រូបមន្តខាត់ស្បែកធម្មជាតិ ជួយឲ្យសម៉ដ្ឋភ្លឺ ទុកធ្វើថ្ងៃចុងសប្តាហ៍
- 2019-06-28 11:30:00
- ចំនួនមតិ 0 | ចំនួនចែករំលែក 0
រូបមន្តខាត់ស្បែកធម្មជាតិ ជួយឲ្យសម៉ដ្ឋភ្លឺ ទុកធ្វើថ្ងៃចុងសប្តាហ៍
ស្បែកភ្លឺទន់រលោង មានសំណើមបែបធម្មជាតិ មិនមែនសស្កុះបែបគីមី គឺជាក្តីប្រាថ្នារបស់មិត្តៗនារីសម័យថ្មី ដែលចង់ស្អាតដោយភាពឈ្លៀសវៃនិងគិតគូពីសុខភាពស្បែក។ ថ្ងៃនេះដែរ "កញ្ញា" សូមណែនាំនូវរូបមន្តផ្សំពីរបស់ធម្មជាតិផ្សេងៗគ្នា ដែលមានប្រសិទ្ធភាព ចំណាយតិច និងមិនបំផ្លាញស្បែក ដូចផលិតផលមួយចំនួននោះទេ។
១. ថ្នាំខាត់ផ្សំពីយ៉ាអួ
នេះជាវិធីងាយបំផុត ដំបូងគ្រាន់តែ យកយ៉ាអួសុទ្ធ (មិនបន្ថែមរសជាតិ) ប្រហែល១-២ ប្រអប់ បន្ទាប់មកលាយជាមួយអំបិលបន្តិច ហើយកូរឲ្យសព្វចូលគ្នា។
បន្ទាប់មកទៀតយកមកម៉ាស្សាពេញផ្ទៃមុខ ប្រហែល៥នាទី រួចត្រូវទុកចោល៥នាទីទៀត ហើយលាងជាមួយទឹកស្អាតធម្មតាជាការស្រេច។
អ្នកក៏អាចប្រើនៅលើកែងដៃ ជង្គង់ ឬពេញរាងកាយ ត្រង់កន្លែងណាដែលគិតចង់ឲ្យស្បែកទន់រលោង មានសំណើម។
២. ថ្នាំខាត់ផ្សំពីត្រសក់
វិធីនេះក៏មិនពិបាកធ្វើដែរ គ្រាន់តែយកត្រសក់ ២-៣ ផ្លែ ដាក់ក្នុងម៉ាស៊ីនកិន ហើយក្រឡុកឲ្យម៉ដ្ឋ។
បន្ទាប់មកត្រូវពូតយកទឹកចេញ នៅសល់សាច់ត្រសក់ ត្រូវយកទៅក្លាសេក្នុងទូទឹកកកមួយស្របក់។
ក្រោយមកយកសាច់ត្រសក់មកបិទលើស្បែក ទុកចោលពី ៣០-៤០នាទី។
ចុងក្រោយត្រូវលាងទឹកចេញជាការស្រេច។ អ្នកអាចធ្វើ ២-៣ដង ក្នុងមួយសប្តាហ៍ ដើម្បីធ្វើឲ្យស្បែកទន់ម៉ដ្ឋខៃ គួរឲ្យស្ទាបអង្អែល និងមានសភាពភ្លឺស្អាត។
៣. ថ្នាំខាត់ផ្សំពីម្សៅល្មៀត
ម្សៅល្មៀតអាចចាត់ទុកជាថ្នាំខាត់ដ៏ស័ក្ដិសិទ្ធិតាំងពីបុរាណរៀងមក ព្រោះវាមានប្រសិទ្ធភាពខ្ពស់ ក្នុងការធ្វើឲ្យស្បែកសភ្លឺ រលោង មានសុខភាពល្អ។
បើអ្នកចង់បានលទ្ធផលជាទីគាប់ចិត្ត គួរប្រើម្សៅល្មៀតជាមួយគ្រឿងផ្សំផ្សេងទៀតដូចជា ទឹកដោះគោស្រស់ ទឺកឃ្មុំ យ៉ាអួ ឬក្រូចឆ្មាក៏បាន។
អាចជ្រើសរើសគ្រឿងផ្សំណាមួយក្នុងចំណោមអ្វីដែលបានរៀបរាប់ខាងលើ ដើម្បីយកមកលាយជាមួយម្សៅល្មៀត ឲ្យខាប់ល្មម ខាត់ម៉ាស្សាថ្នមៗលើស្បែក ទុកចោលពី២០-៣០នាទី អ្នកនឹងឃើញថាស្បែកចាប់ផ្តើមប្លែកភ្លាមៗ។
វិធីធម្មជាតិទាំងអស់ មិនត្រឹមតែមិនប៉ះពាល់ដល់សុខភាពប៉ុណ្ណោះទេ ថែមទាំងជួយឲ្យអ្នកស្អាត សាច់ចាំបានយូរទៀតផង គ្រាន់តែត្រូវអត់ធ្មត់និងឧស្សាហ៍ព្យាយាមបន្តិច៕
ចុចអានបន្ត៖ គ្រាន់តែធ្វើរឿងតូចៗ៥យ៉ាងនេះ អ្នកនឹងប្រែស្រស់ស្អាតដោយមិនបាច់ពឹងលើ Make Up