ស្រលាញ់មនុស្សម្នាក់ចាំបាច់មានហេតុផលដែរ? តែស្រលាញ់គឺស្រលាញ់ហើយ!

2019-05-21 02:25:00
ចំនួនមតិ 0 | ចំនួនចែករំលែក 0

ស្នេហាដែលល្អឥតខ្ចោះនៅលើពិភពលោកនេះប្រហែលជាគ្មានឡើយ តែបើស្នេហាចេះពឹងផ្អែកគ្នាដើម្បីដើរទៅមុខនោះ បែបមិនខ្វះឡើយ ហើយពេលខ្លះ ចិត្តស្រលាញ់គឺកើតមកដោយឯងៗដោយមិនចាំបាច់មានហេតុផលពិសេសអ្វីទាំងអស់។

ពេលខ្លះមនុស្សស្រលាញ់គ្នា តែសួរថា ហេតុអ្វីក៏ស្រលាញ់ខ្ញុំខ្លាំងម្ល៉េះ ទាំងដែលខ្ញុំមិនស្អាត មិនគួរឲ្យស្រលាញ់ដូចអ្នកដទៃ។ សំនួរនេះគឺពិបាកឆ្លើយជាទីបំផុត ព្រោះតែចិត្តស្រលាញ់គឺស្រលាញ់ហើយ គ្មានហេតុផលអ្វីជាក់លាក់ឡើយ។ ពីគ្រាដំបូង គេអាចចាប់អារម្មណ៍ ឬយើងចាប់អារម្មណ៍គេដោយសារតែរូបសម្បត្តិក៏ពិតមែន តែក្រោយមកមនោសញ្ចេតនានេះក៏កើនឡើងចាប់តាំងពីពេលណាក៏មិនដឹងខ្លួន។

បុរសម្នាក់ដែលសមឲ្យយើងប្រគល់ក្ដីទុកចិត្តឲ្យ ជាដំបូងបំផុតគឺត្រូវមានទំនួលខុសត្រូវ។ បើគេបង្ហាញឲ្យឃើញថា គេពេញវ័យគ្រប់គ្រាន់ហើយមានទំនួលខុសត្រូវនោះ យើងអាចបន្តមើលចិត្តទៀតបាន។ ក៏នៅកំឡុងពេលនេះដែរ ដែលមនុស្សជាច្រើន ចាប់ផ្ដើមដឹងថាខ្លួនក៏មានចិត្តលើគូភាគីដោយមិនដឹងខ្លួន។ ក្រោយមកត្រូវគេសួរថាស្រលាញ់គេដោយសារអ្វី ក៏ឆ្លើយមិនបាន ព្រោះពីដំបូងមានស្រលាញ់ឯណា។ យូរៗទៅ មានចិត្តពីពេលណាក៏មិនដឹង។

មានមនុស្សមួយចំនួន នៅមាត់និយាយមិនដាច់ ថាស្រលាញ់យើង តែលួចចាក់ពីក្រោយខ្នង រីឯប្រភេទមនុស្សដែលឆ្លើយមិនបានថាស្រលាញ់យើងត្រង់ចំណុចណានោះ គឺមិនដែលហើបមាត់ថាឡើយថាស្រលាញ់យើង តែក្នុងចិត្តមានតែយើងម្នាក់គត់។ តាមនោះដែរ ស្រីៗកុំជឿតែពាក្យផ្អែម តែត្រូវមើលលើសកម្មភាពជាក់ស្ដែងវិញ ទើបគួរឲ្យទុកចិត្ត។

ក្ដីស្រលាញ់មិនអាចបង្ហាញតាមរយៈតែពាក្យសម្ដីនោះទេ តែវាស្ថិតនៅលើការបង្ហាញរបស់ពួកគេ។ គេ ឬយើងអាចឆ្លើយមិនបានថាហេតុអ្វីបានជាស្រលាញ់គ្នាក៏ពិតមែន តែអ្វីដែលយើងហ៊ានធ្វើចំពោះគេ គឺលើសពីអ្នកដែលម្ង៉ៃៗ និយាយថាស្រលាញ់គ្នាមិនដាចពីមាត់ទៅទៀត។ ព្រោះនៅពេលស្រលាញ់គ្នាមែនទែន គេលែងចាប់អារម្មណ៍ពីចំណុចខាងក្រៅដូចជាទ្រព្យសម្បត្តិក៏ដូចជារូបរាងទៀតហើយ។

ស្នេហាមិនអាចចងបានដោយសម្ភារៈនិយមបានឡើយ តែចងដោយមនោសញ្ចេតនាដែលធ្វើដាក់គ្នាពីមួយថ្ងៃទៅមួយថ្ងៃវិញទេ។ ដូចនេះហើយ ប្រសិនបើអ្នកឆ្លើយមិនបានថាខ្លួនស្រលាញ់ដៃគូនៅចំណុចណាក៏គ្មានបញ្ហាដែរ ព្រោះស្រលាញ់គឺស្រលាញ់ហើយ គ្មានហេតុផលឡើយ៕

ប្រភព៖ bestie ប្រែសម្រួល៖ Caramel