ទង្វើបែបនេះ បញ្ជាក់ថាគេគ្រាន់តែមានអារម្មណ៍ល្អនឹងអ្នក តែមិនបានស្រលាញ់ទេ

2019-05-28 07:44:45
ចំនួនមតិ 0 | ចំនួនចែករំលែក 0

អ្នកខ្លះសុខចិត្តអន់ទោសឲ្យគេ ព្រោះគិតថាពួកគេគិតថាវានឹងកន្លងផុត ហើយនឹងប្រែជាល្អប្រសើរ។ ធ្វើបែបហ្នឹងប្រៀបដូចជាអនុញ្ញាតឲ្យខ្លួនឯងធ្លាក់ចូលក្នុងភាពឈឺចាប់ សូមព្យាយាមគិតសារជាថ្មី មើលឲ្យច្បាស់ម្ដងទៀត។ បើសិនជាមនុស្សដែលអ្នកកំពុងតែទាក់ទងធ្វើរឿងទាំង ៤ យ៉ាងនេះ អ្នកគួរតែផ្ដាច់ទំនាក់ទំនងចេញពីគេទៅ។ វានឹងល្អសម្រាប់បេះដូងអ្នក។

១. គាត់មិនច្បាស់លាស់ (តែអ្នកគិតតែម្នាក់ឯងថាវាជាស្នេហា)

សម្ដីរាប់លានម៉ាត់ ជួនកាលវាមិនសំខាន់ដូចទង្វើនោះទេ។ ថ្ងៃនេះគេប្រាប់ថាស្រលាញ់អ្នកចង់រស់នៅជាមួយអ្នក ប៉ុន្តែទង្វើដែលបង្ហាញចេញមកមិនដូចអ្វីដែលគេនិយាយទាល់តែសោះ។ ពេលខ្លះអ្នកមិនច្បាស់ក្នុងចិត្តទេ តែធ្វើដូចជាដឹងរឿងគ្រប់យ៉ាងច្បាស់ ហើយលួចសង្ឃឹមថាថ្ងៃណាមួយគេនឹងច្បាស់លាស់ជាមួយអ្នក។ អ្នកដើរប្រាប់គេគ្រប់គ្នាថាបុរសម្នាក់នេះជាប្រុសដែលខ្ញុំស្រលាញ់ តែគេដើរប្រាប់អ្នកគ្រប់គ្នាថាអ្នកគ្រាន់តែជាមនុស្សដែលគេណាត់ជួបតែប៉ុណ្ណោះ ព្រោះតែគេមិនច្បាស់លាស់ជាមួយអ្នក។

២. សុំពេលអ្នកម្ដងហើយម្ដងទៀតទៅជម្រះរឿងចាស់ៗជាមួយអ្នកផ្សេង

គេសួរអ្នកថាតើស្រលាញ់គេទេ តែគេវិញបែរជាសុំពេលទៅបញ្ចប់រឿងជាមួយអ្នកផ្សេង។ បើសិនជាគិតឲ្យបានច្បាស់ទៅ ពេលមនុស្សម្នាក់ប្រាកដជាស្រលាញ់យើងមែន គេនឹងបញ្ចប់រឿងគ្រប់យ៉ាងជាមួយអ្នកផ្សេងឲ្យបានរួចរាល់ហើយ ទើបមកទាក់ទងយើង មិនមែនទុកឲ្យទំនាក់ទំនងមួយនេះនៅមិនច្បាស់លាស់ហើយប្រទាក់ក្រឡាគ្នាបែបនេះទេ។ គេនឹងមិនសុំអ្នកឲ្យនៅរងចាំគេទេ តែបើសិនជាអ្នកយល់ព្រមចាំគេដោយខ្លួនឯង នោះអ្នកនឹងក្លាយជាមនុស្សម្នាក់ដែលគ្មានតំណែងច្បាស់លាស់ក្នុងបេះដូងគេទេ។

៣. ធ្វើឲ្យអ្នកឈឺចាប់ ហើយប្រាប់ឲ្យអ្នកអត់ធ្មត់និងរងចាំ

អ្នកនឹងធ្វើឲ្យបេះដូងខ្លួនឯងឈឺចាប់ បើអ្នកប្រើប្រាស់ការអត់ធ្មត់ខ្លួនឯងរង់ចាំមនុស្សម្នាក់ទាំងដែលមិនដឹងពីគោលដៅច្បាស់លាស់ ហើយនៅតែគិតថាគេកំពុងតែពុះពារគ្រប់យ៉ាងក្នុងក្ដីស្នេហាមួយនេះ។ ស្នេហាដែលត្រូវរងចាំសម្រាប់តែការឈឺចាប់ រង់ចាំតែម្នាក់ឯង តើអ្នកគិតថាវាជាស្នេហាដែរទេ?

៤. គេគ្រាន់តែមានអារម្មណ៍ល្អ តែមិនបានស្រលាញ់អ្នកទេ

ដោយសារតែគេតែងតែនិយាយថាគាត់មានអារម្មណ៍ល្អគ្រប់ពេលដែលនៅជាមួយអ្នក (ទាំងដែលគេមិនច្បាស់ថាអ្នកនឹងគេជាអ្វីនឹងគ្នា) អ្នកដឹងទេ ពេលខ្លះអារម្មណ៍ល្អមិនមែនសុទ្ធតែជាស្នេហាទាំងអស់ទេ បើគេពិតជាស្រលាញ់អ្នក គេនឹងបង្កើតទំនាក់ទំនង និងតំណែងដែលច្បាស់លាស់មួយឲ្យអ្នក៕

ចុចអាន៖ ដឹងពីភាសាកាយវិការ ដើម្បីដឹងច្បាស់ថាគេមានចិត្តលើអ្នកឬអត់

ប្រភព៖ pentahugs ប្រែសម្រួល៖ ឃួន សុលីកា