សង្សារចាស់នៅតែមិនដាច់ចិត្តឈប់ស្រលាញ់អ្នក បើនៅមានសញ្ញាទាំងនេះ

2019-06-03 05:30:00
ចំនួនមតិ 0 | ចំនួនចែករំលែក 0

ស្នេហាអាចទុកជារបស់មានតម្លៃម្យ៉ាងនៅក្នុងជីវិតរបស់មនុស្ស។ នៅពេលលង់ស្នេហ៍ជ្រាលជ្រៅជាមួយនរណាម្នាក់ អ្នកនឹងហ៊ានលះបង់ពេលវេលា លុយកាក់ និងកម្លាំងកាយកម្លាំងចិត្តដើម្បីគេ។ បើថ្ងៃណាមួយ ស្នេហាដើរដល់ផ្លូវបំបែក អ្វីដែលរងគ្រោះខ្ទេចខ្ទាំខ្លាំងជាងគេបង្អស់គឺបេះដូង។ ទោះបីជាអ្នកនិងគាត់មានគម្លាតពីគ្នាក៏ដោយ ការចងចាំល្អៗកាលពីអតីតកាល នៅតែដក់ជាប់ខួរក្បាល មិនអាចបំភ្លេចបានងាយៗឡើយ។ ចង់ដឹងថា តើសង្សារចាស់នៅតែមានចិត្តស្រលាញ់នឹកគិតដល់អ្នកមែនដែរអត់? អាចសង្កេតមើលតាមសញ្ញាខាងក្រោមនេះបាន។

១. ផ្ញើសារជូនពរ ក្នុងថ្ងៃខួបកំណើតរបស់អ្នក

ឲ្យតែដល់ថ្ងៃខួបកំណើតអ្នក គាត់មិនដែលភ្លេចជូនពរម្តងណាទេ។ ត្រឹមតែការផ្ញើសារ មើលទៅហាក់បីដូចជាគ្មានអ្វីធំដុំពិតមែន ប៉ុន្តែវាសបញ្ជាក់ឲ្យឃើញថា គាត់មិនទាន់ដាច់អាល័យពីអ្នក ហើយនៅតែបារម្ភខ្វល់ខ្វាយនឹកគិតដល់ថ្ងៃសំខាន់របស់អ្នកដូចដើម។

២. ផ្ញើសារចម្លែកៗមកដូចអ្នកស្រវឹង

ពេលខ្លះគាត់មិនមែនស្រវឹងទេ ប៉ុន្តែចូលចិត្តផ្ញើសារចម្លែកៗមកឲ្យអ្នក ឬចុចខលមកនៅពាក់កណ្តាលអាធ្រាត្រឬជិតភ្លឺជាដើម។ ជាពិសេស បើអ្នកលើកទូរសព្ទរបស់គាត់ គាត់តែងមានទុក្ខលំបាកក្នុងចិត្តចង់ប្រាប់ឲ្យអ្នកដឹងថាគាត់មិនទាន់អស់ចិត្តស្រលាញ់នៅឡើយទេ គ្រាន់តែពេលខ្លះធ្វើជាបញ្ឆិតបញ្ឆៀងមិនហ៊ាននិយាយចេញ។

៣. គាត់ព្យាយាមផ្លាស់ប្ដូរខ្លួនឯងដើម្បីអ្នក

គាត់ខិតខំព្យាយាមធ្វើគ្រប់បែបយ៉ាងដើម្បីភាពជោគជ័យលើកិច្ចការអ្វីមួយ ដើម្បីទាមទារចំណាប់អារម្មណ៍សារជាថ្មីពីអ្នក។ គាត់ផ្លាស់ប្តូរទាំងអត្តចរិត ទាំងរបៀបរស់នៅ មានទម្លាប់ល្អ ដើម្បីតម្រូវនូវអ្វីដែលអ្នកចង់ឲ្យគាត់ធ្វើពីមុន។

៤. គាត់នៅតែរក្សាទំនាក់ទំនងល្អក្នុងបណ្តាញសង្គម

គាត់ឆាតមកលេង ចុចLike ថែមទាំងតាមដានអ្នកគ្រប់រឿងនៅក្នុងបណ្តាញសង្គមទៀតផង។ គាត់ដឹងថាអ្នកធ្វើអ្វី ទៅកន្លែងណា ជាមួយអ្នកណា ព្រោះគាត់មិនដែលខកខានចូលមើល Profile និង Story របស់អ្នកឬមិត្តភ័ក្តិដែលដើរជាមួយគ្នានោះទេ។

៥. មានបំណងធ្វើឲ្យអ្នកប្រចណ្ឌ

នេះជាដំណាក់កាលដែលមនុស្សប្រុសចូលចិត្តធ្វើ នៅពេលទើបតែបែកគ្នាថ្មីៗ។ បើអ្នកឃើញគាត់បង្ហោះរូបជាមួយមនុស្សស្រី ដើរលេងជាមួយមិត្តភ័ក្តិស្រីៗ មានន័យថា គាត់មានបំណងចង់ធ្វើឲ្យអ្នកប្រចណ្ឌហើយ។ ហេតុនេះ កុំបាច់ខឹងអី ហើយក៏មិនចាំបាច់រកវិធីចង់ឈ្នះ នាំតែខាតពេលដែរ។

៦. គាត់លួចសួរមិត្តភ័ក្តិពីស្ថានភាពរបស់អ្នកបន្ទាប់ពីបែកគ្នា

ប្រសិនបើគាត់ឆ្លៀតតាមសួរ មនុស្សដែលរាប់អានគ្នាជាមួយអ្នក ចង់ដឹងពីសុខទុក្ខនិងស្ថានភាពរបស់អ្នកបន្ទាប់ពីបែកគ្នា គឺបង្ហាញថាគាត់នៅមានក្តីបារម្ភនិងមនោសញ្ចេតនា ប៉ុន្តែមិនហ៊ានឲ្យដឹង។

៧. នៅតែរក្សារូបថតរបស់អ្នកនៅក្នុងទូរសព្ទនិងក្នុងបណ្តាញសង្គម

គាត់អាចនឹងបង្ហោះរូបភាពដែលមានអ្នកនៅក្នុងនោះ រំឭករឿងអតីតកាលល្អធ្លាប់សាងជាមួយគ្នា។ ទោះពេលខ្លះមិនហ៊ានបង្ហាញរូបថត ប៉ុន្តែអាចបង្ហោះនូវឃ្លាស៊ីអារម្មណ៍ ចង់សំដៅមកលើរូបអ្នក ចង់ឲ្យអ្នកចូលតួដូចជាគាត់ដែរ។

ពិតហើយ ការបែកបាក់មិនមែនជារឿងងាយស្រួល វាត្រូវការពេលវេលាយូរទម្រាំអាចត្រលប់ទៅរកសភាពល្អប្រសើរឡើងវិញ។ យ៉ាងណាក៏ដោយ ត្រូវចាំទុកក្នុងចិត្តថា បើម្នាក់នោះមិនព្រមកែប្រែ គ្មានទំនួលខុសត្រូវ គ្មានភាពក្លាហានគ្រប់គ្រាន់ដើម្បីជួសជុលស្នាមរបួសនោះទេ ដាច់ខាតកុំរត់ត្រលប់ក្រោយទៅរកគេវិញអី។ ត្រូវរស់នៅជាខ្លួនឯង រស់នៅក្នុងជីវិតមួយដែលអ្នកស័ក្តិសមនឹងទទួលបាន៕

ចុចអានបន្ត៖