សុំទោសខ្លួនឯង ដែលកាលពីមុនដោយសារមនុស្សម្នាក់ ជិះជាន់ខ្លួនឯងជាខ្លាំង
- 2019-06-27 03:00:00
- ចំនួនមតិ 0 | ចំនួនចែករំលែក 0
សុំទោសខ្លួនឯង ដែលកាលពីមុនដោយសារមនុស្សម្នាក់ ជិះជាន់ខ្លួនឯងជាខ្លាំង
នៅពេលធ្លាក់ខ្លួនចូលរណ្ដៅស្នេហាមួយ ពួកយើងប្រើអស់កម្លាំងកាយចិត្តដើម្បីស្រលាញ់គេ ទាំងភ្លេចខ្លួនថា ដើម្បីស្រលាញ់អ្នកណាម្នាក់ យើងត្រូវស្រលាញ់ខ្លួនឯងវិញ។ មានថ្ងៃខ្លះ ទីក្រុងដ៏អ៊ូអរមួយនេះ ពិបាកចិត្តរកអ្វីថ្លែងមិនបាន មេឃមិនទាន់បើកថ្ងៃផង ក៏យប់ទៅវិញបាត់ សំដីមិនទាន់និយាយចេញមកផង ទឹកភ្នែកក៏ស្រក់បាត់ទៅហើយ។ ខែនេះគឺគម្រប់មួយឆ្នាំគត់ដែលយើងបែកគ្នា។
ពួកយើងធ្លាប់ចាត់ទុកគ្នាជាអ្វីៗគ្រប់យ៉ាង។ ថ្ងៃដែលបងទើបចាប់ផ្ដើមអាជីពដំបូង មិនទាន់មានអ្វីសោះនៅក្នុងដៃ ខ្ញុំជានារីតែមួយគត់របស់បង នៅក្បែរបងទោះត្រូវភ្លក់រសជាតិល្វីងជូរចត់យ៉ាងណាក៏ដោយ។ នៅពេលដែលបងហត់បំផុត ក៏ជាខ្ញុំដែលជាអ្នកត្រដាងដៃចាំទទួលបងគ្រប់ពេលវេលា។
ស្នេហារបស់យើងសាមញ្ញខ្លាំងណាស់ ព្រឹកឡើងយើងជិះទៅធ្វើការលើម៉ូតូចាស់របស់បង ថ្ងៃសម្រាកក៏ជាម៉ូតូដដែលនេះដែលជូនយើងទៅគ្រប់ច្រកល្ហកក្នុងក្រុងនេះ។ ទោះប្រាក់ខែបងមិនខ្ពស់ តែរាល់ឱកាសសំខាន់ បងមិនដែលភ្លេចកាដូតូចៗឲ្យខ្ញុំឡើយ។
ស្នេហាដែលអូសបន្លាយ៥ឆ្នាំ អ្នកណាក៏ស្មានតែពួកខ្ញុំនឹងមានមង្គលការតូចមួយ ហើយរស់ជាមួយគ្នានៅថ្ងៃក្រោយហើយ។ តែគ្មានអ្នកណាអាចស្មានអ្វីមុនឡើយ យូរៗទៅពួកខ្ញុំចាប់ផ្ដើមរកាំរកូស គាត់ចាប់ផ្ដើមប្រើសម្ដីធ្ងន់ៗដាក់ខ្ញុំ ធ្វើឲ្យប៉ះពាល់ដល់ផ្លូវអារម្មណ៍ខ្ញុំជាខ្លាំង។ ពីមួយថ្ងៃទៅមួយថ្ងៃ មនោសញ្ចេតនាយើងកាន់តែសាបទៅៗ រហូតឈានដល់ការបែកគ្នា។
ខ្ញុំនៅចាំយ៉ាងច្បាស់ថា ថ្ងៃដែលពួកយើងបែកគ្នា មេឃក៏ក្ដៅដូចថ្ងៃដែលយើងស្រលាញ់គ្នាដំបូងដែរ។ ខ្ញុំត្រូវចំណាយអស់កន្លះឆ្នាំដើម្បីបំភ្លេចស្នេហាមួយនេះ រហូតដល់ពេលនេះ ខ្ញុំនៅតែមិនទាន់ហ៊ានបើកចិត្តវិញ ព្រោះនៅខ្លាចឈឺនៅឡើយ។
ចុងបញ្ចប់ ខ្ញុំចង់និយាយថាសូមទោសខ្លួនឯង ដែលបានស្រលាញ់ អាណិត អ្នកខ្លាំងដល់ថ្នាក់ភ្លេចខ្លួនឯង។ ហើយក៏អរគុណអ្នកដែលបាននាំសុភមង្គលឲ្យខ្ញុំ ទោះវាមិនបានយូរអង្វែងដូចដែលខ្ញុំបានរំពឹងក៏ដោយ តែវាក៏ជារយៈពេលមួយដែលពិបាកបំភ្លេចបាន៕
ចុចអាន៖ ពាក្យម្តាយផ្តាំ! កូនស្រីអើយ កុំត្រដរចង់បានមនុស្សប្រុសដែលគេមិនស្រលាញ់កូនអី