កូនចង់សិក្សា មិនខ្លាចសាលាតាំងពីថ្ងៃចូលរៀនដំបូង អ្នកម្តាយឆ្លាតគួរអនុវត្តវិធីនេះ

2019-07-05 05:00:00
ចំនួនមតិ 0 | ចំនួនចែករំលែក 0

សម្រាប់កូនតូចពេលចូលរៀនថ្ងៃដំបូង អាចជារឿងឈឺក្បាលចំពោះឪពុកម្ដាយ ដោយសារពួកគេមិនទាន់ស៊ាំនឹងមជ្ឈដ្ឋានថ្មី រួមទាំងគ្រូនិងមិត្តរួមថ្នាក់។ ម្ល៉ោះហើយ អ្នកម្ដាយឆ្លាតវៃទាំងអស់គួរត្រៀមតិចនិកទាំង១០នេះ ដើម្បីកុំឲ្យដល់ពេលកូនចូលរៀន ធ្វើឲ្យគេយំ ខ្លាចសាលា។

១. បង្រៀនកូនពីរបៀបរបបនៅសាលា

ឪពុកម្ដាយគួរដឹងពីកម្មវិធីសាលារបស់កូនរៀនឲ្យបានច្បាស់លាស់។ អ្នកគួរចំណាយពេលជជែកលេងជាមួយកូនរាល់ថ្ងៃ ហើយសួរគេអំពីសកម្មភាពពាក់ព័ន្ធនឹងសាលាដូចជា បរិយាកាសបន្ទប់រៀន មិត្តរួមថ្នាក់របស់គេជាដើម។ ទន្ទឹមនឹងនេះ អ្នកត្រូវប្រាប់គេឲ្យហ៊ានលើកដៃសួរគ្រូពេលមិនយល់អ្វីមួយ ឬចង់ចេញទៅបន្ទប់ទឹក និងចេញក្រៅ ផងដែរ។ បង្ហាត់គេឲ្យមានទម្លាប់ចេះក្រោកឈរគោរព នៅពេលគ្រូចូលនិងចេញពីថ្នាក់រៀនជាដើម។

២. ទម្លាប់ឲ្យកូនស៊ាំនិងមជ្ឈដ្ឋានថ្មី

ប្រាប់កូនរបស់អ្នកថាអ្នកណាខ្លះដែលពួកគេនឹងជួបនៅសាលា ដូច្នេះពួកគេនឹងដឹងពេលគ្មានម្ដាយឪពុកនៅជិតដូចកាលនៅផ្ទះ។ អ្នកត្រូវចំណាយពេលបង្រៀនពួកគេបន្ថែមពីការសម្របខ្លួនដូចជាពេលញ៉ាំនំចំណី ឬអង្គុយនៅក្នុងថ្នាក់រៀន។ ក្រៅពីនេះ ឲ្យគេរៀនគូរូប ផាត់ពណ៌ សរសេរអក្សរនៅផ្ទះប្រហែលកន្លះម៉ោងឬ ៤៥នាទីនៅផ្ទះ ដើម្បីឲ្យគេឆាប់ចាំ និងមានអារម្មណ៍មិនសូវខ្លាចពេលទៅរៀន។

៣. នាំកូនទៅមើលសាលា មុនថ្ងៃចូលរៀន

មុនថ្ងៃចូលរៀន អ្នកអាចនាំកូនទៅមើលសាលាសិនដើម្បីឲ្យគេមានអារម្មណ៍មិនសូវខ្លាច។ ពេលនោះអ្នកអាចឆ្លៀតប្រាប់គេពីថ្នាក់រៀនដែលគេនឹងរៀន ទីតាំងបន្ទប់ទឹកនៅទីណា បណ្ណាល័យ រួមទាំងបន្ទប់ញ៉ាំអាហារជាដើម ឲ្យគេស្គាល់បណ្ដើរៗ។ នៅថ្ងៃនោះក៏មានម្ដាយឪពុករបស់សិស្សផ្សេងៗយកកូនមកចុះឈ្មោះចូលរៀនដែរ ដូច្នេះជាឱកាសឲ្យកូនរបស់អ្នកបានស្គាល់មិត្តភក្កិថ្មីៗ ដែលធ្វើឲ្យកូនកាន់តែមានអារម្មណ៍ចង់មករៀន។

៤. ទិញខោអាវទៅរៀនឲ្យគេឲ្យហើយ

ឲ្យកូនរបស់អ្នកសាកល្បងស្លៀកខោអាវទៅរៀនឲ្យហើយ ដើម្បីឲ្យគេកាន់តែស៊ាំនឹងការសិក្សា។ លើសពីនេះ ឲ្យជាយោបល់ពីការតុបតែងកាតាបទៅរៀនរបស់គេដូចជា បើបន្ថែមបន្តោងសោរូបខ្លាឃ្មុំមួយប្រហែលមើលទៅស្អាត ឬបើពាក់ស្បែកជើងប៉ាតាពណ៌ខ្មៅបែបនេះមើលទៅសមនឹងឈុតទៅរៀនរបស់គេជាដើម។

៥. សួរអារម្មណ៍របស់កូន

ព្យាយាមសួរកូនឲ្យបានច្រើនថាពេលទៅរៀនគេមានអារម្មណ៍បែបណា។ ពេលកូននិយាយប្រាប់អ្នកពីការលំបាករបស់គេ អ្នកត្រូវយកចិត្តទុកដាក់ស្ដាប់ ។ ព្យាយាមឆ្លើយគ្រប់សំនួររបស់កូន ហើយអ្នកត្រូវជំរុញនិងលើកទឹកចិត្ត កុំឲ្យកូនមានអារម្មណ៍ឯកា។

៦. ប្រាប់កូននូវចំណុចវិជ្ជមាន

និយាយប្រាប់កូននូវចំណុចល្អៗ អំពីសារៈប្រយោជន៍ទៅរៀន។ ប្រាប់គេឲ្យចេះចែករំលែក រាប់អានមិត្តភក្កិ និងរៀនសូត្រពីរឿងថ្មីៗ។ កុំបន្លាចកូនពីទណ្ឌកម្ម ថាគ្រូនឹងវ៉ៃសិស្សដែលធ្វើឲ្យកូនមិនចង់ទៅរៀន។ អ្នកក៏អាចប្រាប់កូនពីរឿងសប្បាយៗកាលនៅតូចរបស់អ្នកពេលទៅរៀនឲ្យគេស្ដាប់ ដើម្បីបង្កើតបរិយាកាសរីករាយសម្រាប់គេផងដែរ។

៧. បែងចែកម៉ោងគេងរបស់កូនឲ្យបានត្រឹមត្រូវ

ដំណេកសម្រាប់កុមារជារឿងសំខាន់ ដូច្នេះអ្នកគួរទម្លាប់ឲ្យគេឆាប់ចូលគេង និងក្រោកពីព្រឹកព្រលឹម។ វិធីនេះនឹងជួយឲ្យកូនមិនងងុយគេងអំឡុងពេលសិក្សា។

៨. បង្រៀនមូលដ្ឋានគ្រឹះដល់កូនជាមុន

កូនរបស់អ្នកនឹងចាប់មេរៀនមិនសូវបានទេ បើសិនអ្នកមិនបានបង្រៀនកូនពីមូលដ្ឋានគ្រឹះជាមុន។ អ្នកអាចបង្រៀនគេងាយៗដូចជា ផាត់ពណ៌ លេខ និងអក្សរខ្លះៗ។ លេខតូចៗសិនដូចជា ពី០ដល់១០ អក្សរ Aដល់ H ជាដើម។ ហ្វឹកហាត់គេបន្តិចម្ដងៗនៅពេលទំនេរ ។ ពេលគេទៅរៀននៅសាលា ប្រៀបដូចបានរៀន២ដង ធ្វើឲ្យគេឆាប់ចាប់បាន។

៩. ប្រាប់ពីរបៀបមានអនាម័យពេលចូលបន្ទប់ទឹក

បង្រៀនគេឲ្យចេះប្រើបង្គន់ ក៏ដូចជារបៀបបិទទ្វារបន្ទប់ទឹក និងអនាម័យនៅពេលបត់ជើងតូចឬធំរួចជាដើម។ លើសពីនេះ អ្នកក៏ត្រូវបង្រៀនគេពីរបៀបស្លៀកពាក់ឡើងវិញ ពេលគេបត់ជើងរួចផងដែរ។

១០. មានសណ្ដាប់ធ្នាប់លើសម្ភារៈសិក្សា

ទម្លាប់ឲ្យគេមានសណ្ដាប់ធ្នាប់លើការរៀបចំសម្ភារៈសិក្សាដូចជា បន្ទាត់ ខ្មៅដៃ ជ័រលុប សៀវភៅ។ នៅពេលប្រើរួច ត្រូវចេះរៀបចំចូលក្នុងកាតាបឲ្យមានរបៀបរៀបរយ កុំឲ្យរាយប៉ាយឬបាត់របស់របរ។ មួយវិញទៀត អ្នកអាចសរសេរឈ្មោះលើសម្ភារៈរបស់កូន ដូច្នេះនៅពេលបាត់ឬវង្វេងសម្ភារៈសិក្សាទាំងនោះជាមួយសិស្សដទៃនៅសាលា គ្រូងាយរកឃើញមកវិញ។

ថ្វីត្បិតការចូលរៀនថ្ងៃដំបូងសម្រាប់ក្មេងតូចៗជារឿងលំបាក ប៉ុន្តែបើអ្នកអនុវត្តវិធីទាំង១០ខាងលើ កូនរបស់អ្នកនឹងចង់ទៅរៀន។ អ្នកក៏ត្រូវបង្រៀនកូនឲ្យចេះដោះស្រាយនៅពេលពួកគេទៅរៀនជួបអារម្មណ៍មិនល្អ។ ម្យ៉ាងទៀត នៅពេលយកកូនទៅរៀន អ្នកត្រូវនិយាយបាយបាយកូនដោយទឹកមុខរីករាយនៅពេលកូនដើរចូលសាលា ហើយកុំភ្លេចប្រាប់គេថាអ្នកនឹងត្រលប់មកយកគេទៅផ្ទះ ក្រោយពេលគេរៀនចប់ ដើម្បីកុំឲ្យគេសោកសៅឬគិតថាអ្នកបោះបង់គេចោល។ អ្នកម្ដាយខ្លះ ពេលជូនកូនទៅសាលាហើយដាក់គេចុះ ដោយមិននិយាយអ្វីទៅកូននឹងធ្វើឲ្យកូនមានអារម្មណ៍មិនផាសុកភាព៕

ចុចអាន៖ កូនធំឡើងក្លាយអាចជាមនុស្សល្អ លុះត្រាតែម្តាយមានគុណសម្បត្តិ៧ យ៉ាងនេះ

ប្រភព៖ kenhphunu ប្រែសម្រួល៖ លឹម សុនា