អាយុជិត៣០ហើយ ធ្លាប់សួរខ្លួនឯងទេថាបានធ្វើអ្វីឲ្យម៉ាក់នៅ?
- 2019-05-06 08:50:00
- ចំនួនមតិ 0 | ចំនួនចែករំលែក 0
អាយុជិត៣០ហើយ ធ្លាប់សួរខ្លួនឯងទេថាបានធ្វើអ្វីឲ្យម៉ាក់នៅ?
ចំពោះម្ដាយ ពួកយើងនៅតែជាកូនក្មេងជានិច្ចទោះបីជាឈានចូលវ័យ២០ ៣០ ឬ៤០ក៏ដោយ។ ម្ដាយឪពុកមានអារម្មណ៍ថាខ្លោចផ្សានៅពេលយើងត្រូវនឿយហត់រកលុយក្នុងពិភពដ៏ប្រកួតប្រជែងនេះ។
កូនៗដែលឡើងពីខេត្តដើម្បីធ្វើការនៅក្រុងមានដឹងទេថាអ្នកម្ដាយតែងទន្ទឹងរង់ចាំជារៀងរាល់ថ្ងៃ។ មានតែនៅក្បែរម្ដាយខ្លួនប៉ុណ្ណោះ ទើបកូនៗមានអារម្មណ៍ថាស្ងប់ចិត្ត។
ម្ដាយរបស់យើងគ្រប់រូប ក៏ធ្លាប់មានក្ដីសុបិនដូចយើងដែរ តែត្រូវលះបង់ដើម្បីពាក្យថាគ្រួសារ។ តើអ្នកធ្លាប់គិតពីក្ដីសុបិនរបស់ម្ដាយខ្លួនឬទេ។ យ៉ាងណាក្ដី ប្រសិនបើយើងសួរ ម៉ាក់ក៏ប្រហែលជាឆ្លើយថា៖ ម៉ាក់គ្រាន់តែចង់ឲ្យផ្ទះយើងមានសុខភាពល្អ កូនបានក្ដីសុខគឺបានហើយ។ ទោះបីជាមានក្ដីស្រមៃខ្លួនឯងក៏ដោយ តែអ្វីដែលគាត់ចង់បានមុនគេគឺក្ដីសុខរបស់គ្រួសារទាំងមូលទៅវិញ។ និយាយឲ្យត្រង់ ខ្ញុំមិនដែលសួរម៉ាក់ខ្លួនឯងទេថា ម៉ាក់ធ្លាប់ស្រមៃចង់ធ្វើអ្វី ហើយគាត់ខ្លួនឯងក៏មិនដែលនិយាយចេញមកដែរ។
ពួកយើងតែងរអ៊ូថា៖ ម៉ាក់និយាយច្រើនណាស់ មានតែរឿងមួយនិយាយពេញមួយថ្ងៃ ការងារច្រើនហើយ មកផ្ទះវិញ កាន់តែឈឺក្បាល។ ទទួលស្គាល់ថាម្ដាយគ្រប់រូបតែងនិយាយច្រើន តែសួរថាពួកយើងដែលស្ដាប់គាត់ឬអត់។ តែអ្នកមានដែលយល់អារម្មណ៍អ្នកដែលមិនគិតពីចំណូលចិត្តរបស់ខ្លួន ហើយមើលថែទាំគ្រួសារមួយគ្រប់ពេលវេលាឬអត់?
ខ្ញុំធ្លាប់អានឃ្លាមួយចំនួនដែលគួរយកមកគិតដូចជា៖ -ពេលអ្នកកំពុងផឹកកូកា សូមមើលថាឪពុកម្ដាយកំពុងផឹកអ្វី -ពេលអ្នកកំពុងស្លៀកពាក់សម្លៀកបំពាក់ថ្លៃៗ សូមក្រឡេកមើលថាអ្នកមានគុណខ្លួនកំពុងស្លៀកអ្វី? -ពេលអ្នកកំពុងចាយលុយយ៉ាងសប្បាយដៃ សូមក្រឡេកមើលជីវភាពអ្នកមានគុណនៅផ្ទះ។ រាល់ពិធីបុណ្យ មិនថាតូច ឬធំ ពួកយើងតែងចង់ដើរទេសចរណ៍ជាមួយក្រុមមិត្តភ័ក្ដិ ទាំងមិនដឹងថា តាមការពិតម្ដាយក៏ចង់បានដើរលេងដែរ តែគាត់មិននិយាយចេញមក។ ពេលខ្លះគាត់មិនចង់ទាំងដើរលេងផង ឲ្យតែពួកយើងទៅលេងគាត់គឺគ្រប់គ្រាន់ហើយ តែសួរថាបានកូនប៉ុន្មាននាក់ដែលយល់ពីជម្រៅចិត្តគាត់។
មកដល់វ័យនេះហើយ ធ្លាប់សួរទេថា ធ្វើអ្វីឲ្យម្ដាយបានខ្លះហើយ? កុំភ្លេចណាថា នៅពេលយើងកំពុងរកលុយ ម្ដាយក៏កំពុងចាស់ទៅដូចគ្នា កុំបណ្ដោយឲ្យហួសពេលឲ្យសោះ៕