Dear my សង្សារ! អាចទេ សន្យានឹងខ្ញុំថាអ្នកនៅបែបនេះជារៀងរហូត មិនប្រែ?

2019-06-13 07:30:00
ចំនួនមតិ 0 | ចំនួនចែករំលែក 0

ពេលនេះម៉ោងនេះខ្ញុំកំពុងឱបអ្នក ខ្ញុំមិននិយាយអ្វី តែខ្ញុំកំពុងតែត្រូវបានគំនិតមួយរត់ត្របាញ់ពេញខួរក្បាល នោះគឺ តើខ្ញុំអាចឱបអ្នកដល់ពេលណា? តើយើងនៅមានពេលសេសសល់បានប៉ុន្មានទៀត? តើអ្នកនឹងនៅតែជាអ្នករបៀបនេះបានដល់ពេលណា? តើអ្នកនឹងផ្លាស់ប្ដូរទៅជាធុញទ្រាន់នឹងខ្ញុំដូចសង្សារចាស់ខ្ញុំទេ? បើអ្នកផ្លាស់ប្ដូរ តើខ្ញុំនឹងយំ ខូចចិត្តយ៉ាងណាទៅ?

វាជាអារម្មណ៍មួយដែលនៅដក់ជាប់នឹងបេះដូងមួយនេះរហូតមក។ ខ្ញុំទទួលស្គាល់ថា ដោយសារខ្ញុំមិនចូលចិត្តបើកចំហទំនាក់ទំនង វាក៏ធ្វើឲ្យខ្ញុំរងគំនិតដែលគាបសង្កត់អារម្មណ៍មួយចំនួនបែបនោះ ។ អារម្មណ៍ដែលអាចបាត់បង់គេ អារម្មណ៍ដែលគិតថាគេអាចនឹងក្បត់ និងអារម្មណ៍ដែលធ្វើឲ្យខ្ញុំនៅមិនសុខផ្សេងៗទៀត។ ប៉ុន្តែរាល់ថ្ងៃនេះ ខ្ញុំចង់ប្រាប់អ្នកថា ខ្ញុំមានក្តីសុខខ្លាំងណាស់ ពេលនៅជាមួយអ្នក អ្នកព្យាយាមរក្សាទឹកចិត្តខ្ញុំទោះបីខ្ញុំរករឿង ង៉ក់ងនឹងអ្នកយ៉ាងណាក៏ដោយ។

ទង្វើអ្នក ទោះថាវាមិនរ៉ូមែនទិកដូចអ្នកដទៃ តែវាក៏គ្រប់គ្រាន់នឹងធ្វើឲ្យខ្ញុំសប្បាយចិត្តបាន។ អ្នកមិនបានទុកខ្ញុំឲ្យនៅម្នាក់ឯងដូចអ្នកដទៃ អ្នកព្យាយាមធ្វើឲ្យខ្ញុំសប្បាយចិត្ត នាំខ្ញុំញ៉ាំអ្វីដែលខ្ញុំចង់ញ៉ាំ កំដរមើលរឿង ចែករំលែកនំចំណីដែលអ្នកមានឲ្យខ្ញុំ អាវក្រៅរបស់អ្នកដែលឲ្យខ្ញុំពាក់ ចិញ្ចៀនអ្នកដែលខ្ញុំពាក់រាល់ថ្ងៃ ។គ្រប់យ៉ាងនេះ ទោះថាអ្នកក្រៅមើលមកថាយើងមិនសមនឹងគ្នាបែបណា តែវាមានន័យណាស់សម្រាប់ខ្ញុំ។ ខ្ញុំមិនដឹងទេថា យើងនឹងនៅបែបនេះបានរហូតដល់ពេលណា។

ខ្ញុំគ្រាន់តែសង្ឃឹមថា អ្នកនឹងនៅក្បែរខ្ញុំរហូត កំដរខ្ញុំ ឱបខ្ញុំពេលខ្ញុំយំ និងមិនលែងដៃក្មេងល្ងង់ម្នាក់នេះដូចអ្នកដទៃនោះទេ។ ខ្ញុំមិនចេះប្រើពាក្យស្រលាញ់នឹងផ្អែមល្ហែមដូចគេទេ ប៉ុន្តែខ្ញុំអាចសន្យាបានថាខ្ញុំនឹងមិនបោះបង់អ្នក ឬ ក្បត់អ្នកដូចស្រីផ្សេងទៀតដែរ។