មិនមែនក្តៅធម្មតា គឺក្តៅដល់ថ្នាក់ពងទាកូនញាស់ក្លាយជាទា

2019-04-24 07:45:00
ចំនួនមតិ 0 | ចំនួនចែករំលែក 0

អាកាសធាតុពីមួយថ្ងៃទៅមួយថ្ងៃកាន់តែក្ដៅឡើងៗ រហូតដល់ថ្នាក់ធ្វើឲ្យស៊ុតមួយចំនួន បានញាស់ក្លាយជាសត្វអស់។

ប៉ុន្មានថ្ងៃចុងក្រោយនេះ សីតុណ្ហភាពនៃពិភពលោក ក៏ដូចជាទ្វីបអាស៊ីបានកើនឡើងជាខ្លាំង ដោយមានតំបន់មួយចំនួនបានឡើងដល់៤០អង្សារ។ ទោះបីជាអ្នកជំនាញបានឲ្យដឹងថា សីតុណ្ហភាពនេះមិនទាន់ជាសីតុណ្ហភាពក្ដៅបំផុតនៃរដូវក្ដៅឆ្នាំនេះក៏ដោយ ក៏មនុស្សជាច្រើនបានត្អូញជាហូរហែរថា ពិតជាក្ដៅខ្លាំងណាស់ គឺពិបាកក្នុងខ្លួនជាខ្លាំង។

អាកាសធាតុក្ដៅបែបនេះ ក៏ធ្វើឲ្យជីវិតរស់នៅរបស់មនុស្សជាច្រើនត្រូវប្រែប្រួលផងដែរ។ ជាក់ស្ដែង ថ្មីៗនេះ អ្នកប្រើបណ្ដាញសង្គមម្នាក់បានធ្វើឲ្យគេភ្ញាក់ផ្អើល ក៏ដូចជាអស់សំណើចជាខ្លាំងនៅពេលនិយាយពីស្ថានភាពរបស់ខ្លួននៅក្នុងខែក្ដៅនេះ។ តាមនោះដែរ បុរសម្នាក់នេះបានទិញពងទាកូនប្រមាណ២០គ្រាប់មកទុកញ៉ាំ យ៉ាងណាក្ដី លោកមិនទាន់បានស្ងោរញ៉ាំផង ស្រាប់តែព្រឹកឡើង ពងទាទាំងអស់ញាស់ក្លាយជាកូនទាអស់ ធ្វើឲ្យលោកស្រងាកចិត្តយ៉ាងខ្លាំង។

នៅពេលនេះ បុរសខាងលើមិនដឹងថាត្រូវធ្វើយ៉ាងណាជាមួយហ្វូងទាថ្មីរបស់ខ្លួនឡើយ។ ចែករំលែកនឹងអ្នកបង្ហោះខាងលើ អ្នកប្រើបណ្ដាញសង្គមមួយរូបទៀតបានបញ្ចេញមតិថា គេក៏ជួបរឿងដូចគ្នាដែរ ដោយលោកបានទិញពងក្រួចកូនមកញ៉ាំ ថ្ងៃបន្ទាប់ស្រាប់តែពងក្រួចញាស់អស់។