ពេលរលាកកុំចេះតែលាបថ្នាំដុសធ្មេញតាមគ្នាប្រយ័ត្នជួបរឿងហួសចិត្តបែបនេះ
- 2019-06-19 11:00:00
- ចំនួនមតិ 0 | ចំនួនចែករំលែក 0
ពេលរលាកកុំចេះតែលាបថ្នាំដុសធ្មេញតាមគ្នាប្រយ័ត្នជួបរឿងហួសចិត្តបែបនេះ
មានវិធីជាច្រើន ដែលអ្នកធ្លាប់ឮតៗគ្នា ព្រមទាំងយកមកអនុវត្តនៅផ្ទះដោយខ្លួនឯង ដើម្បីព្យាបាលជំងឺ ឬបំបាត់ការឈឺចាប់ផ្សេងៗ។ យ៉ាងណាមិញ វិធីទាំងអស់មិនមែនសុទ្ធតែល្អ មានប្រសិទ្ធភាពនោះទេ ស្រួលមិនស្រួលអ្នកអាចនឹងជួបរឿងខកចិត្តមិនខាន។
លោកវេជ្ជបណ្ឌិត Dr Kamarul Ariffin បានបង្ហោះសារនៅ Twitter ដោយបញ្ជាក់ថា ប្រសិនបើអ្នកមានរលាកនៅផ្ទះ អ្នកតែងតែឮតៗគ្នា ឲ្យលាបថ្នាំដុះធ្មេញ ពងមាន់ ទឹកស៊ីអ៊ីវ...ដើម្បីឲ្យធូរស្រាល។ ផ្ទុយទៅវិញ វេជ្ជបណ្ឌិតជនជាតិម៉ាឡេស៊ីរូបនេះ បាននិយាយទៀតថា វិធីទាំងអស់អាចបណ្ដាលឲ្យកន្លែងរលាកកាន់តែយ៉ាប់យ៉ឺនជាងមុន។
ដូចក្នុងរូបភាព ដែលគាត់បានបង្ហោះមកជាមួយគ្នានេះដែរ មានមនុស្សម្នាក់បានរលាកដៃជាមួយនឹងខ្លាញ់ក្តៅ ហើយក៏សម្រេចចិត្តលាបថ្នាំដុសធ្មេញត្រង់កន្លែងរបួស។ សំណាងអាក្រក់ ស្ថានភាពកាន់តែយ៉ាប់យ៉ឺន កាន់តែហើមខ្លាំងឡើងៗ សឹងតែមើលដៃលែងស្គាល់។
វេជ្ជបណ្ឌិត Kamarul និយាយថា វិធីព្យាបាលនៅផ្ទះ អាចនាំឲ្យក្តៅរោលរលាក និងចម្លងមេរោគបានយ៉ាងងាយ។ គាត់ពន្យល់ថា ការរលាកមាន៣ដំណាក់កាល ទី១ ទី២ និងទី៣។ ដំណាក់កាលទី១ អ្នករងរបួស អាចមានអារម្មណ៍ឈឺចាប់ មានស្នាមក្រហម ប៉ុន្តែគ្មានពងបែកនោះទេ។ ដំណាក់កាលទី២ កន្លែងរលាកមានពងបែក ឈឺចាប់ និងមានស្នាមក្រហម។ សម្រាប់ដំណាក់កាលទី៣វិញ ស្បែកប៉ោងឡើងលាយឡំជាមួយនឹងពណ៌ស ប្តូរទម្រង់តែមិនដឹងឈឺនោះទេ ដោយសារចុងសរសៃត្រូវបានខូចខាតអស់ហើយ។
យល់ល្អពេលមានរលាកផ្សេងៗ គួរប្រើវិធីខាងក្រោមជំនួសវិញ៖
១. ត្រូវយកអ្នករងរបួសចេញពីកន្លែងគ្រោះថ្នាក់ឲ្យបានលឿនបំផុត ធ្វើចិត្តឲ្យត្រជាក់ ហាមស្លន់ស្លោ។
២. ដោះគ្រឿងអលង្ការ សម្លៀកបំពាក់ និងគ្រឿងលម្អផ្សេងៗដែលត្រូវនឹងកម្តៅចេញពីខ្លួនសិន។
៣. ដាក់កន្លែងរលាកជាមួយទឹកធម្មតា ឲ្យបានពី១៥-២០នាទី ដើម្បីទប់ស្កាត់កុំឲ្យចេញពងបែក។ ដាច់ខាតកុំប្រើទឹកត្រជាក់ឬទឹកកក ព្រោះវាអាចនាំឲ្យរបួសក្រជាសះស្បើយដូចដើម។
៤. បើមានពងបែកតិចតួច គួរទុកឲ្យជាសះស្បើយតាមធម្មជាតិ ហាមញេចបំបែក។ អាចការពារកន្លែងរបួស ដោយប្រើបង់បិទបាន។
យ៉ាងណាក៏ដោយ ប្រសិនបើអ្នករលាកក្នុងដំណាក់កាលទី២ឬ៣ គួរទៅមន្ទីរពេទ្យឬគ្លីនិក ដែលនៅជិតបំផុត ដើម្បីសង្រ្គោះនិងព្យាបាលតាមរបៀបត្រឹមត្រូវ។ អ្នកក៏អាចប្រើប្រទាលកន្ទុយក្រពើបានដែរ បើសិនជាស្ថិតក្នុងដំណាក់កាលទី១៕ ចុចអានបន្ត៖