងបែបនេះ? យើងចាប់ផ្តើមស្តីបន្ទោសខ្លួនឯង ចាប់ផ្តើមចង់នៅឆ្ងាយពីគេ ចាប់ផ្តើមលែងចង់ជួបមុខគេ ទាំងចិត្តនេះនឹកគេស្ទើរដាច់ខ្យល់។ គិតកាន់តែខ្លាំង កាន់តែវិលវល់ ព្រោះបើបន្ទោសគេក៏មិនត្រូវ ជួបមុខគេហើយឈប់និយាយរកក៏មិនសម ព្រោះគេអត់មានខុសអីផង យើងតើគិតម្នាក់ឯង។
យល់ច្រឡំម្នាក់ឯងជាអារម្មណ៍ធ្វើបាបផ្លូវចិត្តខ្លាំងជាងគេបំផុត ព្រោះពេលផ្ដើមងាយស្រួលតែពេលបញ្ចប់ មិនដឹងគួរចប់ដោយរបៀបណា។ យ៉ាងណា ក្តីស្រលាញ់ចំពោះមនុស្សម្នាក់មិនខុសទេ ។ ស្នេហ៍មួយនេះហោចណាស់ ក៏ធ្វើឲ្យយើងយល់និងបានទទួលមេរៀនមួយ ថ្ងៃក្រោយកុំឆាប់គិតអីផ្ដេសផ្ដាសម្នាក់ឯង កុំគ្រាន់គេធ្វើល្អដាក់បន្តិចក៏តាំងគិតថានេះជាស្នេហា រហូតធ្វើឲ្យឈឺចាប់ដល់ថ្នាក់នេះ។ ជូនពរខ្លួនឯងឲ្យឆាប់ជួបមនុស្សដែលគេធ្វើល្អដាក់យើងមែន ហើយស្រលាញ់យើងមែនទែន កុំឲ្យគិតខុសម្នាក់ឯងទៀត៕
ចុចអាន៖ វិធីកាត់ចិត្តបើដឹងថាយើងមិនអាចបានបេះដូងបុរសម្នាក់នោះ