កុំឲ្យប្រាសាទខ្នារឯកាទៀត បបួលគ្នាទៅលេងទេសភាពផ្ការីក ទាក់ចិត្តមិនធម្មតា

2019-06-10 06:30:00
ចំនួនមតិ 0 | ចំនួនចែករំលែក 0

នេះជាទេសភាពស្អាតជាប់ចិត្ត មានផ្កាព្រៃនិងរុក្ខជាតិបៃតងដុះតាមដងជណ្ដើរជាង២ពាន់កាំ កំដរលោកអ្នកឡើងទៅកំពូលប្រាសាទ ស្ថិតនៅតាមជួរភ្នំដងរែក ព្រំដែនកម្ពុជាថៃ ក្នុងទឹកដីឧត្តរមានជ័យ។ នោះគឺនៅប្រាសាទខ្នារ ដែលស្ថិតក្នុងភូមិទឹកចោល សង្កាត់កូនក្រៀល ក្រុងសំរោង ដែលធ្វើឲ្យលោកអ្នកបំបាត់ទុក្ខកង្វល់ពេលបានទៅលេងនៅប្រាសាទនេះ ដែលធ្លាប់តែឯកោ មិនសូវមានអ្នកទេសចរណាទៅដល់។

ថ្វីបើប្រាសាទនេះរងការបែកបាក់ ខូចខាតស្ទើរទាំងស្រុង តែអ្វីដែលចងភ្ជាប់ចិត្តភ្ញៀវទេសចរឲ្យលាន់មាត់សរសើរគឺ ទីនោះមានខ្យល់បរិសុទ្ធ ព្រៃឈើខៀវខ្ចី ហើយនៅផ្នែកខាងក្រោមក្បែរជើងភ្នំ មានវាលស្រែ និងដំណាំចម្ការចម្រុះពណ៌បៃតង។

លោកអ្នកត្រូវដើរតាមជណ្ដើរឈើទើបសាងសង់មានចំនួន ១១៨១ កាំ ដើម្បីឃើញឲ្យជាក់នឹងភ្នែកនូវទិដ្ឋភាពស្អាតគ្មានពីរ ក្នុងរដូវកាលនេះ។ ទោះបីខ្ពស់បន្តិច និងប្រើរយៈពេលយូរគួរសមដើម្បីឡើងដល់ តែនៅតាមដងផ្លូវលោកអ្នកនឹងភ្ញាក់ផ្អើលជាមួយទេសភាពបៃតងខ្ចី ដុះអមសងខាងជណ្ដើរ ប្រៀបដូចបរិវារហែរហមមិនឲ្យអ្នកអផ្សុកឡើយ។ លើសពីនេះ ផ្ការីកចម្រុះនឹងរុក្ខជាតិ លតាវល្លិ៍បន្សំគ្នា បង្កើតជាទេសភាពមួយបែបទៀត ឲ្យអ្នកបានទៅលេងថតរូបមិនជិនណាយ។

បច្ចុប្បន្នប្រាសាទខ្នារ ត្រូវបានអាជ្ញាធរខេត្ត និងកងកម្លាំងយោធាការពារព្រំដែនបានស្ថាបនាផ្លូវ ដោយធ្វើជណ្ដើរឈើឡើង ។ ដូច្នេះមានមនុស្សម្នាទៅកម្សាន្តច្រើនតែចំថ្ងៃចុងសប្ដាហ៍ ឬមុនថ្ងៃបុណ្យធំៗ ចូលឆ្នាំនិងរដូវភ្ជុំបិណ្ឌមកដល់តែប៉ុណ្ណោះ។ កុំឲ្យប្រាសាទនេះបន្តឯកាទៀត កុំភ្លេចមកលេងឲ្យបានច្រើនទាំងអស់គ្នា៕