មិនអស់លុយមួយកាក់ គន្លឹះងាយៗ៥យ៉ាងឲ្យជីវិតស្រស់ស្រាយតាំងពីក្រោកពីគេង

2019-06-03 05:00:00
ចំនួនមតិ 0 | ចំនួនចែករំលែក 0

មានមនុស្សមិនតិចទេ ដែលជួបរឿងស្មុគស្មាញជីវិត ព្រោះពួកគេមិនដឹងពីដំណោះស្រាយ។ ចង់ស្រស់ស្រាយពេញមួយថ្ងៃ មិនពិបាកនោះទេ ឲ្យតែយើងខ្លួនឯងចាប់ផ្ដើម ហើយតាំងចិត្តឲ្យបាន។ ខាងក្រោមនេះ ជាតិចនិកខ្លះៗជួយឲ្យអ្នកសប្បាយរីករាយបានយ៉ាងងាយស្រួល។

១ ទម្លាប់ក្រោកពីព្រលឹម

អ្នកជំនាញជាច្រើន មិនសូវលើកទឹកចិត្តឲ្យគេងយូររហូតដល់ថ្ងៃត្រង់នោះទេ លើសពីនេះ អ្នកដែលចំណាយពេលច្រើនលើការគេង ត្រូវគេសិក្សាថា មានវិបត្តិផ្លូវចិត្ត។ ដូច្នេះ បើអ្នកមានទម្លាប់គេងព្រឹកយូរៗ គួរផ្លាស់ប្ដូរមកក្រោកពីព្រឹកព្រលឹមម្ដង នោះនឹងមានអារម្មណ៍ថាប្លែក លើសពីការរំពឹងទុក។ អ្នកអាចមានពេលវេលាច្រើនដូចជា ហាត់ប្រាណ ញ៉ាំអាហារពេលព្រឹក រីករាយជាមួយសមាជិកគ្រួសារ និងមើលព្រះអាទិត្យរះយ៉ាងមានក្តីសុខ ។ សូម្បីបុគ្គលជោគជ័យជាច្រើន ក៏តែងមានទម្លាប់ក្រោកពីព្រលឹមដែរ ព្រោះទទួលបានអត្ថប្រយោជន៍ច្រើនស្មានមិនដល់។

២. ញញឹមដាក់កញ្ចក់

ចៀសមិនផុត ស្រីៗជាច្រើនចូលចិត្តសម្លឹងកញ្ចក់ពេលនៅក្នុងបន្ទប់ទឹក ឬ មើលកញ្ចក់ដើម្បីតុបតែងមុខបន្ថែម ។ កុំឲ្យខាត កុំភ្លេចឆ្លៀតសើចដាក់កញ្ចក់ផង ពេលនោះអ្នកនឹងទទួលបានស្នាមញញឹមបរិសុទ្ធមួយត្រលប់មកវិញ ដែលធ្វើឲ្យអ្នកកាន់តែជឿជាក់ និងសប្បាយរីករាយទ្វេដង។

៣. ងូតទឹកឲ្យដល់សក់ក្បាល

អ្នកនឹងទទួលបានអារម្មណ៍ត្រជាក់ និងស្វាងភ្លាមៗ ពេលងូតទឹកព្រឹកព្រលឹមឲ្យដល់សក់ក្បាល។ មានមនុស្សជាច្រើន ងូតតែរាងកាយនោះទេ ដោយមិនឲ្យទឹកត្រូវសក់ក្បាលឡើយ ព្រោះគេយល់ថាអាចផ្ដាសាយ ឬពិបាកធ្វើម៉ូដសក់ពេលចេញក្រៅ។ តែតាមពិតមិនអ៊ីចឹងទេ អ្នកនឹងទទួលបានអារម្មណ៍ប្លែកខុសពីសព្វដង សូម្បីតែអារម្មណ៍ស្មុគពីយប់ រឿងធុញថប់ក៏រសាត់បាត់អស់ដែរ។

៤. គិតសុទិដ្ឋិនិយម

រឿងល្អៗនឹងកើតឡើង បើអ្នកចាប់ផ្ដើមមើលឃើញពិភពលោកនេះកាន់តែធំទូលាយជាងមុន។ ប្រាប់ខ្លួនឯងពេលក្រោកពីគេងថា ថ្ងៃនេះជាថ្ងៃល្អ ថ្ងៃមានលាភ ដូច្នេះត្រូវតែស្រស់ស្រាយ និងគ្មានរឿងអាក្រក់កើតឡើងទេ។ បន្ថែមវីតាមីនកម្លាំងចិត្តឲ្យខ្លួនឯងកាន់តែច្រើន នោះអារម្មណ៍ស្រស់ស្រាយកើតឡើងតាំងពីព្រឹករហូតដល់អាធ្រាត្រជាមិនខាន។

៥. បំភ្លេចចោលរឿងមិនសប្បាយចិត្ត

កុំទុកខួរក្បាលអ្នកជាធុងសំរាម ផ្ទុកតែរឿងស្មោកគ្រោក រឿងដែលកន្លងហួសគ្មានបានការ។ រឿងណាមិនផ្ដល់ប្រយោជន៍ទេ ឆាប់បំភ្លេចចោលទៅ កុំនូវនឹក ចងចាំយូរពេក។

សុភមង្គល ភាពសប្បាយរីករាយ ពេលខ្លះវាមិនអាចរត់មករកអ្នកដោយខ្លួនឯងនោះទេ លុះត្រាអ្នកចេះបង្កើតវា។ បើអ្នកដឹងថា កំពុងស្មុគស្មាញហើយ កុំសម្ងំឲ្យរឿងអាក្រក់នោះមានឥទ្ធិពលលើអ្នកបន្តទៀត ប្រញាប់ដើរចេញពីវាឲ្យលឿនបំផុត ហើយស្វែងរកក្តីសុខឲ្យខ្លួនឯង ទើបមិន Depression ៕

ចុចអាន៖ អាយុច្រើនប៉ុនណា ក៏អាចរស់នៅសប្បាយដូចក្មេង ឲ្យតែចេះអនុវត្តវិធីទាំងនេះ

អត្ថបទ៖ លឹម សុនា