មនុស្សប្រុសមិនងាយយំទេ តែបើគាត់ស្រក់ទឹកភ្នែកដើម្បីអ្នកគឺគាត់ស្រលាញ់អ្នកបំផុតហើយ

2019-07-02 10:35:00
ចំនួនមតិ 0 | ចំនួនចែករំលែក 0

គេថាមនុស្សប្រុសកម្រយំណាស់។ មានអ្នកខ្លះប្រដូចបុរសទៅនឹងដុំថ្ម ព្រោះចឹត្តរឹង គ្មានមនោសញ្ចេតនា មិនចេះឈឺចាប់។ ប៉ុន្តែបើនារីណាឃើញមនុស្សប្រុសយំហើយ នោះគឺជាពេលដែលគាត់ឈឺចាប់ ខ្លាំងបំផុតហើយ។

ដោយសារបុរសត្រូវគេបង្រៀនពីតូចមកឲ្យធ្វើជាមនុស្សរឹងមាំ ជាកូនប្រុសដើមទ្រូងប្រាំហត្ថ ដូច្នេះគាត់មិនងាយនឹងយំនៅចំពោះមុខអ្នកណាឡើយ។ ក្នុងមួយជីវិតមនុស្សប្រុស គេយល់ថាគាត់អាចយំបានតែ២ដងប៉ុណ្ណោះ ។ ម្ដងនៅពេលអ្នកគុណចែកឋាន និងម្ដងទៀតសម្រាប់មនុស្សស្រីដែលគាត់ស្រលាញ់ពិត។ ក្នុងទំនាក់ទំនងស្នេហា ខ្លះទៀតបានប្រដូចទឹកភ្នែកមនុស្សប្រុសស្រក់ចេញពីបេះដូង មិនមែនស្រក់ចេញពីកែវភ្នែកនោះទេ។ មនុស្សប្រុសច្រើនតែស្ងប់ស្ងាត់ពេលបែកបាក់ស្នេហា រហូតគេគិតថា មនុស្សប្រុសក្នុងលោកនេះសុទ្ធតែអាក្រក់ គ្មានបេះដូង។

តាមពិតទៅ គាត់ក៏ចេះឈឺចាប់មិនខុសពីមនុស្សស្រីដែរ តែគាត់លាក់វាក្នុងចិត្តហើយជួនកាលក្ដីឈឺចាប់នោះមានទំហំធំជាងមនុស្សស្រីក៏ថាបាន។ គាត់ព្យាយាមសម្រួលអារម្មណ៍ធ្វើធម្មតា ព្រោះតែខ្លាចអ្នកដទៃឃើញភាពទន់ខ្សោយរបស់គាត់ ព្រោះសង្គមបានបង្រៀននឲ្យគាត់ត្រូវតែរឹងមាំរហូតគាត់មិនអាចស្រក់ទឹកភ្នែកផ្តេសផ្តាសបានឡើយ។ ថ្វីត្បិតបុរសមិនងាយយំ តែបើឃើញទឹកភ្នែកច្រើនតំណក់ស្រក់លើថ្ពាល់គាត់ហើយ នោះគឺជាទឹកភ្នែកឈឺផ្សាបំផុតរបស់គាត់។

បើថ្ងៃណាមួយ អ្នកឃើញមិត្តប្រុសយំដើម្បីអ្នក នារីៗទាំងអស់កុំស្តីបន្ទោសគាត់ កុំសើចចំអកឲ្យគាត់អី ប៉ុន្តែត្រូវឱបគាត់ ជាស្មាបង្អែកសម្រាប់គាត់។ និយាយលើកទឹកចិត្តគាត់ ដោយពាក្យថា៖ បើយំអាចធ្វើឲ្យអ្នកធូរចិត្តបាន យំទៅកុំខ្លាចគេគិតថាអ្នកជាមនុស្សប្រុសទន់ខ្សោយ ខ្ញុំសន្យាជួយជូតទឹកភ្នែកឲ្យអ្នក។

មនុស្សប្រុសយំដើម្បីមនុស្សស្រីមានន័យថា នារីម្នាក់នោះពិតជាសំខាន់ខ្លាំងក្នុងជីវិតគាត់ណាស់។ គាត់ចាត់ទុកអ្នកជាមនុស្សស្រីមិនអាចខ្វះបានសម្រាប់គាត់ ដូច្នេះសូមរក្សាមនុស្សប្រុសម្នាក់នោះទុកហើយតបស្នងក្តីស្រលាញ់ឲ្យគាត់វិញ។ កុំខឹងព្រោះតែរឿងបន្តិចបន្តួចហើយបាត់បង់មនុស្សប្រុសល្អម្នាក់ទៅយ៉ាងសោកស្តាយ៕

ចុចអាន៖ កូនស្រីត្រូវចាំ! កុំលើកលែងទោសឲ្យមនុស្សប្រុសកំសាកលើសពី ២ ដង

ប្រភព៖ vietgiaitri ប្រែសម្រួល៖ លឹម សុនា