រូបមន្តថែបំប៉នសក់ស្អាត ពីគល់ដល់ចុងតាមបែបធម្មជាតិដោយគ្រឿងផ្សំងាយៗ
- 2019-06-24 09:30:00
- ចំនួនមតិ 0 | ចំនួនចែករំលែក 0
រូបមន្តថែបំប៉នសក់ស្អាត ពីគល់ដល់ចុងតាមបែបធម្មជាតិដោយគ្រឿងផ្សំងាយៗ
មនុស្សស្រីពិបាកចិត្តជាងគេនៅពេលសក់ប្រែជាសំពីងសំពោងដូចសំបុកមាន់ មើលទៅរញ៉េរញ៉ៃមិនមានសណ្ដាប់ធ្នាប់។ ដោយសារតែសក់បាត់ជាតិសំណើម ស្ងួត ត្រូវកម្ដៅខ្លាំង និងជាតិពុលព្រមទាំងសារជាតិគីមីក្នុងសាប៊ូកក់សក់ច្រើន ធ្វើឲ្យសក់បាត់សោភណភាពទៅជាសំពោងជាដើម។
កញ្ញា សូមទម្លាយអាថ៌កំបាំងធ្វើឲ្យសក់ទន់ស្អាត រលោងតាមវិធីធម្មជាតិខាងក្រោម ដែលមិនពិបាកធ្វើ ហើយថែមទាំងងាយរកគ្រឿងផ្សំបានទៀតផង៖
១. ប្រេងដូងនិងក្រូចឆ្មា
ប្រេងដូង ជួយសក់ឲ្យមានសំណើមខ្ពស់ និងផ្ដល់ប្រូតេអ៊ីនដល់សក់ឲ្យទន់រលោង និងកាត់បន្ថយសក់ជ្រុះផងដែរ។ ចំណែកក្រូចឆ្មាវិញ ផ្ទុកវីតាមីនC ជួយបណ្តុះសក់ឲ្យលូតលាស់ល្អ។
-គ្រឿងផ្សំ៖ ប្រេងដូងមួយកែវតូច និងក្រូចឆ្មាមួយផ្លែ
-វិធីប្រើ៖ លាយរបស់ពីរនេះបញ្ចូលគ្នា ហើយទុកក្នុងទូទឹកកកប្រហែលមួយម៉ោង ។ បន្ទាប់មកលាបវាជាផ្នែកៗលើសក់របស់អ្នកឲ្យពេញក្បាល រួចទើបយកថង់គ្របសក់ដោយទុកចោលប្រហែល២០នាទី។ បន្ទាប់មកលាងជម្រះវាចេញដោយទឹកធម្មតា អ្នកនឹងទទួលបានសក់ស្អាតដូចបំណង។
២. ប្រទាលកន្ទុយក្រពើ និងប្រេងអូលីវ
ប្រទាលកន្ទុយក្រពើជាប្រភពវីតាមីននិងផ្ដល់សំណើមដល់សក់យ៉ាងអស្ចារ្យ។ រីឯប្រេងអូលីវ ជួយរំញោចឫសសក់ឲ្យដុះលូលាស់ និងមានសុខភាពល្អ។
-គ្រឿងផ្សំ៖ ចិតយកសាច់ចាហួយរបស់ប្រទាលកន្ទុយក្រពើមួយចានតូច និងប្រេងអូលីវកន្លះស្លាបព្រាកាហ្វេ
-វិធីប្រើ៖ កម្ដៅប្រេងអូលីវក្ដៅបន្តិច ហើយលាយច្របល់គ្នាឲ្យសព្វល្អជាមួយចាហួយប្រទាលកន្ទុយក្រពើ ។ យកល្បាយនេះមកលាបលើសក់តាំងពីគល់ដល់ចុងសក់ ហើយគ្របក្បាលប្រហែល៤៥នាទី។ បន្ទាប់មកលាងជាមួយសាប៊ូកក់សក់ និងកុំប្រើក្រែមបន្ទន់។
៣. ស្រាបៀរ
ក្រៅពីផឹកឲ្យស្រវឹង ស្រាបៀរអាចចិញ្ចឹមសក់ឲ្យទន់រលោង និងមិនជំពាក់ជំពិន។
-គ្រឿងផ្សំ៖ ស្រាបៀរមួយកំប៉ុង
វិធីប្រើ៖ កក់សក់ជាមួយសាប៊ូដោយចាក់ស្រាបៀរលើសក់ និងអ្នកត្រូវឈ្លីស្បែកក្បាលឲ្យរបស់ពីរនេះជ្រាបសូលសរសៃសក់បានល្អ។ ប្រហែល៥ទៅ១០នាទី លាងជម្រះសក់ចេញដោយប្រើទឹកធម្មតា។
៤. ទឹកដោះគោជូរ និងទឹកឃ្មុំ
ទឹកដោះគោជូរមានសារធាតុចិញ្ចឹមយ៉ាងពិសេសដល់សក់ឲ្យភ្លឺរលោង រួមទាំងការពារសក់ឲ្យចៀសផុតពីស្ងួតបែកចុងផងដែរ។ សម្រាប់ទឹកឃ្មុំវិញ មានផ្ទុក Emollient ដែលមានគុណសម្បត្តិជួយសក់មានសំណើម មិនស្ងួត និងសំពោង។
-គ្រឿងផ្សំ៖ ទឹកដោះគោជូរ ២ -៣ ស្លាបព្រាកាហ្វេ និងទឹកឃ្មុំ១ស្លាបព្រាកាហ្វេ
-វិធីប្រើ៖ យកទឹកដោះគោជូរនិងទឹកឃ្មុំលាយចូលគ្នាក្នុងចានកូរឲ្យសព្វល្អ រួចយកល្បាយនេះមកឈ្លីលើសក់ក្បាល ហើយទុកប្រហែល៣០នាទី ។ បន្ទាប់លាងសក់ចេញដោយទឹកត្រជាក់ធម្មតា។
៥. ចេក ទឹកឃ្មុំ និងប្រេងដូង
ផ្លែចេកជួយផ្ដល់សំណើមសក់ បំប៉នសរសៃសក់ឲ្យទន់រលោងនិងរឹងមាំល្អ។ ប្រសិទ្ធភាពនៃផ្លែចេក ទឹកឃ្មុំ និងប្រេងដូងលាយបញ្ចូលគ្នា ជួយសក់ឲ្យឈប់ខូច និងបង្កើនប្រូតេអ៊ីនដល់សក់។
-គ្រឿងផ្សំ៖ ចេកទុំ២ផ្លែ ទឹកឃ្មុំមួយស្លាបព្រាកាហ្វេ ប្រេងដូងមួយស្លាបព្រាកាហ្វេ
-វិធីប្រើ៖ យកចេកកិនបំបែកឲ្យម៉ត់ល្អទុកក្នុងចាន បន្ទាប់មកដាក់ទឹកឃ្មុំច្របល់ឲ្យសព្វ រួចបន្ថែមប្រេងដូង និងប្រេងអូលីវលាយចូលគ្នា។ ពេលបានល្បាយនេះហើយ យកមកលាបពីលើស្បែកក្បាលនិងសក់ឲ្យសព្វល្អ។ ទុកប្រមាណ ៥ទៅ១០នាទី អ្នកអាចលាងចេញបានដោយប្រើទឹកក្តៅឧណ្ហៗ។
៦. ស៊ុតនិងប្រេងអាល់ម៉ុន
ស៊ុត ជួយរំញោចឬសសក់ឲ្យមានសុខភាពល្អ និងបំប៉នសក់ឲ្យលូតលាស់ល្អ។ បប្រេងអាល់ម៉ុន ជួយថែរក្សាសក់ឲ្យមានសំណើមទ្វេដង និងមានលក្ខណៈសម្បត្តិប្រឆាំងនឹងការរលាកជួយសម្រួលសល់ស្បែកក្បាលមិនឲ្យរមាស់។
-គ្រឿងផ្សំ៖ ស៊ុតមួយគ្រាប់ និងប្រេងអាល់ម៉ុន កន្លះស្លាបព្រាកាហ្វេ
-វិធីប្រើ៖ គោះស៊ុតដាក់ក្នុងចាន ហើយដាក់ប្រេងអាល់ម៉ុនច្របល់គ្នារហូតដល់ល្បាយរលាយចូលគ្នាល្អ។ យកល្បាយនេះមកលាបលើសក់ ដោយទុកចោលពី ៣៥ទៅ ៤០នាទី។ បន្ទាប់មកកក់សក់ចេញ និងអ្នកអាចប្រើក្រែមបន្ទន់បានផងដែរ។
.៧ ផ្លែល្ពៅ និងទឹកឃ្មុំ
ផ្លែល្ពៅ ផ្ទុកអង់ស៊ីមនិងអាស៊ីតអាមីណូជួយចិញ្ចឹមឫសសក់ ឲ្យសក់ដុះបានល្អ លូតលាស់និងមានសុខភាពល្អ។
-គ្រឿងផ្សំ៖ ផ្លែល្ពៅកិនពូតយកទឹកមួយពែង និងទឹកឃ្មុំពីរស្លាបព្រាកាហ្វេ
-វិធីប្រើ៖ យកចានដាក់ទឹកល្ពៅនិងទឹកឃ្មុំ លាយចូលគ្នាឲ្យសព្វល្អ រួចយកមកលាបឲ្យសព្វសក់។ ទុកប្រហែល៣០ - ៤៥នាទី ហើយលាងសក់ចេញដោយសាប៊ូធម្មតា។
ចុចអាន៖ រូបមន្តងាយៗ ធ្វើនៅផ្ទះខ្លួនឯងជួយកម្ចាត់មុនបានយ៉ាងស័ក្ដិសិទ្ធិ