វិធី៣យ៉ាងស្រោចស្រង់ខ្លួនឯងឱ្យរស់ឡើងវិញ ក្រោយបែកបាក់ស្នេហា
- 2019-05-23 03:51:31
- ចំនួនមតិ 0 | ចំនួនចែករំលែក 0
វិធី៣យ៉ាងស្រោចស្រង់ខ្លួនឯងឱ្យរស់ឡើងវិញ ក្រោយបែកបាក់ស្នេហា
មិនថាពេលបែកគ្នាដោយវិធីណាក៏ដោយ យើងតែងចង់បែកគ្នាដោយសន្តិភាព និងអាចមើលមុខគ្នាដូចពីមុន។ ប៉ុន្តែវាប្រហែលគ្រាន់តែជាទ្រឹស្ដីប៉ុណ្ណោះ ចំណែកការអនុវត្តពិតជាមិនងាយធ្វើបានឡើយ ព្រោះពីមនុស្សធ្លាប់ស្រលាញ់គ្នា ទៅជាបែកបាក់ អ្នកណាទៅអាចញញឹម មិនឈឺចាប់បាននោះ។ អ៊ីចឹង ថ្ងៃនេះកញ្ញាចង់បង្ហាញវិធី៣យ៉ាងដែលអាចជួយស្រោចស្រង់អ្នកពីអារម្មណ៍ឈឺចាប់ទាំងឡាយ ក្រោយបែកគ្នា និងរស់បន្តបានដោយចំណាយពេលខ្លី។
១. យកតែចំណុចអវិជ្ជមានដែលគេមានមកគិតបានហើយ
ចង់មិនចង់ ពេលបែកគ្នាច្បាស់ជាមានអ្នកត្រូវអង្គុយយំ ស្ដាយអនុស្សាវរីយ៍ និងសួររកហេតុផលហេតុអីក៏អ្នកទាំងពីរបែកគ្នា។ ដូច្នេះវិធីដំបូងដើម្បីបំភ្លេចគេឱ្យបានឆាប់ គឺនឹកឃើញតែចំណុចអាក្រក់របស់គេដែលធ្លាប់ធ្វើដាក់អ្នក។ លុបអំពើល្អរបស់គេចោលឱ្យអស់ ព្រោះកាលណាទង្វើអាក្រក់របស់គេលេចឡើងមកច្រើន នោះខួរក្បាលរបស់អ្នកក៏លែងចាត់ទុកគេជាមនុស្សសំខាន់ ហើយក៏លែងមានចិត្តស្រលាញ់អីទៀតដែរ។
២. ឆ្លុះកញ្ចក់មើលខ្លួនឯងឱ្យបានញឹកញាប់
ដល់ពេលបែកគ្នា មនុស្សភាគច្រើនឃុំខ្លួនឯងតែក្នុងបន្ទប់ បាយក៏មិននឹក ទឹកក៏មិនស្រេក ខ្លួនក៏មិនតុបតែងដែរ។ ប៉ុន្តែបើអ្នកចង់រស់នៅបន្ត និងចង់ដើរទៅមុខសម្រេចក្ដីស្រមៃដែលធ្លាប់មាន ហេតុអីត្រូវមកអង្គុយកើតទុក្ខក្នុងបន្ទប់ងងឹតដូចក្នុងមឈូសបែបនេះ? ត្រូវឧស្សាហ៍ឆ្លុះកញ្ចក់មើលមុខខ្លួនឯង ថាតើពេលនេះអាក្រក់យ៉ាងណាហើយ។
បើអាក្រក់ខ្លាំង ស្គមខ្លាំង ភ្នែករូងខ្មៅព្រោះតែយំនឹកគេច្រើនថ្ងៃហើយនោះ ល្មមដល់ពេលងើបចេញទៅបើកបង្អួចឱ្យពន្លឺជះចូល ហើយតុបតែងខ្លួនចេញទៅក្រៅ ជួបមនុស្សថ្មី ព្រោះជីវិតយើងមិនមែនបញ្ចប់ព្រោះតែស្នេហាមួយនេះទេ។
៣. ប្រាប់ខ្លួនឯងថា អ្នកគឺជាម្ចាស់ជីវិតខ្លួនឯង មិនមែនគេទេ
ទោះក្នុងកាលៈទេសៈបែបណាក៏ដោយ ដាច់ខាតកុំបណ្ដោយឱ្យមនុស្សប្រុសម្នាក់មកធ្វើជាអ្នកគ្រប់គ្រងជីវិតនិងព្រេងវាសនារបស់អ្នក ព្រោះបើអ្នកផ្ដល់សិទ្ធិឱ្យគេបែបនេះ ពេលគ្មានគេ អ្នកនឹងមិនអាចរស់បានទៀតទេ។ ត្រូវប្រាប់ខ្លួនឯង គឺម្ដាយឪពុករបស់អ្នកទៅវិញទេ ដែលជាអ្នកផ្ដល់ជីវិតមួយនេះដល់អ្នក ឯគេនោះត្រឹមតែជាអ្នកដទៃដែលកាលពីគ្មានគេក៏យើងនៅតែរស់ជាមួយម៉ាក់ប៉ាបានយ៉ាងមានក្ដីសុខ។
វាប្រហែលជាកុហកខ្លួនឯងបន្តិច ព្រោះពេលគេចូលមកក្នុងជីវិតយើង គេបានធ្វើអំពើល្អ ផ្ដល់ក្ដីស្រលាញ់ដែលដក់ជាប់ក្នុងចិត្តយើង ពិបាកបំភ្លេច តែក៏ត្រូវទទួលស្គាល់ការពិតដែរថា ស្នេហាមានអានុភាពត្រឹមតែពេលអ្នកទាំងពីរនៅជាមួយគ្នាប៉ុណ្ណោះ បើគេទៅបាត់ហើយ នៅអាឡោះអាល័យ ចោលជីវិតខ្លួនឯងធ្វើអី?
ចុចអាន៖
ពេលដាក់ចិត្តស្រលាញ់ហើយ អ្នកណាក៏ក្លាយជាមនុស្សល្ងង់ដែរ
កុំស្រលាញ់មនុស្សដែលមិនបានស្រលាញ់យើង ព្រោះគ្មានបានអ្វី ក្រៅពីឈឺចាប់