បើចង់បានប្រពន្ធល្អ ប្រុសៗគួរតែត្រៀមខ្លួនធ្វើជាប្តីល្អជាមុនសិន

2019-06-27 09:40:00
ចំនួនមតិ 0 | ចំនួនចែករំលែក 0

សង្ឃឹមថាប្រុសៗដែលកំពុងមានស្នេហា ហើយជិតរៀបការនឹងបានអានអត្ថបទនេះ ហើយពិចារណាថាតើអ្នកល្អប៉ុណ្ណា ប្រពន្ធអ្នកល្អប៉ុណ្ណា ហើយបើមានតែប្រពន្ធល្អតែម៉្យាងគ្រួសារក៏គ្មានសុភមង្គលដែរ បើប្តីជាមនុស្សគ្មានបេះដូងផងនោះ។

រូបតំណាង

មនុស្សភាគច្រើននិយាយថា " មានតែផ្ទះធំមួយ និងប្រពន្ធល្អមួយ ជីវិតគ្រួសារនឹងរីករាយហើយ “។ ត្រូវដឹងថាមនុស្សស្រីនឹងរីករាយបើសិនជានាងរស់ក្នុងរង្វង់គ្រួសារដែលមានភាពកក់ក្តៅ។ នាងនឹងក្លាយជាអ្នកចិញ្ចឹមបីបាច់គ្រួសារដ៏គួរឲ្យគោរពមួយរូប ហើយប្តីណាដែលមានប្រពន្ធល្អបែបនេះ ប្រៀបបាននឹងផ្ទះដែលមានគ្រឹះរឹងមាំមួយ ដូច្នេះគេអាចផ្ដោតលើការធ្វើការបានច្រើន។ អ៊ីចឹងហើយសម្រាប់គ្រួសារ ប្រពន្ធគឺជាទ្រព្យសំខាន់បំផុត មិនថាមានមនុស្សប៉ុន្មាននាក់ដែលយល់ពីតម្លៃនាងក៏ដោយ។

មិនថាប្តី ឬប្រពន្ធទេសុទ្ធតែចង់បានប្រពន្ធល្អ និងធ្វើជាប្រពន្ធល្អ។ ប៉ុន្តែមនុស្សប្រុសភ្លេចគិតថា មុននឹងចង់បានប្រពន្ធល្អ ពួកគេគួរតែធ្វើប្តីល្អជាមុនសិន ឲ្យស័ក្តិសមនឹងប្រពន្ធ។ ជាធម្មតាយើងតែងតែឮមនុស្សប្រុសនិយាយពីប្រពន្ធខ្លួនឯងថា៖

«ចាប់តាំងពីមានកូនហើយ នាងចូលចិត្តស្តីបន្ទោសច្រើន ក្លាយជាមនុស្សរញ៉ាំរញ៉ូវ មិនងាយស្រួលដូចមុនទេ» នៅក្នុងភ្នែកពួកគេ ប្រពន្ធរបស់គេជាមនុស្សស្រីដែលឆាប់ខឹងខុសរឿង។

ទោះបីវាជានេះត្រឹមតែជាសម្ដីដែលមិនអាចជួយអ្វីបាន តែមនុស្សប្រុសគួរតែយល់ថា៖ ប្រពន្ធដែលរាបសារគឺមកពីប្តីរបស់នាងតែងតែមើលថែ និងការពារនាងបានល្អ។ រឿងមិនល្អដែលនាងធ្វើ មិនមែនជាអ្វីដែលនាងចង់ធ្វើនោះទេ។ តែក៏ព្រោះតែនាងត្រូវលះបង់គ្រប់យ៉ាងតែចុងក្រោយទទួលបានតែការខកចិត្តទៅវិញទេ។

រូបតំណាង

អ្នកជាប្តីតែងតែបន្ទោសនាង រិះគន់នាង តែអ្នកមិនដែលសំគាល់មើលថា ចាប់តាំងពីនាងរៀបការហើយ នាងមិនដែលមានពេលដើរទិញអីវ៉ាន់ ឬស្លៀកពាក់ខោអាវថ្មីៗណោះទេ។ ឥឡូវនេះនាងមានវ័យស្ទើរនឹងស្មើពាក់កណ្តាលជីវិតទៅហើយ តើអ្នកមានដែលទិញសម្លៀកបំពាក់ថ្មីឲ្យនាង ឬទិញគ្រឿងសម្អាងឲ្យនាងទេ?

អ្នកបន្ទោសនាង ពេលនាងមិនរីករាយ និងខឹងអ្នក គ្រាន់តែដោយសារនាងប្រាប់អ្នកកុំឲ្យជក់បារី និងផឹកស្រា។ តើពេលនោះអ្នកមានដែលស្តាប់នាងខ្លះទេ?

អ្នកបន្ទោសនាងថាមិនរាបសារ មិនទន់ភ្លន់ មិនខ្វល់ពីអ្នក បន្ទាប់ពីរៀបការហើយ តើអ្នកមានសួរខ្លួនឯងទេថា អ្នកធ្លាប់ធ្វើទង្វើបែបនេះដាក់នាងដែរអត់?

រូបតំណាង

ពាក្យសម្ដីរបស់ប្រពន្ធ៖ តំណែងក្នុងផ្ទះនេះ គឺខ្ញុំធំជាងគេ ដោយសារតែបើសិនខ្ញុំមិនលាងចាន ឆ្នាំងទេ នោះក៏គ្មាននរណាលាងដែរ។ បើសិនជាខ្ញុំមិនចម្អិនទេ នោះក៏គ្មាននរណាធ្វើដែរ។ បើខ្ញុំមិនជូតសម្អាតផ្ទះ នោះក៏គ្មាននរណាហ៊ានធ្វើជំនួសខ្ញុំដែរ។

ទោះបីជាសន្តីនេះស្តាប់ទៅហាក់ដូចជាកំប្លែងមែន តែប្រុសៗត្រូវតែដឹងពីតម្លៃនៃសម្ដីនេះ ព្រោះវាមានបញ្ចូលភាពល្វីងជូរចត់ និងការអស់សង្ឃឹមខ្លាំងបំផុត។

ដូច្នេះហើយមនុស្សប្រុស មិនត្រូវបន្ទោសប្រពន្ធគ្រប់ពេលនោះទេ។ ត្រូវតែឆ្លុះកញ្ចក់មើលខ្លួនឯងផង ថាមានបានធ្វើអ្វីចំពោះប្រពន្ធខ្លះហើយនៅ? មនុស្សស្រីដែលរៀបការរួច នាងមិនខ្លាចនឹងភាពលំបាកទេ តែអ្វីដែលនាងខ្លាចបំផុតគឺការឈឺចាប់ដែលស្វាមីខ្លួនឯងផ្តល់ឲ្យ។

អ្នកជាប្តី ក្នុងនាមជាស្វាមីល្អម្នាក់អ្វីដែលអ្នកត្រូវតែធ្វើចំពោះប្រពន្ធគឺ៖ ផ្តល់សុវត្ថិភាពឲ្យនាង ចែកឲ្យដាច់រវាងការងារនិងគ្រួសារ ស្រលាញ់នាងឲ្យច្រើនៗ មិនក្បត់នាង ប៉ុណ្ណឹងគឺគ្រប់គ្រាន់ហើយ។

បើអ្នកចង់បានប្រពន្ធល្អ អ្នកត្រូវរៀនធ្វើជាប្តីល្អជាមុនសិន៕

ចុចអាន៖ ឪពុកផ្តាំកូនស្រីថា កុំធ្វើរឿងទាំងអស់នេះឲ្យសោះពេលកូនមានស្វាមីឬសង្សារ

ប្រភព៖ bestie ប្រែសម្រួល៖ ឃួន សុលីកា