៥ ចំណុចមនុស្សប្រុសសម័យថ្មីគួរមានច្រើនជាងលុយ និងរូបរាង

2019-04-29 07:35:00
ចំនួនមតិ 0 | ចំនួនចែករំលែក 0

មិនមែនទាំងអស់មែន ប៉ុន្តែឆ្លងកាត់បទពិសោធន៍គួបផ្សំនឹងការឃើញផ្ទាល់ភ្នែក បានបង្ហាញឲ្យឃើញថាបុរសភាគច្រើនដែលមានទ្រព្យសម្បត្តិហូរហៀរ មានរួបរាងសង្ហារ ជាមនុស្សសាវា មើលងាយអ្នកដទៃ ជាពិសេសគេតែងគិតថាគេចង់បានមនុស្សស្រីប៉ុន្មាននាក់ក៏បានដែរ។

តែត្រូវគិតថាប្រយ័ត្នរកនារីត្រឹមត្រូវម្នាក់មកធ្វើជាម្ដាយកូនខ្លួនឯងមិនបាន ព្រោះមានតែមនុស្សស្រីដែលត្រេកត្រអាលនឹងរូបរាង ហើយនិងទ្រព្យសម្បត្តិរបស់អ្នកតែប៉ុណ្ណោះដែលចាប់អារម្មណ៍ប្រុសប្រភេទនេះ បើសិននាងជានារីដែលត្រូវការអ្វីដែលមិនមែនជាទ្រព្យ និង រូបរាងរបស់អ្នក នាងគ្មានថ្ងៃនឹងចាប់អារម្មណ៍មនុស្សប្រភេទអ្នកឡើយ។ មិនមែនត្រឹមតែលុយ ការងារ តែមនុស្សប្រុសសម័យថ្មីត្រូវតែមានប៉ុន្មានចំណុចនេះជាប់ខ្លួន ទើបហៅថាជាបុរសសង្ហារពិតប្រាកដ៖

ចំណេះដឹង

មានចំណេះដឹងកន្លែងនេះមិនបានសំដៅដល់អ្នកដាច់ខាតត្រូវតែរៀនឲ្យបានខ្ពស់ដល់ថ្នាក់បណ្ឌិតអីនោះទេ។ ប៉ុន្តែយ៉ាងហោចណាស់អ្នករៀនចប់ថ្នាក់បរិញ្ញាប័ត្រ ហើយអាចស្វែងរកបានការងារល្អមួយ និងប្រាក់ខែសមរម្យ។

ចំណេះដឹងនេះហើយដែលនាំអ្នកអាចទៅរកភាពជោគជ័យ និងអាចឲ្យអ្នកបណ្ដោះខ្លួនចេញពីភាពក្រីក្រ លំបាកបាន ទោះបីជាអ្នកកើតចំគ្រួសារអ្នកមានក៏ដោយបើអ្នកគ្មានចំណេះដឹង អ្នកនឹងរស់នៅដោយមានតែសម្បកក្រៅ ពឹងតែទ្រព្យរបស់ប៉ាម៉ាក់តែប៉ុណ្ណោះ។ តែអ្នកមិនត្រូវបានអ្នកដទៃផ្ដល់តម្លៃឲ្យឡើយ ហើយភាពស្រស់សង្ហារបស់អ្នកក៏បាត់បង់តាមហ្នឹងដូចគ្នា។

ភាពស្មោះត្រង់

មានលុយ រូបរាងសង្ហារ ច្បាស់ណាស់ថាមិនខ្វះមនុស្សស្រីចាប់អារម្មណ៍ទេ។ តែភាពជាប្រុស ជាសុភាពបុរសអ្វីចាំបាច់ដែលអ្នកត្រូវមានគឺ ភាពស្មោះត្រង់ ចំពោះមនុស្សដែលអ្នកស្រលាញ់។ គ្មាននរណាកោតសរសើរមនុស្សក្បត់ទេ ទោះអ្នកមានមុខមាត់ កិត្តិយស កម្រិតណាក៏ដោយ អំពើក្បត់នឹងបន្ថោកតម្លៃរបស់អ្នក។ មួយវិញទៀតមនុស្សស្រីក៏ជាមនុស្សដែរ បើមិនស្មោះត្រងនឹងនាងទេកុំយកនាងមកលេងសើចអី ព្រោះនាងជាកូនស្រីមានតម្លៃណាស់សម្រាប់ឪពុកម្ដាយនាង។ សុជីវធម៌ និងសីលធម៌

រស់នៅក្នុងសង្គមបើអ្នកគ្មានរបស់ពីរយ៉ាងនេះទេនោះគេមិនហៅអ្នកថាមនុស្សទេ។ ការគោរពនិងឲ្យតម្លៃអ្នកដទៃជាអ្វីដែលមនុស្សគ្រប់គ្នាគួរតែធ្វើ មុខមាត់ស្អាតបាត មានលុយ តែគ្មានសីលធម៌ និង សុជីវធម៌ តើមានប្រយោជន៍អ្វីទៅ។

គោរពនិងឲ្យតម្លៃស្ត្រី

ទោះបី ស ខ្មៅ ខ្ពស់ ទាប មាន ឬ ក្រ ស្ត្រីគ្រប់រួបគួរតែទទួលបានការគោរព និងឲ្យតម្លៃ។ កុំឃើញនាងមិនស្អាត ឬ ក្រ ស្រាប់តែនិយាយមើលងាយនាង អ្នកត្រូវដឹងថាអ្នកអាចមានថ្ងៃនេះក៏ដោយសារមនុស្សស្រីជាអ្នកបង្កើតអ្នកមកដែរ បើអ្នកមើលងាយនាងវាប្រៀបដូចនឹងអ្នកកំពុងតែមើលងាយភេទម្ដាយខ្លួនឯងអ៊ីចឹង។

ទំនួលខុសត្រូវ

ធ្វើជាមនុស្សប្រុសអ្វីដែលត្រូវមានក្នុងខ្លួនគឺទំនួលខុសត្រូវ បើអ្នកក្លាហានហ៊ានយកបេះដូងនាងបាន ពីម្ដាយឪពុករបស់គេ អ្នកក៏ត្រូវតែក្លាហាននឹងទទួលខុសត្រូវចំពោះជីវិតនាងដូចគ្នា។ មិនមែនគ្រាន់តែស្រលាញ់មួយឆាវ ពេលអស់សម្រស់ហើយក៏លែងដៃចោលទេ បើអ្នកធ្វើបែបនេះអ្នកមិនមែនជាកូនប្រុសទេ៕

ចុចអាន៖ កុំថាឡើយសង្សារ សូម្បីមិត្តភក្តិរកមិនបានផង បើប្រកាន់យកចរិត ៧ នេះជាប់ខ្លួន

អត្ថបទ៖ ឃួន សុលីកា