ឲ្យតែមានប៉ុន្មានចំណុចនេះ អ្នកគ្មានថ្ងៃបែកគ្នាឡើយទោះឈ្លោះគ្នាបែកផ្សែងក៏ដោយ

2019-07-03 10:00:00
ចំនួនមតិ 0 | ចំនួនចែករំលែក 0

មានគូស្នេហ៍ខ្លះស្រលាញ់គ្នាមិនទាន់បានប៉ុន្មានក៏បែកគ្នាទៅវិញ ទោះគ្រាដំបូងពួកគេខំតស៊ូជាមួយគ្នាយ៉ាងប្ដូរផ្ដាច់ក៏ដោយ។ នេះមកពីពួកគេមិនសូវយល់ពីគ្នា មិនផ្ដល់តម្លៃឲ្យគ្នាទើបស្នេហាប្រៀបដូចភ្លើងចំបើង។ អ្នកអាចនឹងរីករាយជាមួយជីវិតស្នេហាជាមួយមនុស្សដែលអ្នកស្រលាញ់យូរអង្វែង បើសិនអនុវត្តតាមគន្លឹះខាងក្រោម។

១. បន្ថែមភាពផ្អែមល្ហែម

ស្វែងរកឱកាសដើម្បីបានធ្វើរឿងផ្អែមល្ហែមជាមួយគ្នាទៅវិញទៅមក ដូចជាទៅដើរលេង ថតរូប ឬចេញក្រៅដើរផ្សាជាមួយគ្នាក៏បាន។ ឧស្សាហ៍និយាយពាក្យថា I love you ពេលក្រោកពីគេង និងមុនចូលគេង ដែលធ្វើឲ្យអ្នកនិងគូស្នេហ៍នឹករលឹកគ្នាមិនឈប់។

២. យកចិត្តទុកដាក់

អ្វីដែលអ្នកចង់បានគឺស្នេហាយូរអង្វែង ដូច្នេះការយកចិត្តទុកដាក់ជារឿងសំខាន់។ ខ្វល់ពីគាត់ឲ្យបានច្រើន កុំខ្លាចគាត់ធុញ។ មិត្តប្រុសរបស់អ្នកនឹងស្រលាញ់អ្នកគ្មានថ្ងៃប្រែបើអ្នកចេះខ្វាយខ្វល់សុខទុក្ខគាត់។ អ្នកអាចធ្វើរឿងបន្តិចបន្តួចសម្រាប់គាត់ តែបង្ហាញពីក្តីស្រលាញ់ខ្លាំងដូចជាជួយកក់សក់ឲ្យគាត់ ឬទិញអំណោយលើកទឹកចិត្តមិត្តប្រុសពេលគាត់ធ្វើរឿងអ្វីបានលទ្ធផលល្អជាដើម។

៣. ចម្អិនអាហារដោយផ្ទាល់ដៃ

ថ្វីត្បិតពេលនេះអ្នកនិងគាត់ត្រឹមជាសង្សារ តែអ្នកក៏គួរបង្ហាញស្នាដៃធ្វើម្ហូបឲ្យមិត្តប្រុសបានភ្លក់ថាអ្នកពូកែធ្វើម្ហូបកម្រិតណា។ នេះជាមន្តស្នេហ៍ដ៏ងប់ងុលមួយសម្រាប់មនុស្សប្រុស ព្រោះបើអ្នកធ្វើម្ហូបឆ្ងាញ់បុរសណាក៏ចង់បានមនុស្សស្រីបែបនេះជាប្រពន្ធដែរ។ ម្យ៉ាងទៀត ក៏បង្ហាញថាអ្នកជាមនុស្សស្រីពូកែការងារផ្ទះ ទោះអាយុក្មេងក៏ដោយ។

៤. ស្មោះត្រង់ចំពោះគ្នា

ក្រៅពីមិនលូកលាន់ពេលវេលាផ្ទាល់ខ្លួនរបស់ដៃគូ រឿងសំខាន់មួយទៀតដែលអ្នកគួរផ្ដល់ឲ្យគូស្នេហ៍គឺភក្ដីភាព។ ស្នេហ៍ពិត គឺត្រូវស្មោះត្រង់នឹងគ្នា។ មិនថានៅចំពោះមុខមិត្តភក្កិ លើបណ្ដាញសង្គម អ្នកក៏គួរឲ្យតម្លៃគ្នាទៅវិញទៅមក។