តើបញ្ចប់មិត្តភាពមួយ ពិបាកចិត្តជាងបែកបាក់ស្នេហាឬអត់?
- 2019-06-10 02:30:00
- ចំនួនមតិ 0 | ចំនួនចែករំលែក 0
តើបញ្ចប់មិត្តភាពមួយ ពិបាកចិត្តជាងបែកបាក់ស្នេហាឬអត់?
ទាល់តែបែកបាក់ស្នេហាច្រើនដង ទើបគេយល់ឃើញថា ការបញ្ចប់មិត្តភាពយូរឆ្នាំមួយ វាពិបាកចិត្តខ្លាំងយ៉ាងណា។
វិទ្យុកំពុងចាក់បទស្នេហាបែកបាក់ ទើបធ្វើឲ្យខ្ញុំដឹងថា តាមការពិត មានបទចម្រៀង រឿងភាគ រឿងភាពយន្ត ឆាកល្ខោនជាច្រើន ដែលនិយាយភាពបែកបាក់នៃស្នេហា តែកម្រមានស្នាដៃសិល្បៈណានិយាយពីការបែកបាក់នៃមិត្តភាពខ្លាំងណាស់។
តែការពិត បែកបាក់ស្នេហាមួយអាចគ្រាំគ្រាស្មើនឹងបែកបាក់មិត្តភាពឬអត់? មិត្តភាពមួយ អាចនិយាយបានថាឆ្លងកាត់ជាមួយគ្នាច្រើនរឿងណាស់ ខ្លះរាប់គ្នាតាំងពីនៅស្រាតងូតទឹកភ្លៀង រហូតដល់ចាស់មានគ្រួសាររៀងខ្លូនក៏មិនទាន់ភ្លេចគ្នា។ រហូតដល់អ្នកខ្លះមានសង្សារហើយ តម្លៃនៃមិត្តភាពក៏នៅតែខ្ពស់ជាងស្នេហាដែល។
មានអារម្មណ៍យ៉ាងណានៅពេលមិត្តភាពយូរឆ្នាំត្រូវដើរដល់ទាល់? ស្នេហាមួយនៅពេលបែកគ្នាសុទ្ធតែមានមូលហេតុជាក់លាក់ដូចជា៖ សង្សារក្បត់រត់តាមអ្នកផ្សេង មិនអាចជួបគ្នាព្រោះម៉ែឪបំបែក ឬរត់តាមលុយជាដើម ដោយភាគច្រើនសមីខ្លួនយើងជាអ្នករងគ្រោះ។
តែមូលហេតុនៃបែកបាក់មិត្តភាពគឺយ៉ាងម៉េចវិញ? មិត្តភាពមួយបញ្ចប់ទៅគឺមកពីមូលហេតុខាងក្រៅ ដូចជាគម្លាតភូមិសាស្ត្រ ភាពខុសគ្នានៃការគិត ក៏ដូចជាជម្រើសលើវិថីជីវិតផ្សេងៗគ្នា។ បើសិនជាស្នេហា នៅបែកគ្នា គឺគ្រាន់តែសុំបែកគ្នាជាការស្រេច តែបើមិត្តភាពវិញ គឺមិនបាននិយាយដាច់ស្រេចដូចនេះឡើយ ដោយនឹងដើរចេញពីជីវិតគ្នាដោយស្ងាត់ៗ ហើយបាត់ស្រមោលតែម្ដង។
ស្នេហាមួយបែកទៅ អ្នកទាំង២អាចក្លាយជាមិត្តភ័ក្ដិ ឬគេចមុខគ្នាមួយជីវិតក៏បាន តែមិត្តភាពមួយចប់ទៅ អ្នកនឹងមិនដឹងថា ធ្វើយ៉ាងម៉េចដាក់បុគ្គលមួយទៀត។ បើដើរជាមួយមិត្តភ័ក្កិរួមគ្នា នឹងមើលមុខម្នាក់នោះយ៉ាងម៉េច គួរនិយាយដាក់គ្នាឬអត់? ស្នេហាមួយ អាចចំណាយពេលបំភ្លេចបាន មិត្តភាពមួយ ប្រហែលជាដល់ពេលចាស់ទៅក៏មិនប្រាកដថាអាចសាបរលាភឡើយ ទោះលែងជាអ្វីនឹងគ្នាក៏ដោយ៕
ចុចអាន៖ រឿងពិតនឹកស្មានមិនដល់ដែលមនុស្សស្រីហ៊ានធ្វើពេលលួចក្បត់សង្សារ