តិចនិកព្យាបាលរបួសស្រាលៗកុំឲ្យមានស្នាមនៅផ្ទះដោយខ្លួនឯង
- 2019-06-30 03:00:00
- ចំនួនមតិ 0 | ចំនួនចែករំលែក 0
តិចនិកព្យាបាលរបួសស្រាលៗកុំឲ្យមានស្នាមនៅផ្ទះដោយខ្លួនឯង
របួសស្រាលៗដូចជា មុត រលាត់ស្បែក និងរលាកបន្តិចបន្តួច គឺជារឿងកើតឡើងជាប្រចាំក្នុងជីវិត។ យើងអាចព្យាបាលវាបានដោយខ្លួនឯងនៅផ្ទះ ប៉ុន្តែយើងត្រូវដឹងពីរបៀបព្យាបាលដែលមានសុវត្ថិភាព និងត្រឹមត្រូវដើម្បីឲ្យរបួសឆាប់ជាសះស្បើយ។ ការមានសម្ភារៈសង្គ្រោះបឋមនៅផ្ទះ ជាគំនិតល្អមួយសម្រាប់ព្យាបាលរបួសផ្សេងៗដែលអាចកើតឡើង មិនថាធ្ងន់ឬស្រាលនោះទេ។ អ្នកអាចរកទិញសម្ភារៈសង្គ្រោះបឋមបាន ឬរៀបចំដោយខ្លួនឯងដែលរួមមានសម្ភារៈណាដែលចាំបាច់សម្រាប់របួសនានា។ ខាងក្រោមនេះជាការណែនាំសម្រាប់ព្យាបាលរបួសស្រាលៗ៖
១. លាងដៃឲ្យស្អាត
ជាដំបូង ត្រូវលាងដៃរបស់អ្នកជាមួយសាប៊ូឲ្យបានស្អាតជាមុនសិន មុននឹងចាប់ផ្តើមព្យាបាលរបួស ដើម្បីជៀសវាងការឆ្លងមេរោគ។
២. លាងមុខរបួស
លាងមុខរបួសជាមួយនឹងទឹករ៉ូប៊ីនេ ដើម្បីកាត់បន្ថយការឆ្លងមេរោគ និងលាងសម្អាតដី ឬកម្ទេចផ្សេងៗលើមុខរបួស។ លាងកន្លែងដែលនៅជិតរបួសជាមួយសាប៊ូ និងទឹក ប៉ុន្តែកុំឲ្យសាប៊ូបះត្រូវរបួសឲ្យសោះ ដោយសារវាអាចធ្វើឲ្យស្បែករលាកបាន។ កុំព្យាយាមយកកម្ទេច (បើសិនមាន)ចេញពីរបួសដោយខ្លួនឯង។ ទៅជួបគ្រូពេទ្យដើម្បីយកចេញ ឬយកដង្កៀបលាងជាមួយអាល់កុលមកចាប់កម្ទេចនោះចេញ។
៣. ឃាត់ឈាម
ឈាមដែលហូរចេញពីការមុត ឬរលាត់តិចតួច អាចឈប់ហូរដោយខ្លួនឯង។អ្នកក៏អាចឃាត់ឈាមបានដោយការយកបន្ទះបង់រុំរបួស ឬក្រណាត់ស្អាតមកសង្កត់លើមុខរបួសថ្នមៗ។ សង្កត់ឲ្យបានពីរទៅបីនាទី ឬរហូតដល់ឈាមឈប់ហូរ។
៤. យកក្រមួនព្យាបាលលាបលើរបួស
លាបក្រមួនព្យាបាលរបួសស្រាលៗលើមុខរបួស ដើម្បីរក្សាសំណើមលើរបួស ហើយជួយឲ្យរបួសឆាប់ជា។ ព្យាយាមយកក្រមួនព្យាបាលមកលាបលើរបួសឲ្យបានទៀងទាត់ ការព្យាបាលបែបនេះក៏ជួយកាត់បន្ថយកុំឲ្យមានសម្លាកក្រោយរបួសជាសះស្បើយដែរ។
៥. ប្រើបង់បិតមករុំរបួស
ប្រសិនបើរបួសមុតជ្រៅ ហើយធំ អ្នកអាចយកបង់រុំរបួសមករុំ ហើយបិតជុំវិញរបួស។ អ្នកក៏អាចយកបង់បិតដំបៅមកបិត ហើយប្ដូរចេញពេលណាដែលវាសើម ឬកខ្វក់។
នៅពេលរបួសក្លាយជាកមរ កុំកេះវា ព្រោះវាអាចធ្វើឲ្យក្រជាសះស្បើយ។ ការកេះកមរ អាចធ្វើឲ្យមានសម្លាកបានទៀតផង។ ដើម្បីការពារកុំឲ្យមានសម្លាក ត្រូវលាបក្រមួនព្យាបាលលើរបួសជានិច្ច។ សម្រាប់ព័ត៌មានទាក់ទងនឹងការរលាកស្រាលៗ អ្នកអាចស្វែងរកបាននៅទីនេះ។ សូមទៅពិគ្រោះជាមួយគ្រូពេទ្យ ប្រសិនបើរបួសអ្នកប៉ះនឹងសារធាតុកខ្វក់ ឬច្រេះ និងសួរនាំអំពីការចាក់វាំងសាំងបង្ការតេតាណូស៕