ស្ងៀមស្ងាត់មិនប្រាកដថាឈប់ស្រលាញ់ តែស្ងាត់យូរ អាចបាត់គ្នាជារៀងរហូត
- 2019-06-19 02:30:00
- ចំនួនមតិ 0 | ចំនួនចែករំលែក 0
ស្ងៀមស្ងាត់មិនប្រាកដថាឈប់ស្រលាញ់ តែស្ងាត់យូរ អាចបាត់គ្នាជារៀងរហូត
ដោយសារតែស្ងៀមស្ងាត់ទើបយើងមិនដឹងគូភាគីកំពុងឈឺដល់ថ្នាក់ណា ហើយគេក៏ដូចគ្នា។ ដោយសារតែស្ងៀមស្ងាត់ ពីមួយថ្ងៃទៅមួយថ្ងៃ អ្នកទាំង២កំពុងសម្លាប់ទឹកចិត្តគ្នាហើយ។
មានស្នេហាមួយចំនួន ស្រលាញ់គ្នាខ្លាំងស្ទើរលេប សឹងតែអាចធ្វើអ្វីបានគ្រប់យ៉ាងដើម្បីគ្នា តែចុងបញ្ចប់បានត្រឹមបែកគ្នាក្នុងក្ដីស្ងៀមស្ងាត់ទៅវិញ។ និយាយឲ្យចំទៅ វាគ្រាន់តែប្រៀបដូចជាល្បែងមួយសម្រាប់យុវវ័យ ហើយអ្វីដែលឆោតបំផុតនោះគឺ គ្មានអ្នកណាហើបមាត់ស្រដីសូម្បីមួយម៉ាត់។
ការពិតទៅ មនុស្សស្រីគឺពិតជាស្មុគស្មាញខ្លាំងណាស់ កាលពីមុន រាល់ពេលឈ្លោះគ្នានឹងសង្សារម្ដងៗ ខ្ញុំតែងតែបិទទូរសព្ទ ហើយបិទ Facebook ដើម្បីកុំឲ្យគេផ្ញើសារមកបាន តែដៃកាន់ទូរសព្ទឡើងជាប់ រង់ចាំសាររបស់គេទៅវិញ។ ក្រោយមកក៏បើកទូរសព្ទវិញ ដើម្បីមើលថាគេនិយាយអ្វី ស្ដីឲ្យគេតែប៉ុន្មានម៉ាត់ ក៏ត្រូវគ្នាវិញ។
យូរៗទៅ ស្នេហារបស់ពួកខ្ញុំរឹតតែពិបាកតាម ខ្ញុំមួម៉ៅកាន់តែច្រើន គាត់កាន់តែហត់។ រយៈពេលខឹង និងឈ្លោះគ្នាកើនឡើង គម្លាតពេលនៃភាពស្ងប់ស្ងាត់ក៏កាន់តែយូរជាងមុន។
ស្ងៀមស្ងាត់មិនប្រាកដថាអស់ស្រលាញ់ ខ្ញុំនៅតែតាមដានគាត់ នៅតែនឹកគាត់ តែរវាងពួកខ្ញុំដូចមានរនាំងអ្វីមួយ មិនអាចបើកមាត់បាន។ មិនដឹងដោយសារតែហេតុផលអ្វី ពួកខ្ញុំត្រូវបាត់គ្នាដោយសារភាពស្ងៀមស្ងាត់។ ជីវិតពិតជាពិបាកនិយាយមុនខ្លាំងណាស់ ថ្ងៃដែលពួកយើងស្ងៀមស្ងាត់ គ្រាន់តែគិតថាខឹងគ្នាប៉ុន្មានថ្ងៃប៉ុណ្ណោះ តែកាន់តែយូរទៅ រឹតតែពិបាកបើកមាត់និយាយដាក់គ្នា ជាលទ្ធផលក៏បែកគ្នាដោយមិនដឹងខ្លួន។
ដោយសារតែស្ងៀមស្ងាត់ ទើបមិនដឹងថាគេកំពុងគិតអ្វី ដោយសារតែស្ងៀមស្ងាត់ទើបទ្រាំការឈឺតែម្នាក់ឯង។ ដោយសារតែស្ងៀមស្ងាត់ ទើបចំណងនេះគ្មានសម្រាយ ឃ្លាតចេញពីគ្នាពីពេលណាក៏លែងដឹង។ ដូចនេះហើយ បើនៅស្រលាញ់ សូមកុំស្ងៀមស្ងាត់ សុខចិត្តមុខក្រាស់បន្តិចក៏គ្រាន់ជាងបាត់គ្នារហូត៕
ចុចអាន៖ ពាក្យ ៧ ឃ្លាធ្វើឲ្យគូស្នេហ៍លែងស្និទ្ធស្នាល រហូតអាចឃ្លាតឆ្ងាយពីគ្នាតែម្ដង