មកស្វែងយល់ពីមូលហេតុ ដែលអ្នកឈឺក្បាលនៅកន្លែងខុសៗគ្នា

2019-06-28 08:30:00
ចំនួនមតិ 0 | ចំនួនចែករំលែក 0

អ្នកច្បាស់ជាលែងឆ្ងល់ទៀតហើយ បើបានដឹងពីមូលហេតុខុសៗគ្នា នៅពេលឈឺក្បាលត្រង់កន្លែងផ្សេងគ្នា។ ការដឹងពីមូលហេតុត្រឹមត្រូវ អាចជួយព្យាបាលឲ្យអាការៈឈឺក្បាលឆាប់ធូរស្រាលឡើងវិញឆាប់រហ័ស។

១. ឈឺក្បាលដោយសារភាពតានតឹង

នេះជាអាការៈឈឺក្បាលទូទៅ ហើយភាគច្រើនអ្នកខ្លះតែងតែកើតឡើងជាញឹកញាប់ទៀតផង។ អ្នកជំងឺមានអារម្មណ៍ឈឺចាប់ និងលោតខ្ទោកៗ ត្រង់បរិវេណថ្ងាសមកដល់សៀតផ្កា មិនអាចផ្តោតអារម្មណ៍បានល្អ។ អ្នកក៏អាចឈឺនៅក្រោមភ្នែកដែរ។ វានឹងបាត់ទៅវិញក្នុងរយៈពេលក្រោមមួយម៉ោងឬអាចឈានទៅដល់២-៣ថ្ងៃក៏មាន។

មូលហេតុ៖ មានហេតុផលច្រើនយ៉ាងខុសៗគ្នា ប៉ុន្តែទូទៅគឺបណ្តាលមកពីស្រ្តេស ខ្វះជាតិទឹក ឃ្លាន ឬគេងមិនគ្រប់គ្រាន់។ ពេលខ្លះសូម្បីសំឡេងថ្លង់រំខានពេក ក៏ជាមូលហេតុមួយដែរ។ សំខាន់បំផុត អ្នកត្រូវចេះថែរក្សាសុខភាពឲ្យបានល្អ។

២. ឈឺមួយចំហៀងក្បាល

វាជាអាការៈធ្ងន់ធ្ងរជាងប្រភេទដទៃទៀត ហើយអ្នកនឹងឈឺចាប់តែមួយចំហៀងក្បាលតែប៉ុណ្ណោះ ជួនកាលអាចក្អួតទៀតផង។ អ្នកមើលឃើញអ្វីៗនៅជុំវិញខ្លួនមិនសូវច្បាស់ ឬដូចជាមានចលនាវិលវល់ទៅមក។

មូលហេតុ៖ អាចមកពីស្រ្តេស អ័រម៉ូន និងបញ្ជាក់ថាអ្នកមានសុខភាពខ្សោយ។ ជាធម្មតាការឈឺមួយចំហៀងក្បាល ជាជំងឺបន្តជំនាន់គ្នា។

៣. ឈឺបរិវេណភ្នែក

មិនមែនជាជំងឺភ្នែកនោះទេ ប៉ុន្តែដោយសារតែវារាលដាលមកពីផ្នែកក្បាល។ អ្នកឈឺចាប់ខ្លាំង មានអារម្មណ៍ក្រហល់ក្រហាយឬចាក់ៗត្រង់ភ្នែកម្ខាង ប៉ុន្តែវាឆាប់បាត់ទៅវិញទេ។ ភាគច្រើនកើតឡើងចំពោះមនុស្សប្រុសច្រើនជាងមនុស្សស្រី។

មូលហេតុ៖ នៅមិនទាន់អាចរកឃើញច្បាស់លាស់នៅឡើយ ប៉ុន្តែគេសន្និដ្ឋានថា អាចមកពីអ៊ីយ៉ុងនៅក្នុងរាងកាយមានដំណើរការមិនប្រក្រតី។

៤. ឈឺក្បាលដោយសារសរសៃឈាម

ការឈឺក្បាលប្រភេទនេះ បណ្តាលមកពីការចលនាច្រើន ឬដាក់សម្ពាធដល់រាងកាយជាដើម។ វាមិននៅជាមួយអ្នកយូរពេកទេ ប៉ុន្តែវាតែងលេចចេញមកនៅពេលដែលអ្នកគិតស្ទាក់ស្ទើរច្រើន។ ម្យ៉ាងវិញទៀត អាចបណ្តាលមកពីការរួមភេទប្រើកម្លាំងខ្លាំង ឬហាត់ប្រាណច្រើន។

៥. ឈឺត្រង់បរិវេណឆ្អឹងលើខ្ទង់ច្រមុះនិងក្រោមភ្នែក

ពេលដែលអ្នកផ្តាសាយ ឬឈឺផ្នែកដង្ហើម អ្នកតែងតែមានហើមត្រង់បរិវេណឆ្អឹងលើខ្ទង់ច្រមុះនិងក្រោមភ្នែក ដែលជាមូលហេតុនាំឲ្យឈឺក្បាល។ ថ្វីត្បិតតែអាការៈបែបនេះ ពុំសូវឈឺចុកចាប់ខ្លាំង ប៉ុន្តែអ្នកនឹងមានអារម្មណ៍ថាចាប់ឈឹបៗ ត្រង់ថ្ពាល់និងច្រមុះ៕

ចុចអានបន្ត៖ ចង់ឱ្យកូនឆ្លាតមានប្រាជ្ញា ត្រូវឱ្យញ៉ាំអាហារចម្បង ៧យ៉ាងនេះតាំងពីក្មេង

ប្រភព៖ themindsjournal ប្រែសម្រួល៖ ដេត ឈុនអ៉ី