ស្រលាញ់ចំមនុស្សស្រីដែលមានទំនុកចិត្តខ្ពស់លើខ្លួនឯង ប្រុសៗគួរដឹង ៥ យ៉ាងដែលនាងមាន
- 2019-06-05 11:00:00
- ចំនួនមតិ 0 | ចំនួនចែករំលែក 0
ស្រលាញ់ចំមនុស្សស្រីដែលមានទំនុកចិត្តខ្ពស់លើខ្លួនឯង ប្រុសៗគួរដឹង ៥ យ៉ាងដែលនាងមាន
មនុស្សពីរនាក់ស្រលាញ់គ្នាពិតប្រាកដ មិនមែនដោយសារតែការបង្ខំអារម្មណ៍នោះទេ គឺមកពីពួកគេសម្រេចចិត្តចង់បានបែបនេះ។ ក្នុងទំនាក់ទំនងស្នេហា អ្នកនឹងបានជួបប្រភេទមនុស្សផ្សេងៗគ្នា តែបើនិយាយដល់មនុស្សស្រីដែលមានទំនុកចិត្តខ្ពស់លើខ្លួនឯងវិញ ទោះបីជាពេលមានស្នេហា ក៏នាងមិនផ្តេកផ្តួលខ្លាំងលើបុរសដែលនាងស្រលាញ់ដែរ។ នាងរឹងមាំ វៃឆ្លាត និងដឹងថាគួរជ្រើសរើសផ្លូវណាដែលល្អសម្រាប់ជីវិតខ្លួនឯង។ យ៉ាងណាមិញ បើស្តាប់មួយភ្លែតទៅ ហាក់បីដូចនាងចាត់ទុកដៃគូមិនសូវសំខាន់ទាល់តែសោះ។ តាមការពិត បើបុរសណាមានទំនាក់ទំនងជាមួយនាង ទើបដឹងថានាងមានចំណុច ៥ យ៉ាង ខុសពីនារីដទៃផ្សេងទៀតដែលអ្នកគួរដឹង។
១. នាងមិនពឹងពាក់ចំពោះរឿងតូចតាច
មនុស្សស្រីដែលធ្លាប់តែមានជំហររឹងមាំលើខ្លួនឯង នាងនឹងមិនត្រូវការជំនួយក្នុងកិច្ចការតូចតាចកំប៉ិកកំប៉ុកឡើយ។ នាងមានទម្លាប់បែបនេះជាយូរមកហើយ ដូច្នេះនាងក៏អាចបន្តវាទៀតដែរ ទោះបីជានាងលែងនៅម្នាក់ឯងដូចមុនក្តី។ ចំពោះរឿងណាដែលមិនធំដុំ នាងគ្មានថ្ងៃមករំខានអ្នកផ្តេសផ្តាសដាច់ខាត។ នាងមានប្រាជ្ញា និងចេះសម្រេចចិត្ត ធ្វើអ្វីៗបានដោយខ្លួនឯង។ ត្រូវចំណាយពេលយូរបន្តិច ទម្រាំតែនាងអាចទុកចិត្តអ្នកពេញលេញ។
២. ពេលខ្លះនាងចង់នៅម្នាក់ឯង
មិនមែនមកពីនាងមិនចូលចិត្ត ឬមិនចង់នៅក្បែរអ្នកទេ។ ដោយសារតែនាងជាមនុស្សស្រីដែលស៊ាំនឹងភាពឯករាជ្យ ដូច្នេះហើយនាងតែងចង់មានពេលវេលានៅម្នាក់ឯងឲ្យបានច្រើន។ យ៉ាងណាមិញ អ្នកមិនគួរប្រកាន់ខឹង ឬចាត់ទុកវាជាបញ្ហាធំដុំអីពេកទេ។ បើចង់ឲ្យស្នេហា រីកចម្រើនទៅមុខ ត្រូវយោគយល់ បើកចិត្តចំពោះនាង។
៣. នាងត្រូវចំណាយពេលយូរមុននឹងសម្រេចចិត្តទទួលយកអ្នក
ត្រូវចាំទុកក្នុងចិត្តឲ្យច្បាស់ថា នារីប្រភេទនេះ មិនងាយទុកចិត្ត មិនងាយមានទំនាក់ទំនងជាមួយបុរសណាម្នាក់ណាស់។ បើទោះជានាងបើកទ្វារឲ្យអ្នកចូលមកក្នុងជីវិតក៏ដោយ នាងត្រូវការចំណាយពេលវេលាច្រើន ដើម្បីសង្កេតតាមដានមើល មុននឹងជ្រើសរើសអ្នកជាដៃគូពិតប្រាកដ។ ម្យ៉ាងវិញទៀត នាងខ្លាចបំផុត ការសម្រេចចិត្តខុស ព្រោះវាអាចធ្វើឲ្យនាងខូចចិត្ត ខកបំណងខ្លាំងជាងអ្វីៗទាំងអស់។
៤. នាងក្លាហានក្នុងការបញ្ចេញមតិផ្សេងៗ
នាងអាចមនុស្សស្រីដែលរឹងមាំខ្លាំង ក្នុងចំណោមមនុស្សស្រីដទៃទៀតដែលអ្នកធ្លាប់បានជួបពីមុន។ នាងក៏មិនត្រូវការឲ្យនរណាមកដាក់បញ្ជាលើនាងដែរ ប៉ុន្តែបើវាជាគំនិតល្អនាងនៅចាំស្តាប់ជានិច្ច។ នាងមិនមែនរឹងរូសអីនោះដែរ គ្រាន់តែនាងក្លាហានក្នុងការបញ្ចេញមតិផ្សេងៗដែលខ្លួនមាន មិនចូលចិត្តលាក់ទុកឡើយ។
៥. នាងជឿជាក់នូវអ្វីដែលខ្លួនមាន
គ្រប់យ៉ាងដែលនាងមាន មិនថារូបសម្បត្តិក្តី ចិត្តគំនិតក្តី នាងតែងតែពេញចិត្តនូវអ្វីដែលខ្លួនមាន មិនងាយផ្លាស់ប្តូរដើម្បីផ្គាប់ចិត្តនរណាឡើយ។ នេះជាអ្វីដែលអ្នកគួរដឹងមុនដូចគ្នា បើមានចិត្តស្រលាញ់នាងមែន កុំព្យាយាមផ្លាស់ប្តូរនាងអី ត្រូវទទួលយកនូវលក្ខណៈសម្បត្តិរបស់នាង ហើយខំថែរក្សាស្នេហារវាងអ្នកទាំងពីរឲ្យបានល្អផង ព្រោះនារីបែបនេះបើដាក់ស្រលាញ់បុរសណាម្នាក់ហើយ នាងគ្មានថ្ងៃប្រែចិត្តងាយៗឡើយ៕
ចុចអានបន្ត៖